APÓSTOL Pablo ohai: “Ñandejára Ñeʼẽ oikove ha ipoderosoiterei” (Heb. 4:12, NM). ¿Mbaʼépa heʼiséraʼe? La Biblia omboʼéva ikatuha opoko umi hénte korasõre ha omomýi chupekuéra okambia hag̃ua.

Péro ojeʼéma haguéicha oikotaha, umi apóstol omano rire oñepyrũ pe apostasía umi kristiáno apytépe ha omyesakã hikuái ambue hendáicha ko téystope heʼíva (2 Ped. 2:1-3). Tiémpo rire, umi paʼi oñepyrũma heʼi la Biblia orekoha podér máhiko. Omombeʼúvo “umi téysto oĩva la Bíbliape ojeporuha mahiarã”, profesór Harry Y. Gamble heʼi síglo 3-pe, Orígenes (peteĩ paʼi) ontendekaha “oñehendu hague jepe umi ñeʼẽ imarangatúva ojapo porãmaha ñanderehe; ha umi ñeʼẽ ojeporúva mahiarã ipoderósoramo, heʼi koʼýte ipoderosotaha Ñandejára Ñeʼẽ”. Profesór Gamble omombeʼu avei síglo 4 opakuévo Juan Crisóstomo heʼi hague oĩha amulétoicha omosãingóva ijajúrare umi téysto oñeʼẽva Jesús rekovekuére, ha omoĩ hendive ko fráse Juan Crisóstomo ohaivaʼekue: “Pe demónio noñembojamoʼãi asy peteĩ óga oĩháme Ñandejára Ñeʼẽ”. Omombeʼu avei pe teólogo katóliko Agustín de Hipona heʼi hague “ndaivairiha umi hénte iñakã rasy jave omoĩ iñakã guýpe pe lívro de Juan oke hag̃ua, ombohasa hag̃ua chugui pe akãrasy”. Jahechaháicha, umi héntepe g̃uarã ndaivaíri oiporu la Biblia agueriarã. Péro ivaietereíta ajépa jahecha la Biblia peteĩ kurundúramo.

Koʼág̃a rupi, peteĩ aguería (superstición) ojegueroviavéva haʼe pe bibliomancia. Upéva heʼise jaavri peteĩ lívro térã la Biblia ha jalee pe téysto jahecha raẽvéva, ha upépe jajuhutaha umi konsého ñaikotevẽva. Pór ehémplo, profesór Gamble omombeʼu Agustín de Hipona ohendu hague peteĩ árape peteĩ mitã heʼíva: “Ejagarra ha elee, ejagarra ha elee”. Haʼe oimoʼã pe mitã rupive Ñandejára heʼiha chupe oavri hag̃ua la Biblia ha olee pe kapítulo ojuhu raẽvéva.

Oiméne nde reikuaa oĩha tapicha ohasávo peteĩ mbaʼe ijetuʼúva oñemboʼeha Ñandejárape ha upéi oavri la Biblia peteĩ hendápe ha olee pe versíkulo ohecha raẽva, oimoʼãgui upéva oipytyvõtaha chupe ogueropuʼaka hag̃ua upe situasión. Ndaivaíriramo jepe osolusionase iprovléma, peteĩ kristiáno ndojapoivaʼerã upéicha oipotáramo la Biblia oisãmbyhy chupe.

Jesús oprometevaʼekue hemimboʼekuérape omboutaha peteĩ “ajudánte, pe espíritu sánto” ha heʼi: “Upéva penemboʼéta opa mbaʼe ha penemomanduʼáta opaite mbaʼe haʼevaʼekue peẽme” (Juan 14:26, NM). Upearã ningo tekotevẽ oikuaa porã hikuái la Biblia heʼíva, ha umi opraktikáva pe bibliomancia ndoikuaaiete upéva.

Añetehápe hetaiterei oĩ oiporúva la Biblia ojapo hag̃ua pe bibliomancia ha ambue mbaʼe upeichagua, péro Ñandejára Ñeʼẽ, la Biblia oproivi peteĩ kristiáno oho espiritísta rendápe térã ohaʼarõ umi aguería ohechauka chupe haperã (Lev. 19:26; Deut. 18:9-12; Hech. 19:19). Jaikuaa ningo “Ñandejára Ñeʼẽ oikove ha ipoderosoitereiha”, péro jaiporuvaʼerã hekopete. La Biblia omboʼéva ningo pe oipytyvõva heta tapichápe okambia hag̃ua, ndahaʼeiete umi aguería rei térã bibliomancia. Umi konsého oĩva pype hetápema oipytyvõ hekoporã hag̃ua, oheja hag̃ua hembiapo vai, ojoayhuve hag̃ua hogapýpe ha oñemoag̃uive hag̃ua Ñandejárare.