1, 2. ¿Mbaʼérepa jaʼekuaa ñane situasión ojoguaha pe mitãkariaʼy situasiónpe?

 ÑAPENSAMÍNA ko ehémplore: Peteĩ mitãkariaʼy oreko ituakuéra iplataitereíva, péro peteĩ díape ituakuéra ou oñaksidenta ha omano. Ko mitãkariaʼy opyta yvýre, péro oĩve la notísia vai chupe g̃uarã. Haʼe oñentera ituakuéra hoʼupa rei hague la ipláta ha oike hague hetaiterei kuéntape. Epensamína la oikóvare ko mitãkariaʼýre, haʼe opyta ipo iñakã ári, ituakuéra oheja rangue chupe erénsia, oheja chupe hetaiterei déuda. Ha umi ideveha katu oipota ensegídama ojepaga chupekuéra. Pe mitãkariaʼy oikuaa porã ndaikatumoʼãiha ni mbaʼevéicharõ opagapa ituakuéra kuénta.

² Ikatu jaʼe ñane situasión ojoguaha avei pe mitãkariaʼy situasiónpe. Ñande tuakuéra ypykue Adán ha Eva perfékto vaʼekue, ha oiko vaʼekue peteĩ paraíso iporãitereívape (Gén. 1:27; 2:​7-9). Haʼekuéra ikatúta kuri oiko pára siémpre vyʼápe, péro upéi oiko álgo ivaietereíva. Adán ha Eva opeka ha Jehová omosẽ chupekuéra pe hardín de Edéngui. Upe guive haʼekuéra ndaikatuvéima oiko pára siémpre. ¿Mbaʼépa oheja hikuái ifamiliarépe? La Biblia heʼi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro persónape pórke enterovéva opeka” (Rom. 5:12). Adán ombohasa ñandéve pe pekádo, ha upéicha rupi ñamano. Pe pekádo ningo haʼete peteĩ déuda tuichaitereíva ni peteĩva ñande apytégui ndaikatúiva opaga (Sal. 49:8).

 3. ¿Mbaʼérepa ñande pekádo oñekompara umi déudare?

 ³ La Biblia heʼi umi pekádo ojoguaha umi déuda jarekóvape (Mat. 18:​32-35). Japeka jave haʼete japytáva jadeve Jehovápe, ha ñande japagámante vaʼerã pe kuéntare. Jehová ndojapóirire mbaʼeve ñanderehehápe, tekotevẽta kuri ñamano katuete japaga hag̃ua ñande pekadokuérare, ha hiʼarive ndaikatumoʼãvéima kuri jaikove jey (Rom. 6:​7, 23).

 4. a) ¿Mbaʼépa ndaikatumoʼãi ñakonsegi ñandejehegui reínte? (Salmo 49:​7-9). b) ¿Mbaʼépa heʼise la Bíbliape pe palávra “pekádo”? (Ehecha pe rrekuádro  “Pekádo”).

⁴ Ñandénte ndaikatumoʼãi kuri ni mbaʼevéicharõ jarrekupera jey la Adán ha Eva operde vaʼekue (elee Salmo 49:​7-9). Ñandejehegui reínte ndaikatumoʼãi kuri jareko esperánsa ñane renonderãme g̃uarã. Ha ñamanórõ, ndaikatumoʼãi kuri ñahaʼarõ jaikove jeytaha, umi animál rehe oikoháicha (Ecl. 3:19; 2 Ped. 2:12).

 5. ¿Mbaʼéichapa Jehová ñanepytyvõ japagapa hag̃ua ñande pekadokuérare? (Ehecha pe taʼanga).

⁵ Ñapensami jeýna pe mitãkariaʼy ñañeʼẽma vaʼekuére. Ñamoĩ chupe peteĩ karai ipláta hetáva ojeofrese opagapaite hag̃ua hese la odevéva. Ikatu ñañeimahina mbaʼeichaitépa pe mitãkariaʼy ovyʼáta ha oaseptáta pe rregálo porãite. Péicha avei ñande Ru Jehová omeʼẽ ñandéve peteĩ rregálo ojepagapa hag̃ua pe déuda oheja vaʼekue ñandéve Adán, haʼéva hína pe pekádo. Jesús heʼi vaʼekue pe rregálore: “Ñandejára ningo ohayhueterei umi héntepe, upévare ontrega Itaʼýra peteĩete orekóva, péicha entéro umi ohechaukáva ojeroviaha hese noñehundimoʼãi síno ikatúta oikove pára siémpre” (Juan 3:16). Avei upe rregálo ijojahaʼỹva ñanepytyvõ ikatu hag̃uáicha jareko peteĩ amista iporãva Jehovándi.

 6. ¿Mbaʼépa jahecháta ko artíkulope, ha mbaʼéichapa upéva ñanepytyvõta?

⁶ ¿Mbaʼéichapa ikatu jaaprovecha porã ko rregálo porãite ikatu hag̃uáicha oñeperdona ñande pekadokuéra? Ñakontesta hag̃ua upéva ñaanalisáta jahávo unas kuánta enseñánsa oĩva la Bíbliape ha la heʼiséva umíva. Jajepyʼamongetákena umi enseñánsare, péicha jaagradesevétantema Jehovápe la ojapo vaʼekuére ñanderehehápe.

JAIKO PORÃ JEY ÑANDEJÁRANDI

 7. a) ¿Mbaʼe situasiónpepa opyta rakaʼe Adán ha Eva opeka rire? b) Ñande haʼe rupi Adán familiare, ¿mbaʼépa ñaikotevẽ kuri? (Romanos 5:​10, 11).

⁷ Adán ha Eva opeka rupi, ndaikatuvéima oiko pára siémpre, péro ndahaʼéi upévante. Upérõ guare oiko avei chuguikuéra Ñandejára enemígo. Adán ha Eva opeka mboyve oĩ vaʼekue Ñandejára família apytépe (Luc. 3:38). Péro oúrõ guare naiñeʼẽrenduvéi chupe, haʼekuéra oñemosẽ  Ñandejára famíliagui. Upéva oiko kuri Adán ha Eva oñepyrũ mboyve ifamília (Gén. 3:​23, 24; 4:1). Upévare ñande haʼéva Adán ha Eva familiare, ndaikatúi ñaĩ Jehová família apytépe. Upéicha rupi tekotevẽmante oĩ ñanepytyvõva jaiko porã jey hag̃ua Ñandejárandi (elee Romanos 5:​10, 11). Ñaikotevẽmante kuri ajúda anivéma hag̃ua jaiko Ñandejára enemígoramo, ikatu hag̃uáicha oiko jey ñandehegui iñamígo. Opokoiterei ningo ñanderehe jaikuaávo Jehová voi ojapo hague la tekotevẽva upearã. ¿Mbaʼépa ojapo rakaʼe?

PE SAKRIFÍSIO OÑEPERDONA HAG̃UA UMI PEKÁDO

 8. ¿Mbaʼépa Jehová ojapo?

⁸ Jehová ojapo la oñekotevẽva ikatu hag̃uáicha umi umáno imperfékto oreko jey peteĩ amista hendive. Tekotevẽ ningo kuri ojerrekupera la Adán operde vaʼekue. Upearã Jehová omeʼẽ álgo hekovia, ha upéva elmimoite pe ojeperde vaʼekue. Umi Escrituras Griégaspe oĩ vaʼekue peteĩ palávra ohechaukáva mbaʼépa Jehová ojapo vaʼekue peteĩ persóna oĩ porã jey hag̃ua hendive (Rom. 3:25).

 9. ¿Mbaʼépa Jehová heʼi vaʼekue umi israelítape tekotevẽha ojapo oñeperdona hag̃ua ipekadokuéra?

⁹ Yma Jehová heʼi vaʼekue umi israelítape mbaʼe mbaʼépa ojapo vaʼerã oñeperdona hag̃ua chupekuéra ipekádo ikatu hag̃uáicha oiko porã jey hendive. Haʼekuéra káda áño ogueromanduʼa vaʼerã pe Día Oñeperdonaha umi Pekádo. Upe díape, pe súmo saserdóte osakrifika vaʼekue umi animál pe puévlo rehehápe. Péro jaikuaaháicha, umichagua sakrifísio rupive ndaikatúi vaʼekue oñeperdonambaite umi israelita pekadokuéra, pórke umi animál ndaikatúi ñakompara yvypórare. Péro Jehová oĩ vaʼekue operdona hag̃uáicha umi israelítape haʼekuéra oñarrepentíma guive ha ojapóramo umi sakrifísio haʼe ojeruréva (Heb. 10:​1-4). Umi sakrifísio ojejapóva pe Día Oñeperdonahápe umi Pekádo, ha umi sakrifísio ojejapóva jepi voi, omomanduʼa vaʼekue umi israelítape haʼekuéra pekadorha. Avei oipytyvõ chupekuéra ohechakuaa hag̃ua tekotevẽha ojejapo álgo tuichavéva oñeperdonambaite hag̃ua ipekadokuéra.

10. ¿Mbaʼépa Jehová ojapo ikatu hag̃uáicha oñeperdona yvypóra pekádo?

¹⁰ ¿Mbaʼépa ojapo vaʼekue Jehová ikatu hag̃uáicha oñeperdona entéro yvypóra pekádo? Haʼe odesidi Itaʼýra ohayhuetéva ‘oñemeʼẽtaha una vénte ogueraha hag̃ua heta héntegui ipekádo’ (Heb. 9:28). Jesús omeʼẽ vaʼekue hekove ha ‘péicha opaga pe rreskáte oguenohẽ hag̃ua heta héntepe pekádo poguýgui’ (Mat. 20:28). Upéicharõ, ¿mbaʼépa hína pe rreskáte?

PE RRESKÁTE

11. a) Ohechaukaháicha la Biblia, ¿mbaʼépa hína pe rreskáte? b) ¿Mbaʼeichagua persóna añoitépa ikatúta kuri opaga pe rreskáte?

¹¹ Ohechaukaháicha la Biblia, pe rreskáte haʼe hína pe présio ojepagáva ikatu hag̃uáicha oñeperdona ñande pekádo ha jaiko porã jey hag̃ua Ñandejárandi. a ¿Péro mbaʼépa pe présio tekotevẽva ojepaga entéro yvypóra oreko jey hag̃ua la Adán operde vaʼekue? Ñanemanduʼa vaʼerã Adán ha Eva naiñeʼẽrendúirõ guare oiko hague chuguikuéra pekadór ha operde pe oportunida oikovévo pára siémpre. Upévare, ikatu hag̃uáicha ojerrekupera jey la ojeperde vaʼekue, tekotevẽ ojepaga  el mísmo présio kómo rreskáte (1 Tim. 2:6). ¿Mávapa ikatúta kuri opaga ko présio? Sólamente peteĩ kuimbaʼe haʼéva 1) perfékto, 2) orekóva la oportunida oikovévo pára siémpre ko yvy ape ári, ha 3) oĩva osakrifika hag̃uáicha hekove umi hénte rehehápe. Peichagua persóna añoite ikatúta kuri opaga pe rreskáte ha péicha orrekupera la ojeperde vaʼekue.

12. ¿Mbaʼérepa Jesús ikatu vaʼekue opaga pe rreskáte oñekotevẽva?

¹² Jahechamína mbaʼérepa jaʼekuaa Jesús ikatu hague opaga pe rreskáte. 1) Haʼe perfékto ha “ndopekái vaʼekue” (1 Ped. 2:22). 2) Upéicha rupi haʼe ikatu vaʼekue oiko pára siémpre ko yvy ape ári, ha 3) oĩ vaʼekue dispuésto omboykévo upe oportunida ha omeʼẽ hekove ñanderehehápe (Heb. 10:​9, 10). Jesús haʼe vaʼekue peteĩ kuimbaʼe perfékto, haʼe haguéicha pe primer kuimbaʼe Adán opeka mboyve (1 Cor. 15:45). Upévare Jesús omanórõ guare ñanderehehápe, opaga kuri la oñekotevẽva ojerrekupera jey hag̃ua la Adán operde vaʼekue (Rom. 5:19). Péicha Jesúsgui oiko “pe último Adán”, upévare natekotevẽvéima ótro kuimbaʼe perfékto ou opaga pe rreskáte ojerrekupera hag̃ua la Adán operde vaʼekue. Jesús omano vaʼekue “una ves ha opa ára g̃uarã” (Heb. 7:27; 10:12).

13. ¿Mbaʼéicha rupípa ikatu ñaĩ porã jey Jehovándi?

¹³ ¿Mbaʼépa jahecháma koʼág̃a peve? Ñaanalisa ikatuha ñaĩ porã jey Jehovándi, ¿mbaʼéicha rupípa oñekonsegi upéva? Ñandejára ojapo rupi la tekotevẽva guive oñeperdona hag̃ua ñandéve ñande pekádo. Ha ikatu hag̃uáicha oiko upéva, ojepaga vaʼerã kuri pe présio oñekotevẽva. Jesús osakrifikárõ guare hekove perfékto opaga vaʼekue upe présio (Efes. 1:7; Heb. 9:14).

JAJELIVERA HA OJEʼE ÑANDEREHE ÑANDEHUSTOHA

14. ¿Mbaʼépa ñaanalisáta koʼág̃a, ha mbaʼépepa ñanepytyvõta upéva?

¹⁴ ¿Mbaʼeichaite pevépa ñanevenefisia la Jehová ojapo vaʼekue ñanderehehápe? Ñakontesta hag̃ua upe pregúnta ñaanalisáta mokõi mbaʼe omboʼéva la Biblia. Koʼã enseñánsa ojojogua lénto, ha mokõivéva ñanepytyvõ ñantendepaite hag̃ua mbaʼeichaitépa ñañevenefisia Jehová ñaneperdona haguére.

15, 16. a) Ohechaukaháicha la Biblia, ¿mbaʼépa heʼise ‘jajelivera’ hague? b) ¿Mbaʼéichapa ñañeñandu jajelivera haguére pekádo ha ñemano poguýgui?

¹⁵ La Biblia heʼi pe rreskáte ojepaga rupi jajelivera hague. Apóstol Pedro heʼi vaʼekue: “Peẽ peikuaa ndahaʼeiha umi mbaʼe oñembyaíva rupive, tahaʼe pláta térã óro rupive, peẽ pejelivera hague [griégope: “pejerreskata”] pende rekove ovaleʼỹvagui ombohasa vaʼekue peẽme pende tuakuéra ypykue. Upéva rangue peẽ pejelivera vaʼekue Cristo ruguy iporãitéva rupive, ojoguáva peteĩ ovecha raʼyrusu ruguýpe ipotĩva ha ndorekóiva mbaʼeve ivaíva” (1 Ped. 1:​18, 19, nóta).

¹⁶ Ojepaga rupi pe rreskáte, ‘jajelivera’ pe pekádo ha ñemano ñanembohasa asyetévagui (Rom. 5:21). Añetehápe ñande pyʼaite guive jaagradese Jehová ha Jesúspe ñandelivera haguére pe pekádo ha ñemanógui. Upéva ojehupyty Jesús ruguy iporãitéva rupive, oñeñohẽva omeʼẽrõ guare hekove porãite ñanderehehápe (1 Cor. 15:22).

17, 18. a) ¿Mbaʼépa heʼise ojeʼeha ñanderehe ñandehustoha? b) ¿Mbaʼépa jahupytýta ojeʼe rupi ñanderehe ñandehustoha?

¹⁷ La Biblia heʼi Jehová siervokuérare ojeʼeha ihustoha. Upéva heʼise haʼe ndojerureveimaha ñandéve japaga hag̃ua ñande pekadokuérare. Péro péva ndeʼiséi Jehová  omboykeha hína pe hustísia ha oaseptapantemaha umi pekádo. Haʼe heʼi ñanderehe ñandehustoha nañamereséiramo jepe. Jehová ñaneperdona jajerovia rupi la haʼe ha Jesús ojapo vaʼekuére omeʼẽ hag̃ua pe rreskáte (Rom. 3:24; Gál. 2:16).

¹⁸ ¿Mbaʼépa jahupyty Jehová heʼi rupi ñanderehe ñandehustoha? Por ehémplo, algúnope ojeporavo ogoverna hag̃ua yvágape Jesucrístondi, ha umívape oñehenói Ñandejára raʼy (Tito 3:7; 1 Juan 3:1). Jehová operdonáma ipekadokuéra ha opyta voi núnka ndopekairamoguáicha. Upéicha rupi oĩ hikuái Ñandejára Rréinope (Rom. 8:​1, 2, 30). Péro oĩve hína umi ojeʼévare ihustoha. Haʼekuéra ikatúta oiko pára siémpre ko yvy ape ári. Jehová operdonáma ipekadokuéra ha oiko chuguikuéra iñamígo (Sant. 2:​21-23). Pe aty guasu ohasátava Armagedón orekóta la oportunida núnka nomanóivo (Juan 11:26). ¿Ha mbaʼépa oikóta umi omano vaʼekuégui? Umi ‘ihústova ha umi iñinhústova’ ikatúta oikove jey (Hech. 24:15; Juan 5:​28, 29). Kon el tiémpo, entéro Jehová siérvo iñeʼẽrendúva oĩva ko yvy ape ári, orekóta la oportunida oikóvo chuguikuéra Ñandejára raʼy ha “oguerekóta hikuái pe liverta ijojahaʼỹva” (Rom. 8:21). ¡Hiʼãitéma ningo ñandéve og̃uahẽ pe tiémpo ikatutahápe oiko jey ñandehegui Jehová família perféktova!

19. ¿Mbaʼéicha rupípa ñane situasión okambia? (Ehecha pe rrekuádro “ Jehová ojapóva ñaneperdona hag̃ua”).

¹⁹ Siérto ningo, ñande ñaime kuri esperansaʼỹre. Jajogua kuri pe mitãkariaʼy ñañeʼẽ hague, opyta vaʼekue heta kuéntare ndaikatumoʼãiva opagapa. Péro nañaiméi ñaneaño, Jehová ñanepytyvõ. Ñane situasión okambia pórke Jehová ojapo la oñekotevẽva oñeperdona hag̃ua ñande pekádo, ha Jesús opaga pe rreskáte. Jajerovia rupi Jesucrístore, jajelivera pe pekádo ha ñemano poguýgui. Avei Jehová ñaneperdona jave, japyta voi núnka ndajajapoirõguáicha mbaʼeve ivaíva. Ha iñimportanteveha, ikatu jareko peteĩ amista iporãitereíva ñande Ru yvagapeguándi.

20. ¿Mbaʼépa jahecháta pe artíkulo oúvape?

²⁰ Ñapensávo la Jehová ha Jesús ojapo vaʼekuére ñanderehehápe, jaagradeseterei chupekuéra ñande pyʼaite guive (2 Cor. 5:15). Haʼekuéra nañanepytyvõirire, jasegíta kuri ñaime esperansaʼỹre. Upévare pe artíkulo oúvape jahecháta mbaʼérepa natekotevẽvéima ñañeñandu kulpávle Jehová ñaneperdona rire.