ÑANDEJÁRA ndoipotái kuri ñande jaiko koʼág̃a jaikoháicha. Haʼe oipota kuri henyhẽ ko yvy ape ári umi persóna oñemoĩva ipoguýpe, osegíva ikonsého ha ohechaukáva avei umi kualida porã haʼe orekóva, por ehémplo oporohayhuha. Ñandejára oipota kuri entéro persóna oiko pyʼaguapýpe, ovyʼa ifamiliakuérandi, odeskuvri heta mbaʼe pyahu ha ojapo ko yvy tuichakuégui peteĩ hardín neporãva.

• “Ndaiporimoʼãvéima ni peteĩ gérra ko yvy ape ári” (Salmo 46:9).

• ‘Og̃uahẽta pe tiémpo oñehundi hag̃ua umi ohundívape ko yvy’ (Apocalipsis 11:18).

• “Ni peteĩ oikóva ko yvy ape ári ndeʼimoʼãvéima: ‘Cherasy hína’” (Isaías 33:24).

• “Umi che aiporavo vaʼekue ipyʼaite guive odisfrutáta itravahokuégui” (Isaías 65:22).

¿Mbaʼéichapa oñekumplíta koʼã profesía? Ñandejára oiporavo Itaʼýra Jesúspe ogoverna hag̃ua yvága guive ko yvy tuichakuére. Ko goviérnope la Biblia ohenói Ñandejára Rréino (Daniel 2:44). La Biblia heʼi avei Jesús rehe: “Jehová omoĩta chupe Rréiramo [...], ha Irréino ndopamoʼãi arakaʼeve” (Lucas 1:32, 33).

Jesús oĩrõ guare ko yvy ape ári ojapo vaʼekue heta milágro. Umíva ohechauka ñandéve jaiko porãitereitaha Jesús ogoverna vove ko yvy.

• Haʼe omonguera vaʼekue opaichagua mbaʼasy, péicha ohechauka ikatuha oipeʼaite umíva (Mateo 9:35).

• Okalma vaʼekue peteĩ torménta, péicha ohechauka ikatuha ipuʼaka pe naturalésare (Marcos 4:36-39).

• Omongaru vaʼekue hetápe, péicha ohechauka ikatuha omeʼẽmbaite ñandéve umi mbaʼe ñaikotevẽva (Marcos 6:41-44).

• Peteĩ kasamientohápe ojapo ýgui víno, péicha ohechauka omeʼẽtaha ñandéve ñaikotevẽva guive jadisfruta hag̃ua (Juan 2:7-11).

¿Mbaʼépa rejapo vaʼerã rehupyty hag̃ua umi mbaʼe porãite Ñandejára oprometéva umi ohayhúvape chupe? Resegi vaʼerã pe tape haʼe ohechaukáva ndéve, upéva heʼise rejapo vaʼerãha la haʼe ojeruréva. La Biblia heʼi upe tape ñandeguerahaha jeikove opaveʼỹvape ha saʼiha umi ojuhúva upe tape (Mateo 7:14).

¿Mávapa hína pe tape ñandegueraháva jeikovépe? Ñandejára heʼi: “Che hína nde Jára Jehová. Umi mbaʼe che romboʼéva ningo ideprovéchota ndéve, che rogia reho hag̃ua tape porãre” (Isaías 48:17). Jasegíramo pe tape haʼe ohechaukáva ñandéve, katuete jaiko porãvéta.

 Jesús heʼi vaʼekue: “Che hína pe tape, pe añetegua, ha pe jeikove” (Juan 14:6). Jagueroviáramo umi mbaʼe Jesús omboʼe vaʼekue ha jasegíramo iñehémplo, ñañemoag̃uivéta Ñandejárare ha oho porãta ñandéve.

¿Mbaʼéichapa ikatu retopa pe tape ñandegueraháva jeikovépe? Koʼág̃arupi oĩ heta rrelihión, péro Jesús heʼi vaʼekue: “Naentéroi heʼíva chéve: ‘Che Ruvicha, che Ruvicha’, oikéta pe Rréino yvagapeguápe. Oikéta guei, upe ojapóva che Ru yvagapegua rembipota” (Mateo 7:21). Haʼe heʼi avei: “Hembiapokuére pepilláta chupekuéra” (Mateo 7:16). La Biblia ikatu nepytyvõ reikuaa hag̃ua mbaʼéichapa añetehápe Ñandejára oipota jaadora chupe haʼe ñandeguerohory hag̃ua (Juan 17:17).

¿Mbaʼépa rejapo vaʼerã reho hag̃ua pe tape ñandeguerahávare jeikovépe? Reikuaa vaʼerã upe omeʼẽ vaʼekuépe ñandéve ñande rekove. Mávapa haʼe, mbaʼéichapa héra, mbaʼeichagua persónapa haʼe, mbaʼépa ojapo hína ha mbaʼépa oipota ñande jajapo. *

Normálmente ñande ñambaʼapo, jakaru, jajediverti ha ñaforma peteĩ família. Péro ndahaʼéi upévante la Jehová oipotáva ñandéve g̃uarã, haʼe oipota avei jaikuaa chupe ha jaiko iñamígoramo. Ñande ñaneñeʼẽrendúvo Ñandejárape jahechauka hína jahayhuha chupe. Jesús heʼi: “Umi hénte ohupyty hag̃ua jeikove opaveʼỹva, tekotevẽ ndekuaa porãve ohóvo, nde Ñandejára teete ha peteĩetévape” (Juan 17:3).

Ñambovyʼa hag̃ua Ñandejára añetegua ha peteĩetévape sapyʼánte tekotevẽta jajapo kámbio. Haʼetéramo jepe ijetuʼúva, tuicha oho porãvéta ñandéve ñañepyrũramo jaguata pe tape oporoguerahávare jeikovépe. Reikuaasevéramo oimeraẽ mbaʼe Ñandejáragui, ikatu eike ore páhinape Internétpe: www.mt1130.com/gug ha ejerure peteĩ estúdio bíblico. Umi testígo de Jehová vyʼápe ndevisitáta pe óra ha lugár opyta porãvehápe ndéve.