Jaʼe jepi peteĩ persóna ñanentendeha ikatu jave oñemoĩ ñande lugárpe. ¿Mbaʼéichapa ikatu ojapo upéva? Oñeimahináramo mbaʼéichapa oñeñandúta haʼe ohasáramo umi mbaʼe ñande jahasáva. Peteĩ espesialísta en Salud Mental hérava Rick Hanson heʼi: “Ñanase guive ñande jarekóma pe kapasida ñañemoĩ hag̃ua ñande rapicha lugárpe”.

EPENSAMÍNA KO MBAʼÉRE: ¿Mbaʼérepa ñande persóna añoite ikatu ñañemoĩ ñande rapicha lugárpe? La Biblia heʼi Ñandejára ñandeapo hague ijoguaháramo (Génesis 1:26). ¿Mbaʼépa heʼise upéva? Heʼise ñande ikatuha jajogua Ñandejárape ha jahechauka umi kualida porã haʼe orekóva. Upéicharõ ñande ñañemoĩ jave ñande rapicha lugárpe ha ñaipytyvõ chupe, jahechauka hína jajoguaha ñande Apohare ñandeporiahuverekóvape, Ñandejára Jehová (Proverbios 14:31).

Ñandejára ningo ñanentende ha ndohechaseiete voi jahasa asývo. La Biblia omombeʼu mbaʼéichapa haʼe oñeñandu kuri ohechárõ guare umi israelítape osufri esklávoramo Egíptope ha avei oĩ aja pe desiértope 40 áñore. Isaías 63:9 heʼi: “Haʼekuéra ohasa asýrõ guare, haʼete voi haʼe la osufríva”. Jahecha mbaʼéichapa Ñandejára ndahaʼéi ohechánteva haʼekuéra ohasa asyha, síno haʼe osufri voi hendivekuéra. Haʼe heʼi: “Che ahechapaite hína mbaʼéichapa ohasa asy hikuái” (Éxodo 3:7). Ñandejára heʼi avei: “Oimeraẽ opokóva penderehe opoko hína che resaʼỹire” (Zacarías 2:8). Umi ótro ñanembohasa asy jave, haʼe osufri avei ñanendive.

Ñañekondenáramo jepe ñandejupe ha ñapensa nañamereseiha Ñandejára ñandeporiahuvereko, la Biblia oasegura ñandéve “Ñandejára tuichaveha ñane korasõgui ha oikuaaha opa mbaʼe” (1 Juan 3:19, 20). Ñandejára ñandekuaa porãve oimeraẽ ótrogui, ñandehegui entéro. Haʼe oikuaapaite opa mbaʼe jahasáva, ñapensáva, ñañandúva ha ñanentende.

 Ñandejára Ñeʼẽ heʼi voi:

• “Ha pejeruréramo ajúda Jehovápe, haʼe katuete penerendúta, pehenóiramo chupe, haʼe heʼíta peẽme: ‘Koʼápe aime’” (ISAÍAS 58:9).

• “Jehová heʼi: ‘Che aikuaa porã mbaʼépa akalkula ajapóvo penderehehápe, ameʼẽta peẽme pyʼaguapy ha ndaguerumoʼãi pende ári mbaʼe vai, péicha perekóta esperánsa ha peneraʼarõta heta mbaʼe porã. Ha peẽ pecherenóita, pejúta ha peñemboʼéta chéve, ha che pohendúta’” (JEREMÍAS 29:11, 12).

• “Ñandejára, embyatymína umi che resay ne mbaʼyrúpe. Nde reskrivi nde lívrope la oikóva cherehe” (SALMO 56:8).

¿Ñanepytyvõtapa ñambohovái hag̃ua umi mbaʼe ijetuʼúva jaikuaáramo Ñandejára ñanentendeha? Jahechamína mbaʼépa oiko Maríare:

“Che añeñandu vaieterei kuri omano haguére che memby ha apensa iñinhústo hague la oikóva. Haʼe ningo oreko kuri 18 áño ha dos áñore olucha imbaʼasy kóntrape pórke haʼe oreko kuri kánser. Chepochy kuri Jehovándi ndojapói haguére mbaʼeve omonguera hag̃ua chupe”.

“Seis áño upe rire peteĩ che amíga kongregasionpegua ohechauka chéve cherayhu ha cheporiahuverekoha. Haʼe cherendu heta órare heʼiʼỹre mbaʼeve ha che amombeʼu chupe añanduha Jehová ndacherayhuiha. Cherendupa rire haʼe imanduʼa pe heʼívare 1 Juan 3:19, 20-pe, upépe heʼi ‘Ñandejára tuichaveha ñane korasõgui ha oikuaaha opa mbaʼe’. Che amíga heʼi avei chéve Jehová ontendeha umi mbaʼe jahasáva”.

“Upéicharõ jepe ijetuʼu kuri chéve chepochyjera hag̃ua. Upéi alee Salmo 94:19, upépe heʼi: ‘Añekevrantaitereírõ guare ha umíva chejahoʼipa, nde chekonsola ha chembopyʼaguapy’. Che añandu kuri ko téxto ojeskrivi hague chéve g̃uarãite. Amo ipahápe añeñandu porãitereíma añeʼẽvo Jehovándi che provlemakuérare pórke aikuaa haʼe cherendu ha chentendeha”.

Ajépa ñañeñandu porã jahechávo Ñandejára ñanentendeha ha ñandeporiahuverekoha. Péro, ¿mbaʼéreiko upéicharõ oĩ hetaite sufrimiénto? ¿ñandekastiga piko hína Ñandejára ñanerembiapo vai haguére? ¿mbaʼépa ojapóta Ñandejára oipeʼapa hag̃ua pe sufrimiénto? Umi artíkulo oúvape ñarrespondéta koʼã porandu.