OIMÉRAMO omano raʼe ndehegui peteĩ rehayhúva katuete reñembyasy, reñeñandu neaño, ha ndaikatúi ejapo mbaʼeve esolusiona hag̃ua pe situasión. Ikatu oime ndepochy, eimoʼã nde kúlpare oiko hague upéva, térã rekyhyje. Ha ikatu voi repensa ikuentaveha reñentrega.

Reñembyasy ha nerasẽramo omano haguére peteĩ rehayhúva, upéva ndeʼiséi nekangyha, heʼise guei rehayhueterei hague upe persónape. ¿Mbaʼépa ikatu nepytyvõ reñeñandu porãmie hag̃ua?

Repensáramo jepe mbaʼeve ndaikatumoʼãiha ombohasa ndehegui pe reñandúva, koʼã suherénsia jahechátava ikatu nepytyvõ.

NERASẼRAMO IKATU REÑEÑANDU PORÃMIE

Káda uno ningo ohechauka oñembyasyha de diferénte fórma, por ehémplo algúno hetave tiémpore oñembyasy. Ha heta hénte oñeñandu porãve hasẽ rire. Vanesa, pe operde vaʼekue iñermánope heʼi: “Che ningo cherasẽháre aiko vaʼekue, péro upéva ojapo porã vaʼekue cherehe”. Sofíagui omano kuri iñermána derrepentete, haʼe heʼi: “Hasyeterei ningo chéve apensávo pe oiko vaʼekuére. Haʼete voi ojeavríva peteĩ erída oñembyaíva hína oñemopotĩ hag̃ua. Pe dolór añandúva apensávo la oikóvare ndaikatúi aaguanta, péro aikuaa tekotevẽha ajapo upéva ikatu hag̃uáicha okuera pe erída”.

 EMOMBEʼU ÓTROPE MBAʼÉICHAPA REÑEÑANDU

Ndaivaíri ningo sapyʼapyʼa reimeséramo neaño, péro ndereipotáiramo avave nepytyvõ haʼetéta hína reguerahaséva neaño peteĩ kárga ipohyietereíva. Javier orekóva 17 áño imanduʼa mbaʼépa ojapo vaʼekue omanórõ guare chugui itúa. Haʼe heʼi: “Che amombeʼu ótrope mbaʼéichapa añeñandu, ndaikuaái ningo isentídopa la haʼéva péro añeñandu porãiterei ikatu haguére amombeʼu pe añandúva”. Rosa, pe ñañeʼẽ hague pe artíkulo oĩvape iñepyrũme, omombeʼu mbaʼéichapa upéva oipytyvõ avei chupe. Haʼe heʼi: “Tuichaiterei ningo chekonsola añeʼẽvo ótrondi, añandu haʼekuéra chentendeha ha oĩha che ykére”.

EHEJA UMI ÓTRO NEPYTYVÕ

Peteĩ doktóra heʼi: “Umi oĩva de duélo ohejáramo ihénte ha iñamigokuéra oipytyvõ chupekuéra iñepyrũ guive, ifasilvéta ogueropuʼaka hag̃ua mbeguekatúpe pe situasión”. Emombeʼu ne amigokuérape mbaʼépa ikatu ojapo nepytyvõ hag̃ua, katuete haʼekuéra nepytyvõse hína, péro ndoikuaáinte mbaʼéichapa ikatu ojapo upéva (Proverbios 17:17).

EÑEMOAG̃UI ÑANDEJÁRARE

Tina omombeʼu mbaʼéichapa oñeñandu: “Che ména oreko kuri kánser, ha derrepentete ou omano chehegui. Upérõ ndarekovéima kuri mávapepa amombeʼúta mbaʼépa apensa ha añandu, upévare añepyrũ amombeʼu entéro mbaʼe Ñandejárape. Káda día apuʼãrema voi ajerure chupe tachepytyvõ aaguanta hag̃ua upe día. Ha añetehápe chepytyvõ hetaiterei hendáicha”. Juana ningo oreko vaʼekue 22 áño omanórõ guare isy. Haʼe omombeʼu: “Che alee la Biblia káda día, ha upéva tuichaiterei chekonsola, siémpre areko peteĩ mbaʼe iporãva ikatúvare apensa”.

EÑEIMAHINA OIKOVE JEY VOVE PE REHAYHÚVA

Tina heʼi avei: “Ñepyrũrã nachekonsolái vaʼekue pe esperánsa oikove jeytaha umi omanóva. Che aikotevẽ kuri che ména oĩ che ykére, ha che membykuéra oikotevẽ avei itúare. Koʼág̃a ojapóma 4 áño omano hague che ména, ha añakarama hatã upe esperánsare, upéva hína la chepytyvõva aaguanta hag̃ua. Haʼete voi ahechapáva rojotopa jey vove hendive, ha upéva chembovyʼa ha chembopyʼaguapy”.

Reikotevẽtante voi ningo tiémpo rejerrekupera hag̃ua, péro ikatu tuicha nekonsola Vanesa heʼi vaʼekue: “Sapyʼánte ikatu epensa ndaikatumoʼãiha ndepuʼaka pe rehasávare, péro katuete omehoráta ohóvo ne situasión”.

Ijetuʼuetereígui pe rehasáva, mbaʼeve ndaikatumoʼãi oipeʼaite ndehegui pe sufrimiénto, upéicharõ jepe ndovaléi reñentrega. Ñandejára nepytyvõkuaa hína esegi hag̃ua reñeñandu porã ha evyʼa ne amigokuérandi. Koʼẽrõitéma Ñandejára omoingove jeýta umi omano vaʼekuépe. Haʼe oipotaiterei nde reañuã jey umi rehayhúvape, ha upe tiémpo og̃uahẽ vove pe dolór reñandúva koʼág̃a opátama pára siémpre.