Mbaʼérepa ndopái gueteri umi mbaʼe vai

“ÑANDEJÁRA [Jehová] hekojoja opa hapépe” heʼi la Biblia (Salmo 145:17; Apocalipsis [Revelación] 15:3). Ha Moisés heʼivaʼekue Ñandejárare: ‘Hembiapokue ndaijojahái, hape hekojoja. Haʼe ijeroviaha, naiñañái, ipojoja, naipokarẽi’ (Deuteronomio 32:4). Disípulo Santiago katu heʼi: ‘Jehová niko oporombyasy ha oporoporiahuverekokuaa’ (Santiago 5:11). Upéicharõ Ñandejára ndojapói ha ndaikatúi voi ojapo mbaʼeve ivaíva.

Santiago avei heʼi: ‘Oĩramo ohasa asýva térã ojepyʼaraʼãva ojapo hag̃ua ivaíva, ani oimoʼã koʼã mbaʼe ouha Ñandejáragui. Ñandejára niko ndojepyʼaraʼãi ojapo hag̃ua ivaíva, ha ndoipyʼaraʼãi avavépe upéva ojapo hag̃ua’ (Santiago 1:13). Jehová notentái avavépe ivaívare ha nomokyreʼỹi avavépe ojapo hag̃ua ivaíva. Upéicharõ, máva káusarepa oiko umi mbaʼe vai ha jehasa asy?

Máva káusarepa oiko umi mbaʼe vai?

La Biblia ohechauka ñande káusare voi oikoha heta mbaʼe vai. ‘Oiméramo oñandúva ojaposeha ivaíva, upéva pe mbaʼe vai ipyʼapypegua. Koʼã mbaʼe vaígui osẽ pekádo ha pe pekádo okakuaámaramo ou ñemano’ (Santiago 1:​14, 15, BNP). Oĩ tapicha ojapóva ivaíva ñañágui rei. Avei ñanemanduʼavaʼerã ñagueronasemaha pekádo. Upévare jajaposeveseve ivaíva ha hapykuéri ñanderupyty heta jehasa asy (Romanos 7:​21-23). Entéro yvypórare “tembiapo vai ipuʼaka” ha upévare oĩ hetaite ojapóva ivaíva ha ombohasa asýva hapichakuérape (Romanos 5:21). Ha hiʼarive umi iñañáva omokyreʼỹ ótrope ojapo hag̃ua ivaíva avei (Proverbios 1:​10-16).

Péro Satanás hína pe omoñepyrũvaʼekue teko aña ha ikáusare oiko mbaʼe vai ko Yvy ape ári. Jesucristo ohero chupe “mbaʼepochy” térã aña ha heʼi hese haʼeha “ko múndo ruvicha” oguerekógui ipoguýpe yvyporakuéra iñañávape. Yvyporakuéra  ojapo Satanás oipotáva omboykévo Ñandejára rape porã (Mateo 6:​13, JMP; Juan 14:​30, BNP; 1 Juan 2:​15-17). ‘Ko múndo oĩmba aña poguýpe’ heʼi 1 Juan 5:19 [BNP]. Ha añetéko, Satanás ha hiʼanhelkuéra ‘ombotavy opa yvypórape’ ha ojapo ivaívante ko Yvy ape ári (Apocalipsis [Revelación] 12:​9, 12). Upéicharõ Satanás hína upe omoakãva mbaʼe vai apo.

Jahecha avei mbaʼérepa oiko hetaite mbaʼe vai Eclesiastés 9:​11-pe [NM]: ‘Maymávare ikatu oiko oimeraẽ mbaʼe’. Jesús omombeʼuvaʼekue 18 tapicha omanohague peteĩ tórre hoʼáramo guare hiʼarikuéra (Lucas 13:4). Haʼekuéra omano oĩhaguére upépe oiko jave pe mbaʼe vai. Ha koʼág̃a ikatu avei oiko upéva. Pór ehémplo, peteĩ ladríllo ikatu ojehekýi peteĩ edifísiogui ha hoʼa peteĩ tapicháre. Jaʼétapa Ñandejára ojapohague upéva? Nahániri. Avave ningo ndojaposéi upéva, ojehu reínte. Upéva oiko avei hasy jave ñande rogaygua térã omanóramo sapyʼa peteĩ túva ha opyta rei ifamiliakuéra.

Upéicharõ Ñandejára ndojapói mbaʼeve ivaíva ha nombohasaʼasýi avavépe. Haʼe ohundíta umi iñañávape ha oipeʼaitéta jehasa asy (Proverbios 2:22). Ha ojapóta hetave mbaʼe porã. La Biblia heʼi Ñandejára ombouhague Jesucrístope ‘ombyai hag̃ua pe aña rembiapokue’ (1 Juan 3:​8, BNP). Ñandejára ohundíta ko múndo henyhẽva itaryrýivagui, ndaijaʼéiva hapicháre ha hembiapo vaívagui. Ñandejára ‘omokãta ñande resay’ oipeʼávo jehasa asy (Apocalipsis [Revelación] 21:4). Péro ikatu reikuaase: “Mbaʼépa ohaʼarõ Ñandejára ojapo hag̃ua upéva? Mbaʼérepa oheja oiko koʼág̃a peve umi mbaʼe vai ha jehasa asy?”. La Biblia ohechauka mbaʼérepa omombeʼúvo oikovaʼekue Adán ha Évare.

Satanás omoñepyrũ peteĩ provléma

Jaikuaa hag̃ua mbaʼérepa Ñandejára oheja oiko ivaíva koʼág̃a peve, jahechavaʼerã peteĩ mbaʼe oikovaʼekue ojejapo ypýrõ guare yvyporakuérape. Upérõ ojeʼe peteĩ mbaʼe vai ñande Apohare rehe ha ndaikatúi ojeheja rei. Ha oñekotevẽ tiémpo oñesolusiona hag̃ua ko mbaʼe. Jahechamína mbaʼépa oikorakaʼe.

Ñandejára Jehová ojapo porãiterei pe kuimbaʼe ha kuña ypykue ha omoĩ chupekuéra peteĩ hardínpe. Ñandejára omeʼẽ chupekuéra peteĩ mbaʼe mymbakuéra ndorekóiva: ikatu odesidi hikuái mbaʼépa ojapóta (Génesis 1:28; 2:​15, 19). Haʼekuéra ikatu odesidi ojapótapa iporãva térã ivaíva: ohayhu ha iñeʼẽrendútapa Ijapoharépe, térãpa omboykéta Ñandejárape ha naiñeʼẽrendumoʼãi chupe.

Ñandejára oipota Adán ha Eva ohechauka ohayhuha Chupe ha upearã heʼi chupekuéra ndaikatuiha ojapo peteĩ mbaʼe. Haʼe heʼi Adánpe: “Ikatu reʼu opaichagua yva koʼapegua; upe yva oikuaaukáva iporã ha ivaíva katu, nahániri. Cháke reʼuha ára upéva, remanóta” (Génesis 2:​16, 17). Adán ha Eva ndoʼuivaʼerã upe yva, haʼekuéra ha itaʼyrakuéra oĩ porã hag̃ua Ñandejára renondépe. Ojapónepa ojeʼéva chupekuéra?

La Biblia omombeʼu mbaʼépa oiko. Satanás oiporu peteĩ mbói oñeʼẽ hag̃ua Évape. Haʼe heʼi chupe: ‘Añete piko Ñandejára heʼi peẽme ani hag̃ua peʼu mbaʼeveichagua yva koʼapegua?’. Eva omombeʼu mbaʼépa Ñandejára heʼi chupekuéra ha Satanás heʼi: ‘Heʼi reíko peẽme. Napemanomoʼãi. Ñandejára oikuaa porã, peʼúramo upéva upe yva pejesapeʼataha ha peikuaáta iporãva ha ivaíva’. Upévare Eva hoʼuséma pe yva ha “oipoʼo hiʼa ha hoʼu”. La Biblia heʼi: “Upéi omeʼẽ iménape ha haʼe avei hoʼu” (Génesis 3:​1-6). Adán ha Eva odesidi vai ha opeka naiñeʼẽrendúi rupi Ñandejárape.

Jahechakuaápa mbaʼére ivaiete pe oikóva? Satanás heʼi Ñandejára ijapuhague Adánpe.  Heʼi Adán ha Eva noikotevẽiha Jehováre odesidi hag̃ua iporã térã ivaíva chupekuéra g̃uarã. Satanás heʼi Jehová ndorekoiha derécho ogovernávo yvyporakuérape. Upéicha ñanemoingepaite ko provlémape. Mbaʼéichapa Ñandejára ohechaukáta haʼe ñanegovernavaʼerãha? Mbaʼéichapa Ñandejára omyesakãta ko mbaʼe?

Oñehaʼarõvaʼerã ojekuaa hag̃ua

Jehová ikatuvaʼekue ohundi Satanás, Adán ha Évape. Ñandejára ningo tuicha imbareteve chuguikuéra. Péro Satanás ndeʼíri voi Ñandejára naimbareteiha. Haʼe heʼi Jehová ndorekoiha derécho oporogoverna hag̃ua. Ha koʼápe jaikepaite, umi anhelkuéra ha ñande yvypóra avei. Enterovépe ojehechaukavaʼerã ko mbaʼe: jaiporavo porã hag̃ua tekotevẽ ñamombaʼe Ñandejára heʼíva. Haʼe ningo ohechauka mbaʼéichapa jaiko ha jaadoravaʼerã chupe. Ndajajapóiramo upéva ñasẽ vaíta katuete. Pór ehémplo, jaikuaa opa mbaʼe hoʼaha yvy gotyo, upévare ndaikatumoʼãi japo peteĩ edifísio ijyvatévagui ha ñaimoʼã ndojehumoʼãiha ñandéve mbaʼeve (Gálatas 6:​7, 8). Ñandejára oheja rupi ohasa tiémpo, enterove ikatúta jahecha mbaʼéichapa osẽ vai umi omboykéva chupe. Upearã oñehaʼarõvaʼerã.

Ñantende porãve hag̃ua mbaʼérepa tekotevẽ ohasa tiémpo ñapensami ko mbaʼére: ñamoĩ chupe peteĩ karai heʼiha ótrope ohaʼã hag̃ua hikuái mávapa imbareteve. Upéva ikatu sapyʼaitépe ojekuaa. Ikatu ojehechauka mávapa imbareteve ohaʼãramo mávapa ohupi ita ipohyivéva. Imbaretevéta ohupíva pe ita ipohyivéva. Péro mbaʼéichapa ojehechaukáne mávapa ohayhuve ifamíliape ha mávape ifamília ohayhuve? Térã mbaʼéichapa ojehechaukáta mávapa otrata porãve ifamíliape? Ojehechauka hag̃ua ko mbaʼe natekotevẽi ojehecha mávapa imbareteve térã oñeʼẽkuaave. Oñekotevẽ tiémpo ojehecha hag̃ua mbaʼe mbaʼépa ojapo umi mokõi túva ha upéi ojedesidi mávapa imbaʼeporãve.

Mbaʼe mbaʼépa ojehechaukáma?

Ojapóma seis mil áño Satanás heʼihague Ñandejára ndorekoiha derécho ñanegoverna hag̃ua. Mbaʼépa ohechauka umi mbaʼe oikóva upe guive? Jaikuaa hag̃ua upéva jahechami mokõi mbaʼe Satanás heʼivaʼekue Ñandejárare. Haʼe heʼi Évape: “Heʼi reíko peẽme. Napemanomoʼãi” (Génesis 3:4). Heʼívo Adán ha Eva nomanomoʼãiha hoʼúvo upe yva, Satanás heʼi Jehová ijapuha. Ivaietépa upéva! Oiméramo Ñandejára ijapu ko mbaʼépe, mbaʼéicha piko ikatúta jajeroviave hese? Mbaʼépa ohechauka umi mbaʼe oikóva upe guive?

Adán ha Eva ou hasy, ituja ha ig̃uaig̃ui ha upéi omano. La Biblia heʼi: “Adán oikove rire 930 áño omano” (Génesis 3:19; 5:5). Ha Adán rupive upéva ñanderupyty opavavépe (Romanos 5:12). Upéicharõ jahecha porã Satanás ‘ijapuhague ha japu ru voi haʼe’. Jehová katu ‘Ñandejára añetete’ (Juan 8:​44, BNP; Salmo 31:5).

Satanás heʼi avei Évape: ‘Ñandejára oikuaa porã, peʼúramo upe yva pejesapeʼataha ha peikuaáta iporãva ha ivaíva’ (Génesis 3:5). Péicha Satanás ombotavy Évape heʼívo yvyporakuéra ikatuha oiko iñakãre. Péro Ñandejára nañandeapói ñañegoverna hag̃ua. Avei ko tekove japu heʼi jaiko porãvetaha ñamboykéramo Ñandejárape. Añete piko upéva?

Ymaite guive heta mburuvicha ha goviérno ojupi ha okúi. Yvyporakuéra omoĩma opaichagua goviérno jahecha mávapa iporãve. Péro mbaʼe vaímante ogueru upéva yvyporakuérape. Ojapóma tres mil áño rupi la Bíbliape ojehaihague ‘yvypóra ojapoha  ivaíva hapicháre’ (Eclesiastés 8:9). Proféta Jeremías katu heʼi: “Aikuaa yvypóra ndahaʼeiha hekove jára, ndoikuaaiha mbaʼépa oikóta chugui” (Jeremías 10:23). Koʼápe heʼíva añete, jepe umi sientífiko ha kuimbaʼe katupyry oikuaa heta mbaʼe ha ojapóma hetaite mbaʼe pyahu. Upéicharõ umi mbaʼe oikóvare jahecha añeteha la Biblia heʼíva.

Mbaʼépa nde rejapóta?

Ñandejára ohaʼarõ rupi ojehechauka Satanás ijapuhague heʼívo Haʼe ndorekoiha derécho ñanegovernávo. Ñandejára Jehová hína Mburuvicha Guasu yvága ha Yvýpe. Haʼe oreko derécho ogovernávo opa hembiapokue ha upéva iporãve oimeraẽ goviérnogui. Oikuaágui ko mbaʼe, umi ánhel oĩva ymaite guive Ñandejára poguýpe heʼi: ‘Nde, Jehová ore Jára, ndéve ija reñemombaʼeguasúvo, remimbipávo ha ndepuʼakapávo, nde haʼégui opa mbaʼe apohare, nde reipota rupínte oikovaʼekue’ (Apocalipsis [Revelación] 4:11].

Mbaʼépa nde repensa? Reipotápa Ñandejárape ñande Mburuvicháramo? Ndépa ere Jehová ñanegovernavaʼerãha? Upéicharõ rehechaukavaʼerã reñemoĩha ipoguýpe. Ha rejapóta upéva restudiáramo la Biblia heʼíva ha reñehaʼã reiko upépe heʼiháicha. ‘Ñandejára niko mborayhu’ ha omeʼẽ ñandéve iléi ñanderayhúgui (1 Juan 4:8). Jehová ndojokomoʼãi ñandehegui mbaʼeve iporãtava ñandéve g̃uarã. Upévare jajapókena la Biblia heʼíva: ‘Ejerovia Jehováre ndepyʼaite guive, ha ani ndejehe añónte. Haʼe omyesakãta ndéve nde rape’ (Proverbios 3:​5, 6).

[Nóta oĩva taʼanga ndive páhina 7]

Nde ikatu reñemoĩ Ñandejára poguýpe restudiáramo la Biblia ha rejapo heʼíva

[Roagradese oĩva páhina 4-pe]

© Jeroen Oerlemans/Panos Pictures