Che anase peteĩ siuda héravape Mulhouse, opytáva noréste de Fránciape. Pe vílla ore roikoha ikonosído vaʼekue voi oiko haguére upépe heta mbaʼe vai. Chemanduʼa jave chemitã tiémpore, ou che akãme mbaʼéichapa umi família oĩva upépe oiko vaipa vaʼekue oñondive. Che famíliape noñemombaʼéi vaʼekue umi kuñáme ha noñeporanduguasúi vaʼekue voi chupekuéra mbaʼépa opensa. Ojeʼémi chéve umi kuña kosinámente opyta vaʼerãha, ha okuida vaʼerãha iména ha imembykuérare.

Chemitã guive voi ahecháma heta mbaʼe vai. Che túa ikaʼueterei vaʼekue ha upéva káusare omano che arekórõ guare 10 áño. Upéi, 5 áño haguépe, peteĩ che ermáno itujavéva chehegui ojesuisida. Upe tiémpope avei oiko peteĩ jejuka che rovake che hentekuéra oiko vaipárõ guare, ha upéva cheafekta vaieterei. Che hentekuéra chemboʼe aipuru hag̃ua kyse ha árma ha avei añorairõ hag̃ua tekotevẽramo. Umi mbaʼe ahasáva káusare aju añemborrevélde, añembotatuahepa ha añepyrũ avei chekaʼu.

Arekópe 16 áño, haʼúma vaʼekue 10 térã 15 votélla de servésa káda día, ha upe riremínte añepyrũma avei ajedroga. Ha apaga hag̃ua che vísiore añepyrũ avende chatárra ha amonda. Arekópe 17 áño aha mimíma préso. En totál, 18 vése añekondena aporomonda haguére ha cheviolénto rupi.

Areko rire 20 áño desastrevéntema la che rekove. Apita jepe 20 sigarríllo de mariguána un díape ha aipuru vaʼekue avei eroína ha hetave dróga. Unos kuánto vése haimete amano de sovredósis. Upéi añepyrũ avei avende dróga, upévare arahámi chejehe kyse ha árma. Peteĩ vuéltape ajapimoʼã peteĩ kuimbaʼépe, péro haʼetépe pe vála oho isínto evíllare ha ndojehúi chupe mbaʼeve. Che sy omano arekórõ guare 24 áño, ha upéva káusare koʼýte cheviolénto. Aha jave kállere umi hénte okyhyjepa chehegui ha ohasa voi pe ótro verédape pono ojoasa chendive. Manterei aiko vai, upévare fin de semanakue ahasámi komisaríape térã ospitálpe.

Aju amenda arekópe 28 áño, ha oime vaʼerã reñeimahináma voi mbaʼéichapa atrata che rembirekópe. Ajaʼo vaipa, ainupã ha namombaʼeiete voi chupe. Ha ndorohasái voi tiémpo oñondive. Che ameʼẽmi chupe heta joya amonda vaʼekue ha aimoʼã péicha akumplimaha hendive. Upéinte haʼe oñepyrũ ostudia la Biblia umi testígo de Jehovándi. Pe primer estúdiope haʼe ohejáma la sigarríllo,  ndojagarravéima chehegui pláta amonda vaʼekue ha omeʼẽmba jey chéve umi joya. Koʼã mbaʼe chembopochyeterei, upévare aproivi chugui ostudia la Biblia. Amotimbómi che sigarríllo hováre ha amotĩ chupe umi vesíno rovake.

Peteĩ pyharépe, aime jave tuichaite kaʼúre, ahapy pe departaménto roikoha. Che rembireko chesalva chéve ha ore família de 5 áñope pono rokaipa. Ajera rire, ambyasyeterei la ajapóva. Che pyʼaite guive apensa Ñandejára núnka nacheperdonamoʼãiha, ha chemanduʼa peteĩ vuéltape ahendu hague peteĩ paʼípe heʼírõ umi iñañáva ohotaha infiérnope. Che sikiátra jepe heʼi chéve: “Nde nanepohãvéima, ndaipóri avave ndesalva vaʼerã”.

Pe inséndio rire, roho roiko che suegrokuérandi. Ha umi Testígo ovisitárõ guare che rembirekópe aporandu chupekuéra: “¿Ikatúne piko Ñandejára cheperdona?”. Haʼekuéra ohechauka chéve 1 Corintios 6:9-11. Upe pártepe oñeñeʼẽ heta mbaʼe vai ndogustaietévare Ñandejárape, péro upéi heʼi: “Pende apytépe oĩ umi yma upéicha vaʼekue”. Upéva ohechauka chéve ikatuha akambia. Ha umi Testígo olee chéve 1 Juan 4:8 ohechauka hag̃ua Ñandejára cherayhuha. Koʼã mbaʼe tuicha chemokyreʼỹ, upémarõ ajerure chupekuéra chemboʼe hag̃ua la Biblia dos vése por semána ha añepyrũ aha irreunionkuérape. Pyʼỹi avei añemboʼe Jehovápe.

Un mes mboyve, adesidíma ahejataha pe dróga ha pe vevída. Péro añetehápe cheforsa vaipaite. Por ehémplo, chepesadílla, cheakãrasyeterei ha chekalambrepa jepi. Péro ahechakuaa avei mbaʼeichaitépa Jehová chepytyvõ, haʼete voi chejagarráva che pógui ha chemombarete. Añeñandu apóstol Pábloicha, haʼe heʼi vaʼekue: “Opa mbaʼerã chembarete Ñandejára omeʼẽgui chéve podér” (Filipenses 4:13). Kon el tiémpo aheja avei pe sigarríllo (2 Corintios 7:1).

La Biblia chepytyvõ amyatyrõ hag̃ua che rekove, ha ndahaʼéi voi upévante, chepytyvõ avei che rogapýpe. Tuicha akambia atrata lája che rembirekópe. Añepyrũ amombaʼe ha arrespeta chupe, ha haʼe “por favór” ha “grásia”. Añepyrũ avei akumpli che rresponsavilida kómo túa. Astudia rire la Biblia un áñore, adesidi aservitaha Jehovápe ha ajevautisa, ojapóma haguéicha che rembireko.

Che aime segúro la Biblia chesalva hague. Umi che hénte ndahaʼéiva Testígo jepe heʼi ndastudiáirire la Biblia provávlemente chejukáta kuri umi dróga térã amanóta kuri añorairõhápe.

La Biblia ningo omboʼe mbaʼépa ojapo vaʼerã umi túa ha ména, ha che aaprende rire koʼã mbaʼe tuichaiterei okambia che rogapy (Efesios 5:25; 6:4). Roñepyrũ rojapo heta mbaʼe oñondive. Koʼág̃a napensavéima che rembireko opytánte vaʼerãha kosináme, síno vyʼápe aipytyvõ chupe osẽ meme hag̃ua opredika umi héntepe. Ha haʼe vyʼápe avei chepytyvõ aservi porã hag̃ua kómo ansiáno kongregasiónpe.

Ahechakuaa mbaʼeichaitépa Ñandejára Jehová cherayhu ha ipasiénsia cherehe. Upévare amboʼeseterei voi umi héntepe Ñandejáragui, koʼýte umi haʼetévaicha naipohãvéimava, pórke heta hénte opensa vaʼekue avei upéicha cherehe. Che aikuaa la Biblia ikatuha oipytyvõ oimeraẽvape okambiaite hag̃ua. La Biblia chemboʼe ahayhu ha arrespeta hag̃ua che rapichakuérape, tahaʼe kuña térã kuimbaʼe.Péro ndahaʼéi voi upévante, chepytyvõ avei amombaʼe hag̃ua che rekove.