Ndépa rehupytyse jey nde priviléhio?

NDÉPA reservímava de prekursór, ansiáno, térã siérvo ministeriál? Katuete revyʼanerakaʼe rembaʼapo tiémpope upéicha kongregasiónpe. Péro upéi eperde upe priviléhio.

Ikatu oime reheja nde edáma rupi, nderasykatúgui térã reñangareko hag̃ua peteĩ ne hénte oikotevẽvare. Oiméramo oikóraʼe nderehe upéicha, ndeʼiseihína nanepohãveimaha (1 Tim. 5:8). Yma síglo primérope, Felipe misionéro vaʼekue sapyʼami. Péro upéi opyta oiko Cesaréape oñangareko hag̃ua ifamíliare (Hech. 21:​8, 9). Rréi David katu itujámarõ guare omoĩ itaʼýra Salomónpe opa mbaʼe oikotevẽtava oisãmbyhy hag̃ua hekovia (1 Rey. 1:​1, 32-35). Upéicharõ jepe, Jehová osegi ohayhu Felipe ha Davídpe. Ha koʼág̃a peve enterove ñamombaʼe umi mokõi Jehová rembiguáipe.

Ikatu ningo umi ansiáno ojerure ndéve reheja hag̃ua nde priviléhio. Upéva ikatu ojapo hikuái rejapo rupi ivaíva térã oĩ rupi provléma nde rogapýpe (1 Tim. 3:​2, 4, 10, 12). Ha ndéve g̃uarã ikatu oĩ vai kuri umi ansiáno odesidíva ha ndepochy gueteri koʼág̃a peve.

Ikatu rehupyty jey nde priviléhio

Ikatúnepa oiko jey ndehegui prekursór, ansiáno térã siérvo ministeriál? Ikatu jey vaʼerã ningo. Péro reñehaʼãmbaitevaʼerã (1 Tim. 3:1). Ha mbaʼérepa rejapovaʼerã upéva? Nemanduʼágui mbaʼérepa reñemeʼẽvaʼekue Jehovápe: rehayhúgui chupe ha ermanokuérape. Koʼã mbaʼére reñehaʼãramo rehupyty jey nde priviléhio, Jehová ndejokuái jeýne reipytyvõ hag̃ua kongregasiónpe. Haʼe ohecha katupyrýpe rejapo hague ne rembiapo ha mbaʼépa rehasa reperde rire nde priviléhio.

Nemanduʼavaʼerã umi Israelgua operde rire ipriviléhio, Jehová heʼi hague chupekuéra: ‘Che Jehová, nakambiái. Ha peẽ Jacob ñemoñare napeñehundíri’ (Mal. 3:6). Jehová osegi ohayhu ha ojokuái umi Israelguápe. Upéichata avei nendive reperde rire nde priviléhio. Péro mbaʼépa nde ikatu rejapo koʼág̃a rupi? Nemanduʼákena ñande jerovia mbarete vaʼerãha jaservi porã hag̃ua Ñandejárape, ha ndahaʼéi ñandekatupyrýnteva. Upévare, koʼág̃a reaprovechavaʼerã remombareteve hag̃ua nde jerovia Jehováre.

Remombareteve hag̃ua nde jerovia, ‘eheka Jehovápe ha ejerure chupe ipuʼaka’ (Sal. 105:​4, ÑÑB; 1 Cor. 16:13). Upearã reñemboʼékena chupe ne ñeʼã mbytete guive. Reñeʼẽ jave Jehovápe ne situasiónre, ere porã chupe mbaʼéichapa reñeñandu ha ejerure chupe ijespíritu sánto. Upéicharõ reñandúta Jehová oĩha nde ykére ha akóinte rejeroviáta hese (Sal. 62:8; Fili. 4:​6, 13). Emombareteve hag̃ua nde jerovia rehesaʼỹijovaʼerã Ñandejára Ñeʼẽ. Koʼág̃a ningo saʼivéma ne rembiapo kongregasiónpe, ha ikatu hína reaprovecha restudia hag̃ua la Biblia ñeaño ha ne família ndive. Oiméramo nanetiempovéiraʼe rejapo hag̃ua koʼã mbaʼe, opyta porãta ndéve rejapo hag̃ua koʼág̃a.

Nde Jehová rrepreséntante hína koʼág̃a peve, nde ningo itestígo (Isa. 43:​10-12). Nde ‘remoirũreína Ñandejárape hembiapópe’ ha upéva ningo tuichaiterei mbaʼe (1 Cor. 3:​9,  BNP). Upévare, resẽ meméramo predikasiónpe remombaretevéta nde jerovia ha umi nemoirũvape.

Mbaʼépa ikatu rejapo ani hag̃ua nekangy

Eperde rire nde priviléhio ikatu repyta retĩ térã nderevyʼavéi. Térã ikatu ere ndaivaietereíri hague la rejapovaʼekue. Ikatu avei ndepyʼaro umi ansiánore oñeʼẽ rire nendive, heʼi haguére ndéve rehejavaʼerãha nde priviléhio. Péro upéicha rejapóramo ijetuʼuvéta ndéve rehupyty jey hag̃ua nde priviléhio. Ha hasyvéta avei reaprende anivéma hag̃ua oiko nderehe upéicha. Jahechamína mbaʼéichapa ikatu nepytyvõ Job, Manasés ha José ohasavaʼekue.

Job ningo oñemboʼemivaʼekue Jehovápe hapichakuéra rehehápe, haʼe avei ansiáno ha hués (Job 1:5; 29:​7-17, 21-25). Péro upéi operdepaite la orekomíva, hasy vai ha omanomba chugui ifamiliakuéra. Ha ojeʼe avei hese heta mbaʼe vai. Job ningo heʼi voi: “Opuka cherehe umi chehegui imitãvéva” (Job 30:1).

Job heʼi ijehe ndojapói hague mbaʼeve ivaíva, Ñandejárape voi heʼi hekopotĩha (Job 13:15). Upéicharõ jepe, haʼe ohejánte Jehová pópe oikóva hese, ha mediánte upéva osẽ porã. Ha ohechakuaa avei tekotevẽ hague ojekorrehi chupe heta mbaʼe heʼivaʼekuére ohasa asýrõ guare (Job 40:​6-8; 42:​3, 6). Job iñumílde rupi ohupyty jey umi mbaʼe operdevaʼekue ha hetave mbaʼe porã (Job 42:​10-13).

Ikatu avei reperderakaʼe nde priviléhio rejapo haguére peteĩ mbaʼe vai. Péro koʼág̃a ikatu repensa Jehová ha ermanokuérapa neperdonáne ha hesaráinepa hikuái upe oikovaʼekuégui. Nemanduʼamínte koʼág̃a rréi Manasés ohasavaʼekuére. Haʼe ningo ‘omboheta hetave hembiapo vai Jehová renondépe, ha ombopochyeterei chupe’ (2 Rey. 21:​6, ÑÑB). Péro la Biblia omombeʼu Manasés omanórõ guare, Ñandejára heʼi hague hese haʼeha peteĩ rréi iñeʼẽrendúva. Mbaʼérepa heʼi hese upéicha?

Pórke amo ipahápe Manasés ohendu la ojeʼéva chupe. Ñepyrũrã ningo haʼe ndojapoivaʼekue Jehová heʼíva. Upévare omondo chupe umi Asiriaygua, ha haʼekuéra oenkadena Manaséspe ha ogueraha chupe Babilóniape. Péro upépe oĩ riréma, Manasés “oñemboʼe Ñandejára Jehovápe ha oñemomirĩ ituvakuéra ypykue Jára renondépe. Ha osegi oñemboʼe’. Péicha ningo ko rréi ojevy hape vaígui ha ojapo iporãva. Upévare Jehová operdona chupe (2 Cró. 33:​12, 13).

Peteĩ ermáno operdepavaʼekue ipriviléhio ningo hasy nunga ohupytypa jey hag̃ua una véspe. Peteĩteĩ ikatu ohupyty jey ohóvo. Upévare nde rehejavaʼerã ndejokuái hikuái kongregasiónpe ha rejapo porã ne rembiapo. Upéicharõ katuete oñemeʼẽvéta ohóvo ndéve ne rembiaporã. Jaikuaa ningo ijetuʼutaha, péro reñehaʼãmbaitéramo ha resegi upéicha, resẽ porãta katuete.

Jahechamína koʼág̃a Jacob raʼy José rehe oikovaʼekue. Haʼe orekórõ guare 17 áño,  iñermanokuéra ovende chupe tembiguáiramo (Gén. 37:​2, 26-28). Oimevaʼerãngo haʼe nohaʼarõiraʼe iñermanokuéra ojapo hese upéicha. Upéicharõ jepe, haʼe osegi ojapo iporãva, ha Jehová ovendesi rupi chupe oñemoĩ opa mbaʼe ipoguýpe ‘ijára rógape’ (Gén. 39:2). Upe rire, Josépe ojegueraha kárselpe, péro osegi ojapo Jehová heʼíva. Upévare Jehová akóinte oguerohory chupe. Ha upéi kárselpe avei oñemoĩ ipoguýpe heta mbaʼe (Gén. 39:​21-23).

José ningo ndoikuaaivaʼekue maʼerãpa hetaitéma ohasa asy. Upéicharõ jepe haʼe ojapo porã hembiapo. Upévare Jehová oheja ifamiliarégui ou pe Ñemoñare (Gén. 3:15; 45:​5-8). Ñande ndajajapomoʼãiramo jepe José rembiapoichagua, ohechauka ñandéve Jehováha pe omeʼẽva umi priviléhio isiervokuérape. Upévare José ojapo haguéicha, akóinte jahejavaʼerã Ñandejára tañandejokuái.

Ñaaprendékena umi mbaʼe jahasávagui

Job, Manasés ha José ohasa heta mbaʼe vaíre. Péro mbohapyvéva ombohovái porãnte umi mbaʼe oikovaʼekue hesekuéra ha upéicha oaprende hikuái heta mbaʼe porã. Ha mbaʼépa nde ikatu reaprende umi mbaʼe rehasávagui?

Eñehaʼã ehechakuaa mbaʼépa nemboʼese Jehová. Job ohasa asyetérõ guare opensaiterei ijehénte ha ndohechakuaavéima mbaʼépa iñimportanteve. Upéicharõ jepe, Jehová oipytyvõ chupe mborayhúpe ha oguata jey tape porãre. Upévare Job heʼi: ‘Añeʼẽrei aikóvoraʼe ndaikuaáigui rei’ (Job 42:3). Nde reñeñanduvaíramo reikóvo reperde haguére nde priviléhio, ani reiko repensaiterei ndejehénte, eiko uvei akãguapýpe (Rom. 12:3). Ha ndereikuaaporãiramo jepe mbaʼérepa oiko nderehe péicha, oiméne Jehová nepytyvõsehína rejapo porãve hag̃ua hembipota.

Ehendúkena ojeʼéva ndéve. Ñepyrũrã ningo oiméne Manaséspe ndogustáiraʼe ojekorrehi chupe. Upéicharõ jepe, ohendu ojeʼéva chupe, oñembyasy ha oheja hembiapo vai. Upévare, ndéve nandegustáiramo jepe oikovahína nderehe, ‘eñemomirĩkena Ñandejára renondépe ha haʼe nemopuʼãta’ (1 Ped. 5:6; Sant. 4:10).

Ehaʼarõkuaákena ha ani ndepyʼaro (Gén. 50:​15-21). José ningo heta mbaʼe vai ohasavaʼekue, upévare ikatúkuri ipyʼaro ha ojedeskitase hapichakuérare. Péro haʼe imbaʼerechakuaa ha oporoporiahuvereko (Gén. 50:​15-21). Ha oiméramo rembyasyeterei pe oikóva nderehe, ani rejapura ni ndepyʼaro ha ehejánte Jehovápe tanepytyvõ.

Ndépa erekorakaʼe peteĩ priviléhio kongregasiónpe? Upéicharõ ehejántekena Jehová tomeʼẽ jey ndéve ambue mbaʼe rejapovaʼerã. Emombarete nde jerovia, ehaʼarõkuaa, eñemomirĩ ha ani ndepyʼaro. Ejapókena oimeraẽ mbaʼe ojeʼéva ndéve rejapo hag̃ua. Ha ani nderesarái ‘Jehová ohovasaha mayma hekoporãvape’ (Sal. 84:11).

[Komentário oĩva páhina 30-pe]

Eñemboʼékena ne ñeʼã mbytete guive remombarete hag̃ua nde jerovia

[Nóta oĩva taʼanga ndive páhina 31]

Ñasẽ meméramo japredika ikatúta ñamombarete ñande jerovia

[Nóta oĩva taʼanga ndive páhina 32]

Ehejántekena Jehová tomeʼẽ jey ndéve ambue mbaʼe rejapovaʼerã