Koʼẽrõitéma opáta mbaʼe vai apoha

JAHECHÁMA haguéicha pe ótro artíkulope, Ñandejára omyesakãma la Biblia rupive mbaʼérepa la hénte ojapo mbaʼe vai. Haʼe ñandeapovaʼekue avei ikatu hag̃uáicha jaiporavokuaa ñandejehegui mbaʼépa jajapóta ha jajejokokuaa hag̃ua, upéicharõ ñanderehéma odepende jajapótapa ivaíva (Deuteronomio 30:15, 16, 19). Jareko voi opa mbaʼe ñaikotevẽva jahechakuaa hag̃ua mbaʼépepa ñakambiavaʼerã. Ha upéicha jajapóramo javyʼáta ñande ha umi oĩva ñanendive (Salmo 1:1).

Péro ñañehaʼãvéramo jepe jajapo iporãva, ndaikatumoʼãi jajoko umi mbaʼe vai yvyporakuéra ojapóva. La Bíbliape heʼi voi: ‘Pe ára pahápe ijetuʼuetereíta ha heta ojehasa asýta’. Ha upe rire omyesakã mbaʼérepa upéichata, heʼívo: ‘La hénte opensáta ijehénte, ipláta rayhu, oñemombaʼeguasu ha ijejapóta. Opuʼãta Ñandejárare, naiñeʼẽrendumoʼãi isy ha itúvape, naimbaʼerechakuaamoʼãi, opyrũta iñeʼẽre, ndohayhumoʼãi avavépe, noñontendemoʼãi avavéndi, oñeʼẽreíta hapicháre, ndojejokokuaamoʼãi, ipyʼahatãta  ha nomombaʼemoʼãi pe mbaʼe porã, itraisionérota, hovaʼatãta, oñembotuicha ha omombaʼevéta umi vyʼarã omombaʼerangue Ñandejárape. Oikóta hikuái hekomarangatúvaramo, péro opa mbaʼe ojapóvare ohechaukáta ijapuha. Ha aníke rejeheʼa umichaguáre’ (2 Timoteo 3:1-5).

Jaʼévo peteĩ mbaʼe oĩha ‘ára pahápe’, jaʼeñaína upéva og̃uahẽmaha ohóvo huʼãme. Péro, mbaʼépa umi mbaʼe opa potámava? Koʼág̃a jahecháta mbaʼe mbaʼépa Ñandejára opromete ñandéve.

Oñehundietéta umi iñañávape.

‘Koʼẽrõitéma opáta umi iñañáva, remañáta pe oĩ haguépe ha nderetopamoʼãvéima hese. Péro umi ipyʼaporãvape oñemeʼẽta ko yvy, ha oikóta hikuái pyʼaguapýpe.’ (SALMO 37:10, 11)

‘Jehová oñangareko umi ohayhúvare chupe, péro umi iñañávape katu haʼe ohundíta.’ (SALMO 145:20)

Ndaiporimoʼãvéima oporombohasa asýva.

‘Haʼe onohẽta imboriahúvape jejopy vaígui, avei umi ojerure asývape chupe ha umi oikotevẽvape katu oipytyvõta. Oguenohẽta avei chupekuéra jejopy vaígui ha umi iñañáva poguýgui.’ (SALMO 72:12, 14)

‘Yvyporakuéra ojeíta pekádo poguýgui ha oikóta chuguikuéra Ñandejára raʼy.’ (ROMANOS 8:21)

Enterove orekóta hemikotevẽ.

‘Kyhyjeʼỹme opárupi ojeikóta, enterove ikatúta opytuʼu iparrál ha hiʼigomáta guýpe.’ (MIQUEAS 4:4)

‘Opavave ojogapóta ha oikóta hóga teépe, oñotỹta parrál ha hoʼúta hiʼa. Ndaiporimoʼãvéima ojogapóva ha ambue ou oiko pype térã oñemitỹva ha ambue ou hoʼu chugui. Ku yvyramáta oikove pukuháicha che siervokuéra oikove pukúta, ha umi che rembiporavo oaprovecha porãta hembiapokue.’ (ISAÍAS 65:21, 22)

Ojeikóta tekojojápe ko yvy ape ári.

‘Ñandejára piko nomoĩmoʼãi hustísia umi hembiguái haʼe oiporavovaʼekuépe, oñemboʼevahína chupe ára ha pyhare? Añete haʼe peẽme, Haʼe pyaʼeterei ojapóta upéva.’ (LUCAS 18:7, 8)

‘Jehová ningo ohayhu tekojoja. Haʼe ndohejareimoʼãi umi hese ojeroviávape, ha opa árare oñangarekóta hesekuéra.’ (SALMO 37:28)

‘Yvyporakuérape oñehekomboʼe mbaʼéichapa oikovaʼerã tekojojápe.’ (ISAÍAS 26:9)

‘Haʼe opromete ñandéve omoĩtaha yvága pyahu ha yvy pyahu, ha upépe ojeikóta tekojojápe.’ (2 PEDRO 3:13)

La hénte okambiáma ohóvo

Ñande ningo jahechaséma mbaʼéichapa oñekumpli koʼã promésa. Péro, mbaʼérepa jajerovia katuete oñekumplitaha? Koʼág̃ama voi jahecha hetaiterei tapicha opa tetãygua okambiaha. Haʼekuéra nopensavéima ijehénte, ndahekovaivéima, ndoikovéima ñorairõme, oiko avei hikuái pyʼaguapýpe, imbaʼeporã ha naimondái. Umi testigos de Jehová oĩ opárupi, oiko oñoermánoicha ha ohasáma hikuái siete millón. Haʼekuéra peteĩcha ojotrata oĩramo jepe ijapytepekuéra hũ, morotĩ,  imboriahu, iplátava térã ambue tetãyguáva. Péro la hénte ko múndope ndoikói upéicha, upévare haʼekuéra ndaijaʼéi ojuehe, oñorairõ ha ojojuka ymaite guive. * Ha jahechávo mbaʼéichapa hetaite hénte okambia koʼág̃a rupi, ikatu jajerovia Ñandejára oprometéva oñekumplipataha amo gotyove.

Péro, mbaʼépa omomýi chupekuéra okambia hag̃ua? Upéva jahecháta jaleévo pe promésa proféta Isaías ohaivaʼekue:

‘Pe lóvo oikóta ovecharaʼýndi, pe jaguarete katu oñenóta umi kavararaʼy ndive. Pe vakaraʼy, leonraʼy ha mayma mymbakuéra oikóta oñondivepa; ha peteĩ mitãʼínte oñangarekóta hesekuéra. Pe león katu opasteáta peteĩ tóroicha. Ha peteĩ mbói kuára ári pe mitã kambu oñemboharáita, ha pe mbói kuárape opoʼẽta peteĩ mitã opoʼoramóva. Ndoikomoʼãi mbaʼeve ivaíva pe che montáña marangatúpe; ko yvy henyhẽta rupi Jehová arandúgui y omyenyhẽháicha pe már’ (Isaías 11:6-9).

Koʼápe Isaías ohechauka yvypóra oikotaha pyʼaguapýpe mymbakuérandi. Péro ndahaʼéi upéva añónte ohechaukáva upe profesía. Mbaʼérepa jaʼe upéicha? Upe téystope heʼi pe kámbio oikoha ‘ko yvy henyhẽta rupi Jehová arandúgui’. Jahechakuaa yvyporakuéra ikatuha oikuaa Ñandejárape ha okambia, péro umi mymba ningo nahániri. Upéicharõ ko profesía oñeʼẽ avei umi hénte oiko lájare ojoguáva mymbápe, péro oaprendégui la Biblia omboʼéva okambia ha hekoporã ojapóvo Ñandejára rembipota.

 Pedro * rembiasakue ohechauka ñandéve upéva. Haʼe oike peteĩ organisasión terrorístape, oimoʼãgui upéva oguerutaha tekojoja. Umi terrorísta omondo chupe omoĩ hag̃ua vómba peteĩ kuartél de polisíape. Péro ojapo mboyve upéva, ojejagarra chupe ha ojegueraha préso. Ha dieciocho mése oĩ aja kárselpe osegi odefende umi terrorísta opensáva. Upe aja katu hembireko oñepyrũ ostudia la Biblia testigos de Jehová ndive. Upéi Pedro osẽ rire kárselgui oñepyrũ avei ostudia la Biblia, ha umi mbaʼe oaprendéva oipytyvõ chupe okambia hag̃ua. Pedro heʼi: “Aagradese Jehovápe ndajukajepéi haguére avavépe aiko tiémpope terrorístaramo. Koʼág̃a aiporu la Biblia agueraha hag̃ua umi héntepe peteĩ marandu porã: Ñandejára Rréino oguerutaha pyʼaguapy ha tekojoja”. Péicha jahecha Pedro tuichaiterei okambia hague, upéi haʼete voi oho opredika pe kuartél omoĩmoʼã haguépe vómba.

Ajépa tuichaite mbaʼe Ñandejára Ñeʼẽ ajeve peichaite peve okambia la héntepe.  Heta ñande rapichápe oipytyvõ anive hag̃ua ojapo mbaʼe vai ha hekoporãve hag̃ua. Jahechakuaa Ñandejára ikatuha okumpli oprometevaʼekue oipeʼávo opa mbaʼe vai ko yvy ape árigui. Ha upearã ohundíta Satanáspe, pe omoakãva umi mbaʼe vai apohápe ko múndope. La Bíbliape heʼi voi: ‘Ko múndo oĩ Satanás poguýpe’ (1 Juan 5:19). Koʼẽrõitéma Satanáspe ojepeʼáta ko múndogui, ha hendive opa umi nokambiaséivape. Ajépa javyʼaitéta ko yvy ape ári ndaiporivéi vove mbaʼe vai apoha!

Mbaʼépa jajapovaʼerã jahecha hag̃ua mbaʼéichapa oñekumpli umi mbaʼe? Ñanemanduʼavaʼerã ‘Jehová arandu’ oipytyvõha la héntepe okambia hag̃ua ha upéva avei oguerúta heta mbaʼe porã amo gotyove. Upévare nde reaprendéramo la Biblia omboʼéva ha rekambia Pedro ojapo haguéicha, ikatúta avei reiko peteĩ múndo oĩtahápe tekojoja (2 Pedro 3:13). Upéicharõ eaprovechákena koʼág̃a reikuaa porãve hag̃ua Ñandejára ha Jesucrístope, upéicharõmante ikatúta reikove opa ára g̃uarã (Juan 17:3).

[Nóta]

[Nóta oĩva taʼanga ndive páhina 9]

Nde avei ikatu reiko peteĩ múndo oĩtahápe tekojoja (2 PEDRO 3:13)