MATEO, Marcos, Lucas ha Juan omombeʼu heta mbaʼe Jesús ohasavaʼekue predikasiónpe ha umíva ohechauka mbaʼépa haʼe opensa polítikare. Pór ehémplo, orekórõ guare 30 áño rupi ha ojevautisa riremi, Satanás oikuaveʼẽ chupe ogoverna hag̃ua yvyporakuérape. Upe rire umi hénte omoĩse chupe rréiramo. Tiémpo riremi katu ojapose chugui hikuái dirihénte polítiko. ¿Mbaʼépa haʼe ojapóraʼe umícha jave?

Ogoverna hag̃ua yvyporakuérape. La Biblia omombeʼu Satanás oikuaveʼẽ hague Jesúspe oisãmbyhy hag̃ua “umi goviérno oĩva ko yvy ape ári”. ¿Epensamíntena mbaʼe mbaʼépa Jesús ikatuvaʼerãmoʼã ojapo yvyporakuéra rehehápe oaseptárire upe puésto? ¿Omboykétapa raʼe upéva oimérire polítika rupive ikatúta ojapo heta mbaʼe? Jesús upepete omboykevaʼekue Satanás oikuaveʼẽva chupe (Mateo 4:8-11, NM).

Rréi. Jesús tiémpope, heta oĩvaʼekue oipotáva peteĩ ogoverna porãva ikatuvaʼerã osolusiona yvyporakuéra provléma. Umi hénte ohecharamoitereígui umi mbaʼe porã Jesús ojapóva, oipota ombaʼapo polítikape. ¿Mbaʼépa haʼe ojapo? Juan ohai: “Oikuaágui outaha hikuái mbaretépe omoĩ chupe rréiramo, oho jey pe sérrope haʼeño” (Juan 6:10-15, NM). Péicha haʼe ohechauka jey ndojeheʼaseiha polítikare.

Dirihénte polítiko. Jesús omano mboyvemi, umi fariséo remimboʼe ha Herodes segidorkuéra oñemboja ombaʼeporandu hag̃ua chupe. Umi fariséo remimboʼekuéra ojeise Roma poguýgui, umi ótro katu nahániri. Haʼekuéra oikuaase máva ykérepa Jesús oñemoĩta, upévare oporandu chupe opagavaʼerãpa umi hudío impuésto Rómape.

Marcos ohai mbaʼépa ombohovái chupekuéra Jesús: “‘¿Mbaʼére piko chemoñuhãse? Pegueru chéve ahecha hag̃ua peteĩ denário’. Ogueru chupe hikuái peteĩ, ha haʼe heʼi: ‘¿Máva raʼanga ha máva rérapa ko oĩva hese?’. Haʼekuéra heʼi: ‘César’ [térã mburuvicha Romapegua]. Upémarõ Jesús heʼi: ‘Pemeʼẽ Césarpe imbaʼéva,  péro pemeʼẽ Ñandejárape imbaʼéva’” (Marcos 12:13-17, NM). Jesús ombohovaivaʼekuére, pe lívro Teología Moral heʼi: “Haʼe añetehápe haʼevaʼekue pe Mesías, péro ndahaʼéi peteĩ ‘mesías polítiko’ haʼekuéra [umi hudío] oipotavaichagua. [...] Opa mbaʼe Jesús omboʼevaʼekue Ñandejáragui ohechauka porã pe rrelihión ndojeheʼaiha polítikare”

¿Heʼisépa upéva Jesúspe ndoipyʼapyiha umi imboriahúva, ohasa asýva ha umi mbaʼe vai ojejapóva? Nahániri, la Biblia heʼi porã Jesús ombyasyeterei hague ohechávo mbaʼéichapa oĩ umi hénte (Marcos 6:33, 34). Upéicharõ jepe, haʼe ndojapói ikampáña oipeʼa hag̃ua umi inhustísia ko yvy ape árigui, ni ojejopýrõ guare chupe osolusiona hag̃ua umi provléma.

Koʼã mbohapy ehémplo ohechauka Jesús arakaʼeve ndojeheʼái hague polítikare. ¿Mbaʼépa ikatu jaʼe umi kristiáno koʼag̃aguáre? ¿Mbaʼéichapa ohechavaʼerã pe polítika?