“Tombaʼapo pohýi ojapóvo iporãva, ikatu hag̃uáicha oguereko álgo okomparti hag̃ua pe oikotevẽvandi” (EFESIOS 4:28).

Ñande Apohare oipota jadisfruta pe traváho jajapóvagui. ¿Mbaʼérepa? Pórke ñande traváho opermiti ñandéve ñañemantene ha avei ñameʼẽ ñane famíliape oikotevẽva, ha upéva ñanembovyʼaiterei. Ñambaʼapóramo ikatúta avei jareko álgo ñaipytyvõ hag̃ua umi oikotevẽvape. Avei, ñandetravahadór ramo ñane patrón ovyʼáta ñandereheve, ha ijetuʼu léntota ñanemosẽ hag̃ua péicha péichante. Upévare voi Eclesiastés 3:13 heʼi umi mbaʼe jahupytýva ñande traváho rupive haʼeha “peteĩ rregálo oúva Ñandejáragui”.

“Ore rojerovia ore konsiénsia ipotĩha ha hiʼãiterei rojapo porã entéro mbaʼe” (HEBREOS 13:18).

Ñaneonrrádoramo ikatúta jaiko pyʼaguapýpe, ndaiporimoʼãi mbaʼeve ñatĩ hag̃ua, ha ikatúta jake ha japytuʼu porã jepe. Avei umi ótro ojeroviáta ñanderehe ha ñanderrespetáta. Péro umi naiñonrrádoiva ndaikatúi odisfruta koʼã mbaʼégui. Avei ikonsiénsia omolesta chupekuéra, ha siémpre oiko okyhyje ojepillárõ g̃uarã.

“Aníkena peiko pendeplatarayhu, upéva rangue pevyʼáma vaʼerã umi mbaʼe perekóvare” (HEBREOS 13:5).

Entéro ningo ñaikotevẽ pláta jajogua hag̃ua ñane rembiʼurã ha hetave mbaʼe. Upéicharõ jepe ñañatende vaʼerã ani hag̃ua jaju ñandeplatarayhu, pórke upéva ipeligrosoiterei. Peteĩ persóna iplatarayhúva oipuru hetaiterei tiémpo ha enerhía okonsegive hag̃ua pláta. Upéva káusare ikatu iprovléma imatrimóniope, naitiempovéi oĩ hag̃ua ifamiliakuérandi, ha operhudika isalu jepe (1 Timoteo 6:9, 10). Ha ivaiveha, peteĩ iplatarayhúva ikatu hína ou naiñonrradovéi okonsegiségui hetave mbaʼe. Peteĩ karai iñarandúva heʼi vaʼekue: “Pe persóna iñeʼẽrendúva orresivíta heta vendisión, péro pe sapyʼaitépe irrikoséva, ojapóta katuete ivaíva” (Proverbios 28:20).

“Eñehaʼãkena siémpre epensa porã la rejapó tavare ha esegi nearandu” (PROVERBIOS 3:21).

Umi mbaʼe ñaaprendéva eskuéla ha koléhiope ningo iñimportánte, pórke ñanepytyvõ ñanerresponsávle hag̃ua, ha avei ñamongakuaa porã hag̃ua ñane famíliape. Péro ndahaʼéi upéva añónte la ñaikotevẽva ikatu hag̃uáicha jaiko porã ha javyʼa. Añetehápe ñasẽ porã hag̃ua opa mbaʼépe, ñaikotevẽmante Ñandejára ñandegia. Peteĩ salmo ohechauka mbaʼépa ohupyty umi ojegiáva Ñandejára heʼívare: “Opa mbaʼe ojapóva osẽ porã chupe” (Salmo 1:1-3).