UMI kristiáno añetegua osegi Jesús ehémplo ha ndojeheʼái polítikare. Jesús heʼi porã vaʼekue: “Che avei ndajeheʼái ko múndore”. Ha hemimboʼekuérape katu heʼi: “Peẽ ndapejeheʼái ko múndore” (Juan 15:19; 17:14, NM). Péro ¿mbaʼérepa kristianokuéra ndojeheʼaivaʼerã polítikare?

1. Yvypóra ndorekói podér ogoverna hag̃ua. La Biblia omyesakã porã yvyporakuéra ndorekoiha podér ni derécho ogovernávo. Proféta Jeremías heʼivaʼekue: ‘Yvypóra ndaikatúi oiporavo umi mbaʼe ojehútava henonderãme’ (Jeremías 10:23, ÑÑB).

Yvyporakuérape ningo ndojejapói oveve hag̃ua, upéicha avei ndojejapói chupekuéra ogoverna hag̃ua. Pe istoriadór David Fromkin ohechakuaa yvyporakuéra goviérno ndaikatuiha osolusiona opa mbaʼe, upévare heʼi: “Umi ogovernáva ningo yvypórante, ikatu ojavy ha nosẽporãi chupekuéra umi mbaʼe ojaposéva. Oreko hikuái autorida péro ndaikatúi ojapo heta mbaʼe” (The Question of Government [La cuestión del gobierno]). ¡Ndareíri la Biblia heʼi ñandéve ani hag̃ua jajerovia yvypórare! (Salmo 146:3.)

2. Pe espíritu aña tuicha omanda hesekuéra. Satanás oikuaveʼẽrõ guare Jesúspe umi goviérno oĩva ko múndope, Jesús ndeʼíri Satanáspe umi goviérno ndahaʼeiha imbaʼe. Peteĩ jey Jesús heʼi pe Diablo haʼeha ko “múndo ruvicha” ha heta áño rire apóstol Pablo heʼi avei hese “ko múndo jára” (Juan 14:30, NM; 2 Corintios 4:4, NM). Pablo ohai ambue kristianokuérape: “Ñañorairõñaína [...] umi mburuvicha pytũmbypegua ndive, umi ánhel aña yvategua ndive” (Efesios 6:12, NM). Upéicharõ, umi ogovernáva ko múndo haʼehína umi espíritu aña ndojechaukáiva avavépe. ¿Mbaʼéichapa umi kristiáno ohechavaʼerã  pe polítika oikuaágui koʼã mbaʼe?

Ñambojojami ko mbaʼére. Umi y osyry hatãva ningo oguerahaseha gotyo ogueraha peteĩ kanoaʼípe, upéicha avei pe espíritu aña ojapoukaséva ojapouka umi goviérnope. Pe y osyry mbarete jave umi kanóa omaneháva ndaikatúi ojapo mbaʼeve ani hag̃ua ogueraha chupe, upéicha avei umi goviérno ndaikatúi ojapo mbaʼeve ipuʼaka hag̃ua pe espíritu aña imbaretetévare. Satanás ha idemoniokuéra oñehaʼãmbaite ombohasa asy ha ojapouka  mbaʼe vai yvyporakuérape (Revelación [Apocalipsis] 12:12). Upévare, peteĩ ipoderosovéva Satanás ha idemoniokuéragui añoite ikatu osolusiona opa mbaʼe vai ojejapóva. ¿Mávapa upéva? Ñandejára Jehová (Salmo 83:18; Jeremías 10:7, 10).

3. Umi kristiáno añeteguáva oñemoĩ Ñandejára Rréino ykére añoite. Jesús ha hemimboʼekuéra ojeroviaitereivaʼekue Jehová omoĩtaha igoviérno yvágape ha oisãmbyhytaha ko yvy tuichakuére. La Biblia heʼi Jehová omoĩ hague Jesucrístope Rréiramo upe igoviérnope (Revelación 11:15). Jesús ojeroviavaʼekue Ñandejára Rréino ojapotaha heta mbaʼe porã yvyporakuéra rehehápe ha upévare omombeʼu meme pe “marandu porã oñeʼẽva Ñandejára Rréinore” (Lucas 4:43, NM). Heʼi avei hemimboʼekuérape oñemboʼe jave ojerure hag̃ua: “Tou ne Rréino”. ¿Mbaʼérepa? Upe goviérno poguýpe ojejapóta Ñandejára rembipota ko yvy ape ári, ojejapoháicha yvágape (Mateo 6:9, 10, NM).

¿Mbaʼépa oikóta upéicharõ yvyporakuéra goviérnogui? La Biblia heʼi umi mburuvichakuéra “yvy arigua” oñehundipaitetaha (Revelación 16:14, BNP; Re 19:19-21). Upévare umi ogueroviáva Ñandejára Rréino ohunditaha umi goviérno oĩvape ko yvy ape ári, ndojeroviamoʼãi umi goviérno polítiko osolusionataha opa mbaʼe. Péro ojeroviárõ polítikare oikuaa porãramo jepe oñehunditaha, ohechaukahína omoirũha Ñandejára enemígope.

Umi kristiáno añetegua ndojeheʼái polítikare, péro, ¿heʼisépa upéva ndojaposeiha mbaʼeve oipytyvõtava ivesinokuérape oiko porãve hag̃ua? Pe artíkulo oúvape oñembohováita upéva.

[Komentário oĩva páhina 7-pe]

Umi testígo de Jehová ndojapói mbaʼeve okambia hag̃ua polítika oñemoĩ rupi Ñandejára Rréino ykére