ZASEŊƆ 2
Ani N De Naayinɛ?
1. Beni ti la nara ti to pu’usa Naayinɛ?
Naaŋɔ Daana la n de yelemɛŋɛrɛ Naayinɛ. A ka tari pɔsega ge me ka tara ba’asegɔ. (Yooma 90:2) Eŋa n Sɔi yelesoma la n boi Baabule la poan. (1 Timoti 1:11) La nari ti to pu’usa Naayinɛ ma’a, se’ere n sɔi la eŋa bo to vom.—Kaalɛ Liligere 4:11.
2. Naayinɛ ani la wani?
Nɛra ka tabelɛ nyɛ Naayinɛ sɛla n sɔi la a dela Vo’osum, ti la pa’alɛ ti a vom boi la de to’ore la bunvɔɔsi woo n boi teŋgɔŋɔ wa zuo. (Yon 1:18; 4:24) La bala za’a la, to wan nyaŋɛ ti’isɛ baŋɛ Naayinɛ hala doose lɔɣɔse’a ti a naam la. Makerɛ n wana, wɔla la puuro pa’alɛ to la Naayinɛ nɔŋerɛ la a yɛm. Saazuo la teŋgɔŋɔ wa n zoni se’em la pa’alɛ to la Naayinɛ paŋa.—Kaalɛ Arom 1:20.
To wan ta’an zamesɛ baŋɛ Naayinɛ hala zo’e doose la Baabule kaalegɔ poan. Ku pa’alɛ to sɛla ti Naayinɛ bɔta la sɛla ti a ka bɔta, en ani la nɛreba se’em la eŋa n iti se’em nɛreba yɛla poan.—Kaalɛ Yooma 103:7-10.
3. Naayinɛ tari yu’urɛ?
Yesu yun yeti, “To Sɔ’ n boe saazuo ha, ho yu’urɛ nara pɛnka.” (Matu 6:9) La de sira ti Naayinɛ tari na’asegɔ yu’ura zo’e zo’e, ge a tari la yu’urɛ ayina ma’a. Yetɔɣum woo yi’a bo la a tɔka. Ba yi’iri en la “Yehowa” Gurenɛ poan. Ge nɛreba basɛba yi’iri en la “Yahweh.”—Kaalɛ Yooma 83:18, NW.
Ba yese Naayinɛ yu’urɛ la mɛ Baabule zo’e zo’e poan ge tee gulesɛ Naayinɛ bii Daana. Ge ba yun gulesɛ Baabule la, Naayinɛ yu’urɛ yun paɛ 7,000 mɛ. Yezu yun pa’alɛ nɛreba Naayinɛ yɛla ge basɛ ti ba baŋɛ Naayinɛ yu’urɛ.—Kaalɛ Yon 17:26.
Bisɛ Naayinɛ Tari Yu’urɛ? vidiyo la
4. Yehowa fabelɛ to yele?
Wuu sɔ wa n tari nɔŋerɛ se’em la, Naayinɛ me iti la bala ti a faaɛ to yeletooro poan
Namesegɔ n boi ze’an woo la pa’alɛ ti Yehowa Naayinɛ ka fabelɛ to yele? Nɛreba basɛba yeti a namesere to ti a eŋɛ to bisɛ mɛ ge bala daɣɛ yelemɛŋɛrɛ.—Kaalɛ Yames 1:13.
Naayinɛ na’asɛ to mɛ bo to fai puti’irɛ. To puurɛ ka pee la to tari yɔ’ɔ ti to loe pu’usa en la? (Yosua 24:15) Ge nɛreba zo’e zo’e tunɛ la tunfɛ’ɛsa, n sɔi ti namesegɔ bɔna. La daani Yehowa suure mɛ la ŋmɛlema tuuma n boi wa.—Kaalɛ Pin’ileŋɔ 6:5, 6.
Yehowa dela Naayinɛ n tari nɔŋerɛ bɔ’ɔra to. A boti ti to tari la pupeelum. La kan yue a wan basɛ ti namesegɔ la sɛba woo n tari namesegɔ paara to la mɛlum. Ge eŋa ma’a n mi sɛla zuo ti a basɛ ti namesegɔ kelum bɔna. Zaseŋɔ 8 la poan wan basɛ ti to baŋɛ sɛla n sɔi.—Kaalɛ 2 Peter 2:9; 3:7, 13.
5. To wan eŋɛ la wani ta’an lɛm Naayinɛ?
Yehowa boti to doose la zusega poan lɛm en. Tomam ayina woo yele pakɛ en mɛ. (Yooma 65:2; 145:18) A diti la sugere bɔ’ɔra to be’em. To ni tiregera ti to eŋɛ sɛla ti a bɔta, ge ni ta koŋe la, a puurɛ ni pee mɛ. Bala la to tuure la za’a, to wan ta’an ana tapilapi la Naayinɛ.—Kaalɛ Yooma 103:12-14; Yames 4:8.
La nari ti to nɔŋɛ Yehowa gana nɛra woo, sɛla n sɔi la eŋa bo to vom. (Mark 12:30) Ho san nɔŋɛ Naayinɛ la nari ti ho zamesɛ baŋɛ en soŋa ge ita eŋa n boti sɛla, bala wan basɛ ti ho ana tapilapi la en.—Kaalɛ 1 Timoti 2:4; 1 Yon 5:3.
