Oñeporandúva jepi

Oipotápa Ñandejára peteĩ kuimbaʼe hembireko heta?

Nahániri. Ñandejára omomendárõ guare Adán ha Évape oipotavaʼekue Adán peteĩnte hembireko. Tiémpo rire, Jesús heʼi avei hemimboʼekuérape osegivaʼerãha upéva (Génesis 2:​18-24; Mateo 19:​4-6).

Upéicharõ, mbaʼére piko Ñandejára oheja Abrahán, Jacob, David ha Salomón hembireko heta? Ñambohovái hag̃ua upéva, jahechami la Biblia heʼíva ko mbaʼére. Pór ehémplo, Abrahán ha Jacob tuicha iprovléma hogapýpe hembireko heta haguére (Génesis 16:​1-4; 29:18–30:24). Ñapensamína avei oikovaʼekue Salomónre. Haʼe ningo naiñeʼẽrenduivaʼekue Jehovápe ha ndojapói iléi heʼíva: “Ani hembireko heta pende ruvicha guasu, cháke umíva omombíane chupe Ñandejára rapégui” (Deuteronomio 17:​15, 17). La Biblia heʼi Salomón hembireko hague 700 voi. Ha koʼãva mbeguekatúpe omomombyry hague chupe Jehovágui (1 Reyes 11:​1-4). Koʼã ehémplo ohechauka la Biblia noñeʼẽporãiha ko mbaʼére.

Péro mbaʼére piko upéicharõ Ñandejára ohejavaʼekue isiervokuéra hembireko heta? Ñantende hag̃ua ñapensami ko ehémplore: ñamoĩ chupe jaguerekoha ñande rógape peteĩ mesa, itujáramo jepe ideprovécho gueteri ñandéve ha upévare nañakambiái. Péicha avei opensa Ñandejára. Oheja umi kuimbaʼe Israelgua hembireko heta peteĩ tiémpore okumpli hag̃ua hembipota. Ha ñanemanduʼavaʼerã haʼe iñarandueteveha ñandehegui ha ndojapomoʼãiha mbaʼeve oikuaaporãʼỹre. Upévare jajeroviakuaa opa mbaʼe ojapóva ou porãtaha ñandéve, jepe nañantendeporãi (Isaías 55:​8, 9). Péro jahechamína mbaʼéichapa Ñandejára okumpli hembipota.

Jehová ningo oprometevaʼekue hardín de Edénpe Satanás rundiharã opuʼãtaha peteĩ ‘ñemoñarégui’. Tiémpo rire heʼi Abrahánpe chugui outaha peteĩ tetã tuicháva ha upégui osẽtaha pe ñemoñare oñeprometéva (Génesis 3:15; 22:18). Satanás oikuaa Israélgui osẽtaha pe “ñemoñare”, ha upévare ojapo ikatúva guive ohundi hag̃ua upe tetã. Haʼe omboliga meme vaʼekue chupekuéra ojapo hag̃ua ivaíva, oikuaágui upéicha Ñandejára noñangarekomoʼãveimaha hesekuéra.

Upévare Jehová pyʼỹi omondo profetakuérape oipytyvõ hag̃ua umi Israelguápe ha oñatõi hag̃ua chupekuéra ojavy jave, oikuaáramo jepe nokumpliporãmoʼãiha hikuái iléi heʼíva. Pór ehémplo haʼekuéra nomombaʼeguasuivaʼerã mbaʼeveichagua taʼanga, péro nopenái upévare (Éxodo 32:9). Ñapensamíntena, umi léi iñimportantevéva jepe ijetuʼu chupekuéra ojapo hag̃ua, ha piko mbaʼéicha ikatúta oropuʼaka hikuái peteĩ léi heʼíva ndovaleiha peteĩ kuimbaʼe hembireko heta? Jehová ningo oikuaa porã mbaʼépa ostira yvyporakuérape ha mbaʼépa hemiandu. Avei oikuaa upe tiémpope umi kuimbaʼe ojepokuaaha hembireko heta, ha Satanás ojevaletaha upévare oity pyaʼeve hag̃ua chupekuéra. Opa umívare ohecha iporãveha ohaʼarõmiénte oproivi hag̃ua upéva.

Ñandejára ohejavaʼekue umi kuimbaʼe hembireko heta ikatu hag̃uáicha Israel okakuaa pyaʼeve, ha oiko hag̃ua chuguikuéra peteĩ tetã tuicháva. Péicha oĩta gueteri hikuái Mesías ou peve. Avei ohejávo umi kuimbaʼe hembireko heta, umi kuñanguéra orekóta opa mbaʼe oikotevẽva ha oñeñangarekóta hesekuéra ivai jave la pórte.

Jahechakuaa upéicharõ Ñandejára ndeʼíri hague peteĩ kuimbaʼe hembireko hetavaʼerãha. Ha ohejáramo jepe ojeiko péicha heta tiémpore, iléi heʼi umi kuimbaʼe otrata porã vaʼerãha hembirekokuérape (Éxodo 21:​10, 11; Deuteronomio 21:​15-17). Upe rire Jesús heʼi hemimboʼekuérape Ñandejára ndoipotaiha peteĩ kuimbaʼe hembireko heta (Marcos 10:8). Upéicharõ jaʼekuaa pe léi Jehová omeʼẽvaʼekue Moiséspe oipytyvõ hague upe tiémpope, péro “Cristo léi” mombyry ohasa chupe (Gálatas 6:2).