Peteĩ kartél de propagánda omoĩva umi atéo heʼi: “¿Reiko porãvétapa Ñandejára reheʼỹ? Si, hetaitereípe oho porãve upéicha”. Umi atéope g̃uarã Ñandejára ndoexistíri ha opensa voi avave noikotevẽiha hese.

Oĩ katu heʼíva ojeroviaha Ñandejárare, péro oiko lájare ndohechaukái upéva. Peteĩ arsovíspo katóliko, hérava Salvatore Fisichella, heʼi umi hénte irrelihionpeguáre: “Umi orerecháva ndeʼimoʼãi voi orerehe rojeroviaha Cristo rehe, pórke roiko umi ojeroviaʼỹvaicha”.

Oĩ avei heʼíva naitiempoiha voi Ñandejárape g̃uarã. Heʼi hese oĩha mombyry ñandehegui ha ndojepyʼapyiha ñanderehe, upévare naiñimportántei chupe g̃uarã. Umichagua orekose Ñandejárape peteĩ sirviénteicha: oikotevẽ térã ojejopy vai javénte imanduʼa hese, ha upéi hesarái jeýma chugui.

Oĩ avei heʼíva ndojapoiha irrelihión omboʼéva openságui ndaideprovechomoʼãiha chupe. Por ehémplo, Alemániape 100 katóliko apytégui, 76 oĩ heʼíva ndaivairiha peteĩ kuimbaʼe ha kuña oiko oñondive omendaʼỹre, irrelihión ha la Biblia omboʼéramo jepe noĩporãiha upéva (1 Corintios 6:18; Hebreos 13:4). Péro ndahaʼéi umi katóliko añónte heʼíva ijehe irrelihiosoha ha ndoikóiva irrelihión omboʼeháicha. Heta rrelihión omoakãva ombyasy ohechávo umi hénte irrelihionpegua oikoha ndoexistirirõguáicha Ñandejára.

Upéicha rupi heta hénte oñeporandu: ¿añetehápepa ñaikotevẽ Ñandejárare? Upéva ndahaʼéi koʼág̃a ramónte oñeporandúva, ymaite guive oĩ oikuaaséva upéva. Jahechamína mbaʼépa heʼi Génesis, pe primer lívro oĩva la Bíbliape jaikuaa hag̃ua añetehápepa ñaikotevẽ Ñandejárare.