Nɔkpe’ene ka boi ti, hon baŋɛ yelese’a Baabule poan wa kpemese ho ti ho tara nɔŋerɛ bɔ’ɔra Yehowa. La dela ho tara nɔŋerɛ dena wa. (1 Peter 2:2) Ho san wan nyɛ daarewoo nyɔvore dela ho lɛna Naayinɛ ge zamesa a Yetɔɣum la.​—Kaalɛ Yon 17:3; Yude 21.

Ho san nyɛ Naayinɛ mi’ilum zo’e, ho sakerɛ wan kpe’em. Sakerɛ wan basɛ ti ho pee Naayinɛ puurɛ. (Hebru 11:1, 6) La wan soŋɛ ho ti ho basɛ ho be’em ge tee ho sareŋɔ ti ho bɔŋa ana soŋa.​—Kaalɛ Tooma 3:19.

Nɔkpe’ene kai ti ho wan bɔta ti ho yele nɛreba hon zamesɛ sɛla—wuu to za’a n nɔŋɛ to tɔɣera yelesoma se’em la. Ho san kelum zamesa Baabule la, la wan soŋɛ ho ti ho ta’an dekɛ Baabule la pa’alɛ basɛba yelesoma la, la hon tari sakerɛ Yehowa poan se’em.​—Kaalɛ Arom 10:13-15.

Nɛreba zo’e zo’e ni pɔsɛ dekɛ yelesoma la tɔɣɛ bo la ba zɔdoma bii ba suurɔ. Mina hon wan tɔɣɛ se’em. Da yele ba ti ba tue ba pu’usegɔ poan mɛ, tuɣum yele ba Naayinɛ n yeti a beere eŋɛ sɛla bo ba. Leyɛ’ɛsa, mina ti nɛreba bisere la ho sareŋɔ n ani se’em gana ho yetɔɣum.​—Kaalɛ 2 Timoti 2:24, 25.

Ho san zamesa Naayinɛ Yetɔɣum, ho wan tɔla nɛŋa vo’osum poan. La wan basɛ ti hon la Yehowa bɔŋa  ana soŋa. Hali ho wan ta’an laɣum pa’asɛ a nɛreba poan.​—Kaalɛ 2 Korint 6:18.

Ho san zamesa Naayinɛ Yetɔɣum la, ho ta’an nyɛ vo’osum poan nɛŋa tɔlega. (Hebru 5:13, 14) Yele Yehowa Sɛɛradoma ayima ti a dekɛ What Does the Bible Really Teach? gɔŋɔ la zamesɛ ho Baabule la. Ho san zamesa Naayinɛ Yetɔɣum la ho wan nyɛ bɔnsoŋa ho zi’irego poan.​—Kaalɛ Yooma 1:1-3; 73:27, 28.

Yelesoma la ze’ele la Yehowa, pupeelum Naayinɛ la ze’an na. Ho san lɛna a nɛreba, ho wan ta’an lɛm en. (Hebru 10:24, 25) Hon tiregere ti ho pee Yehowa puurɛ la wan basɛ ti ho nyɛ vom—daarewoo vom. Yelese’ere n nari paa ti ho wan ta’an eŋɛ dela ho lɛna Naayinɛ.​—Kaalɛ 1 Timoti 1:11; 6:19.