KOʼA peve jahecháma umi kristiáno añeteguáva ndojeheʼaiha polítikare. Upéicharõ, ¿mbaʼéichapa ohechauka ojaposeha umi mbaʼe oipytyvõtava ivesinokuérape? Ojapóvo hikuái Jesús omandavaʼekue: “Tapeho pemboʼe umi hénte opa tetãyguápe oiko hag̃ua chuguikuéra che remimboʼe; ha pevautisa Túva, Taʼýra ha espíritu sánto rérape. Ha pemboʼe chupekuéra ojapo hag̃ua opa mbaʼe amandavaʼekue peẽme” (Mateo 28:19, 20, NM).

Jesús heʼivaʼekue hemimboʼekuérape oikovaʼerãha jukýicha ha ohesapevaʼerãha opavave renondépe, upéva ojapo hag̃ua okumplivaʼerã pe mandáto omeʼẽvaʼekue chupekuéra (Mateo 5:13, 14). ¿Mbaʼérepa jaʼe upéicha? ¿Mbaʼéichapa oipytyvõ umi héntepe pe marandu porã?

Jesucristo marandu porã oporopytyvõ ha ohesape

Enterove oikuaa pe juky oipytyvõha ani hag̃ua oñembyai peteĩ mbaʼe, upéicha avei ojekuaa mbaʼéichapa oporopytyvõ pe marandu porã umi kristiáno oikuaaukáva ko yvy tuichakuére. Umi ohendu ha oñehaʼãva ojapo la Biblia heʼíva, ndahekokyʼái ha omboyke umi mbaʼe ikatúva ombyai chupe, pór ehémplo, pe sigarríllo. Oñehaʼã avei oiko pyʼaguapýpe hapichakuéra ndive, oporohayhu, ipasiénsia, ipyʼaporã ha ojapo hetave mbaʼe porã (Gálatas 5:22, 23). Koʼã mbaʼe oipytyvõ chupekuéra ideprovécho hag̃ua ivesinokuérape. ¡Ajépa  tuichaite oipytyvõ ivesinokuérape umi kristiáno oikuaaukávo pe marandu porã!

Péro ¿mbaʼérepa pe marandu oñembojoja peteĩ mbaʼerendýre? Pe jasy ningo omimbi pe kuarahy ohesapégui hese, upéicha avei umi kristiáno ohesape Jehová “mbaʼerendy” pe marandu porã opredikáva rupive ha hekoporã rupi (1 Pedro 2:12).

Jesús ohechaukave mbaʼéichapa ojojogua pe mbaʼerendy ha hemimboʼekuéra oiko lája, heʼívo: “Ñamyendy rire peteĩ lámpara nañamoingéi kanásto guýpe, jahupi guei yvate ohesape hag̃ua umi ogayguápe. Upéicha avei peẽ pehesapevaʼerã umi hénte renondépe”. Peteĩ lámpara oñemoĩva yvate ohesape porãháicha, opavave ohechavaʼerã umi kristiáno opredika ha hekoporãha. Upéicha, enterove ohecháva umi mbaʼe porã ojapóva hikuái, omombaʼeguasúta Jehovápe, Jesús heʼi haguéicha (Mateo 5:14-16, NM).

Enterove opredikavaʼerã

¿Mávarepa Jesús opensa heʼírõ guare “peẽngo mbaʼerendýicha hína ko múndope” ha “peẽ pehesapevaʼerã umi hénte renondépe”? Oiméne Jesús heʼi upéva enterove hemimboʼére, tuichaiterei ningo pe tembiapo omeʼẽva chupekuéra, ha upéva ndaikatumoʼãi ojejapo mbovymínte hemimboʼe oĩramo diferénte rrelihiónpe okumplíva haʼe heʼivaʼekue. Upéicharõ, enterove ojeroviáva Jesús rehe ‘ohesapevaʼerã’ hapichakuérape. Amo siete millones rupi umi testígo de Jehová oĩva 230 tetã ha território rupi, ohechakuaa omombeʼuvaʼerãha ivesinokuérape pe marandu porã Jesús heʼivaʼekue ojekuaauka hag̃ua.

¿Mbaʼépa pe marandu omombeʼúva umi kristiáno añetegua? Jesús ndeʼíri chupekuéra oñeʼẽ hag̃ua polítikare ni ombojeheʼa hag̃ua rrelihión polítikare, síno heʼi: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetã rupi, ha upéi og̃uahẽta pe ára pahaite” (Mateo 24:14, NM). Ha upéva koʼág̃a rupi ojapo umi testígo de Jehová. Jesús heʼi haguéicha, Ñandejára Rréino añoite oipeʼáta opa mbaʼe vai Satanás ojapoukáva ha opytáta umi tapicha hekojojávante upe goviérno poguýpe.

Mateo, Marcos, Lucas ha Juan ohaivaʼekuépe ohechauka mokõi mbaʼe iñimportánteva Jesús ojapovaʼekue opredikárõ guare. Pe artíkulo oúvape oñemyesakãta mbaʼe mbaʼépa umíva ha mbaʼéichapa umi kristiáno añeteguáva ohechauka avei upéva.

[Komentário oĩva páhina 8-pe]

¿Mbaʼérepa pe marandu porã omombeʼúva kristianokuéra oñembojoja juky rehe?

[Komentário oĩva páhina 9-pe]

¿Mbaʼérepa kristianokuéra ojapóva ojogua peteĩ lámpara oĩvape pytũmbýpe?