Nɛra la a pɔɣa san dɔɣɛ bia, la ni dɛna la pupeelum la tuunkatɛ. Wuu nɛra la a pɔɣa n nan ka dɔɣɛ kɔrum la, la ta’an eŋɛ ya pakerɛ la ya dekɛ ya tɛm la ya paŋa za’a bisera bia la. Gɔ̃gara ta’an basɛ mɛ ti tɔregɔ la daaŋɔ bɔna. La dela ya bisɛ ya wan eŋɛ se’em bisera ya bia la ti ya pɔɣedire la mɛ ana soŋa. Baabule la wan ta’an soŋɛ ya la wani ti ya maalɛ yele ana wa?

BAABULE LA N YELE SE’EM: ‘Nɔŋerɛ dela suguru la etesoŋɔ.’ Nɔŋerɛ ka tari ‘punya’anɛ, a ka tare sunsunyiim tɔtɔ tɔtɔ.’ (1 Korint 13:4, 5) La nɔɔ boi bim ti hon de bimadaana la, ho puti’irɛ za’a wan bɔna la ho bia la poan ge ho sira me ta’an ti’isa ti ho tamɛ a yele mɛ. Bala, la me nari ti ho nyɛta nɛŋa bɔ’ɔra en. Ho san tara itisoŋɔ la sugurum, ho wan ta’an soŋɛ en ti a mina ti ho boti a yele bia la bisega poan.

“Yamam sereba me sontii ya bɔna la ya pɔgeba . . . yamam mi ba te ba bɔŋa ana se’em la.” (1 Peter 3:7) Bɔkɛ ti ho pɔɣa tari a paŋa la za’a bisa la ya bia la. Ho pɔɣa nyaa tari la tuunɛ n ta’an basɛ ti tɔregɔ, nɛnkaaleŋa bɔna ti suure tara en. Hali tɛm busebo a sunsɔa ta’an nyie la ho mɛ ge di’isa suure sɛla n sɔi la “se’em n tan a suunre din’inha, nyane paŋadaana.” (Magaha 16:32) Bɔkera en soŋa ge soŋera en.​—Magaha 14:29.

HON WAN TA’AN EŊƐ SƐLA:

• Sɔdoma: Soŋera ho pɔɣa ti a bisa bia la, hali la san puɣum dɛna la yu’uŋɔ mɛ. La nari ti ho aaɛ ho tɛm yɛla a se’a poan basɛ ge nyɛ tɛm bo ho pɔɣa ti ya bisa ya bia la

• Madoma: Ho sira san yeti a soŋɛ hɔ, basɛ ti a soŋɛ hɔ. A san ka tum de soŋa pa’alɛ en ge da zɛregɛ en

BAABULE LA N YELE SE’EM: “Te ba bayi la lebege bonyenɛ.” (Pin’ileŋɔ 2:24) La boi bim ti ya dɔɣɛ la bia ge tɛra ti ya kelum dɛna la “boyena.” Eŋɛ ya ania basɛ ti ya nɔŋerɛ la kpe’em.

Pɔɣeba, nana ya sireba n soŋera ya se’em la. Ho san eŋɛ pa’alɛ ti ho puurɛ pee ya la eŋa n soŋeri ho se’em la, la wan dɛna “tebegɔ.” (Magaha 12:18) Sireba, yele ya pɔɣeba ya nɔŋɛ ba ge geela ba se’em. Pɛɣɛ en la eŋa n iti ania se’em bisera ya deo la.​—Magaha 31:10, 28.

‘Ya se’em da ziɣera ti a bisa a mea ma’a ge a me laɣum bisa basɛba me.’ (1 Korint 10:24) Kɔ’ɔn ita sɛla n ani soŋa bɔ’ɔra ho sira bii ho pɔɣa. Wuu ya de nɛra la a pɔɣa la, la nari ti ya pɛɣera taaba, nyɛta tɛm sɔsera bɔkera taaba. La san dɛna la ga’aregɔ poan yele, da ɛɛra sɛla ti hon ma’a bɔta. Basɛ ti ho tadaana la yele me pakɛ hɔ. Baabule la yeti: “Da zagahɛ ya lagona taaba, han dagana ya bayi lagom sakɛ mɛ.” (1 Korint 7:3-5) Bala la, sɔsɛ ya bɔkɛ taaba soŋa. Ya san di’isa suure ge bɔkera taaba, ya suure wan kɛ̃ taaba.

HON WAN TA’AN EŊƐ SƐLA:

• Nyɛti ya tɛm bɔ’ɔra taaba

• Ni makɛ eŋɛ sɛla fii bo ho pɔɣa bii ho sira ti la pa’alɛ ti ho nɔŋɛ a yele

BAABULE LA N YELE SE’EM: ‘Hon daa de bia tole na yehe zina, ho daa pon mina toolom golehegɔ la mɛ. La dela gulesegɔ kuna wa poan te ho wan nyɛ Yenɛ n ete se’em faanra nɛreba bahera.’ (2 Timoti 3:15) Maasum sɛla ti ho wan dekɛ pa’alɛ bilia la. La dela yelenyalema ti bilia wan ta’an zamesɛ hali a san puɣum bɔna a ma puuren. Bia la n nan boi puuren la, a wuni ho kɔa mɛ ge me kɛlesa sɛla ti ho tɔɣera bɔ’ɔra en la. Kaala bɔ’ɔra en a san puɣum dɛna bilia. La nɔɔ boi bim ti a kan bɔkɛ sɛla ti ho kaala bɔ’ɔra en la ge bala wan soŋɛ en ti a bɔta kaalegɔ a san zo’e.

Da malum ti’isa ti bilia la ba’a pɔ’ɛ mɛ ti a kɛlesa Naayinɛ yetɔɣum. Basɛ ti a wuna hon pu’useri bɔ’ɔra Yehowa se’em. (Tɛɛnhegɔ 11:19) Ho san dɛ’ɛna la en, pa’ala en sɛla ti Naayinɛ naam. (Yooma 78:3, 4) Ho san ita bala ti bia la ta zo’e a wan baŋɛ ti ho nɔŋɛ Yehowa, bala me wan basɛ ti a me nɔŋɛ Yehowa.

HON WAN TA’AN EŊƐ SƐLA:

• Pu’usa ti Naayinɛ bo ho yɛm ti ho ta’an pa’ala ho bilia la

• Yi’ira yeledaasi la taɣesa bɔ’ɔra ho bilia la ti a me pɔsɛ zamesa