Ñaporoperdona heʼise ñambohasánte la ótro ojapóva ñanderehe ha ndajapytái ñandepyʼaro. Eperdona jave ndeʼiséi vyroreiha la oikóva térã reñembotavynteha ndoikoiramog̃uáicha mbaʼeve.

¿MBAʼÉPA HEʼI LA BIBLIA? “Pesegíkena peñoaguanta ha peñoperdona pende pyʼaite guive, oĩramo jepe penembopochýva peteĩ mbaʼére” (Colosenses 3:13).

“Reporohayhúrõ ndereikói reñekonsentra pe persóna deféktore, síno rehechakuaa umi mbaʼe porã oñehaʼãva hína ojapo” (Aaron).

Repytárõ ndepyʼaro ikatu eju nderasy, nderevyʼavéi ha ikatu operhudika la ne matrimónio.

“Chemanduʼa che ména ojerure hague chéve perdón pórke ojapo álgo chemoñeñandu vaieterei vaʼekue. Ijetuʼueterei kuri chéve aperdona chupe péro ipahápe ajapo upéva. Koʼág̃a ambyasy naperdonái haguére chupe pyaʼeve, upéicharire saʼive rohasa asýta kuri” (Julia).

EJEPYʼAMONGETA HAG̃UA

Ne ména térã ne rembireko heʼi vove ndéve álgo nemoñeñandu vaíva eñeporandumi:

• ¿Ndaikóipa chepire pererĩeterei hína?

• ¿Ivaietereípa añete la heʼíva térã ojapóva ha ojerurémante vaʼerã chéve perdón? ¿Ndaikatúi piko ambohasánte la oikóva?

PEÑEMONGETA HAG̃UA OÑONDIVE

• ¿Mboy tiémpopa ohasa jepi ñañoperdona hag̃ua?

• ¿Mbaʼépa ikatu jajapo ñañoperdona pyaʼeve hag̃ua?

¡ETANTEAMÍNA!

• Ne ména térã ne rembireko neofendérõ, ani epensa ojapo hague a propósito.

• Eñehaʼã entende chupe ha ani nderesarái ‘enterovéva jajavyha heta vése’ (Santiago 3:2).

“Ifasilve ningo ñaperdona mokõivéva voi jajavýramo, péro ijetuʼuve haʼetérõ hína peteĩnteva la kulpávle. Ñaperdona hag̃ua tekotevẽ ñaneumílde” (Kimberly).

¿MBAʼÉPA HEʼI LA BIBLIA? “Eñehaʼã pe tapérema voi ejapo hendive peteĩ tráto” (Mateo 5:25).