¡Hatã ou hikuái ha umi kavaju pysãpẽ hyapu oúvo! Apocalípsispe jatopa umi cuatro kavaju ha hiʼarigua, ha jaleévo upéva haʼete voi jahechapáva umi mbaʼe oñemombeʼúva upépe. Primeroite oaparese peteĩ kavaju morotĩ, ha pe ohóva hiʼárigui oiko ramoite rréi. Hapykuéri katu ou pe segundo kavaju pytã asýva, ha pe oúvape hiʼári oñemeʼẽ autorida oipeʼa hag̃ua pyʼaguapy ko yvy ape árigui. Upéi ou pe tercer kavaju hũ, ko kavaju arigua oreko ipópe peteĩ valánsa ha heʼi ofaltapataha hiʼupy. Ha pe cuarto kavaju katu saʼyju, ohechaukáva oĩtaha mbaʼasy ha hetave mbaʼe oporojukátava. La Muérte voi ou upe kavaju ári, ha pe Sepultúra ou hapykuerimínte, ¡ha hetaitereípe oporojuka oúvo! (Apocalipsis 6:1-8).

“Aleérõ guare umi cuatro kavaju rehegua akyhyjeterei apytávo, pórke ahechakuaa og̃uahẽmbaitemaha pe día de huísio, ha che naiméiti kuri preparáda upearã” (Crystal).

“Apocalípsispe oñemensiona umi cuatro kavaju orekóva diferénte kolór ha umi ohóvape hiʼári, ha umíva chegustaiterei vaʼekue. Antende rire mbaʼépa osignifika koʼãva, heta mbaʼe isentidove chéve” (Ed).

Ha nde, ¿mbaʼéichapa reñeñandu raʼe releérõ guare umi kavaju ha hiʼariguáre? Ko rreláto oĩva Apocalípsispe ningo ikonosidoiterei, ha tuichaiterei nepytyvõta rentendéramo mbaʼépa osignifika. ¿Mbaʼérepa jaʼe upéva? Pórke Ñandejára opromete javyʼaitereitaha jalee, ñantende ha jajapóramo umi mbaʼe oĩva upe lívrope (Apocalipsis 1:1-3).

Hetaiterei héntepe omongyhyje pe visión oñeʼẽva umi cuatro kavaju ha umi ohóvare hiʼári, péro ko rreláto noñemoĩri la Bíbliape ñanemongyhyje hag̃ua. Ko visión ningo hetaitereípema omombarete ijerovia ha omeʼẽ chupekuéra peteĩ esperánsa iporãitereíva. ¡Ha ndéve tuichaiterei nepytyvõta avei! Upévare romokyreʼỹ resegi hag̃ua relee pe ótro artíkulo.