ZASEŊƆ 49
YUUNƐ 147 Life Everlasting Is Promised (To Wan Ta Vɔna Daarewoo)
Ho Nari Ti Ho Eŋɛ La Bem Ta’an Ta Vɔna Daarewoo?
“Sɛba woo n nyɛ mam a Dayɔa la, ge sakɛ bo mam, wan tara vom sebo n ka tare ba’ahegɔ Na’ayenɛ zen’en la.”—YON 6:40.
YELEKPINE
Loore Kristakɔma la, la pisena la n nyɛti nyuurɔ Yezu Krista lua bunɔ la poan se’em.
1. Beni n sɔi ti nɛreba zo’e zo’e ti’isa ti ba kan ta’an ta vɔna daarewoo?
NƐREBA zo’e zo’e tiregeri mɛ dita soŋa ge me ita exercise, ti ba ta’an tara imma’asum. Ge ba mi soŋa soŋa ti bala ma’a kan basɛ ti ba vɔna daarewoo. Ba puɣum ka ti’isa ti ba wan ta’an ta vɔna daarewoo. Ge Yezu yuun tɔɣɛ ti la bɔna Yon 3:16 la 5:24 ti, nɛresaaleba wan ta’an ta tara “vom n ka tare ba’ahegɔ.”
2. Yon a zuo 6 tɔɣɛ ton wan ta vɔna daarewoo yele la wani? (Yon 6:39, 40)
2 Daarɛ deyima, Yezu yuun tum la yelekirega dekɛ boroboro, la zim diise nɛrekuuŋɔ. a Yele wa yuun dela kirega ge eŋa n le yele sɛla yiimbeere la yuun eŋɛ nɛreba la pakerɛ paa. Nɛrekuuŋɔ la yuun doose en keŋɛ la Kapernaum tiŋa. Bilam ti a yuun yeti, eŋa wan isige nɛreba kum poan ti ba ta vɔna daarewoo. (Kaalɛ Yon 6:39, 40.) Ti’isɛ bisɛ ho zɔdoma, la ho yidoma n wan ta isige kum poan ti la ana se’em. Yezu n yuun yele sɛla wa pa’alɛ ti sɛba n ki la wan ta isige, ti tomam la bamam ta vɔna daarewoo! Ge Yezu n yuun le yele sɛla ti la bɔna Yon a zuo 6 la yuun kpe’em bo nɛreba la mɛ ti ba bɔkɛ. Zina beere wa, la me kpe’em bo nɛreba zo’e zo’e mɛ ti ba bɔkɛ. Yezu yuun yeti bem?
3. Yezu yuun yeti bem ti la bɔna Yon 6:51?
3 Yezu n yuun tum yelekirega dekɛ boroboro diise nɛrekuuŋɔ la yuun basɛ ti ba tiɛ la Yehowa n yuun tari manna diisa Israeldoma la se’em pɔɣetia la poan. Nɛreba la yuun mi ti manna dela boroboro bii “dia n ze’ele saazuo na.” (Ym. 105:40; Yon 6:31) Yezu yuun nyaa dekɛ manna wa pa’alɛ nɛreba la ninmu’urɛ yɛla. La boi bim ti Naayinɛ n yuun tum yelekirega bo Israeldoma la manna ge sɛba n di la yuun kelum ki mɛ. (Yon 6:49) Yezu yuun yeti eŋa dela “yelemɛŋɛrɛ disɛka n ze’ele saazuo ha la,” “disɛka te Na’ayenɛ bɔ’ɔra,” la ‘vom dia.’ (Yon 6:32, 33, 35) Yezu yuun pa’alɛ eŋa, la manna la n boi to’ore to’ore se’em. A yuun yeti: “Mam de vom dia la. Te nɛrese’em n di dikana wa wan [vɔna daarewoo].” (Kaalɛ Yon 6:51.) La yuun eŋɛ Yudadoma la pakerɛ. Ba yuun ka bɔkɛ sɛla n sɔi ti Yezu wan ta’an yeti eŋa dela “disɛka” n ze’ele saazuo na la ge me pa’alɛ ti dikaŋa nyani manna la ti Naayinɛ yuun dekɛ bo Israeldoma la. Yezu yuun nyaa yele ba ti: “Disɛka te mam wan bo [ya] la dela n iŋa wa.” A yuun boti a yeti bem? La yele pakɛ mɛ ti to bɔkɛ de vuurɛ. Bala wan basɛ ti to baŋɛ tomam la to yidoma n wan eŋɛ se’em ta’an ta vɔna daarewoo. To bisɛ Yezu n yuun boti a yele sɛla.
YEZU N YUUN YETI “VOM DIA” LA “MAM IŊA” LA VUURƐ?
4. Beni n sɔi ti la yuun eŋɛ nɛreba basɛba pakerɛ la Yezu n yele sɛla la?
4 Yezu n yuun yeti eŋa wan “dekɛ [a inya] bo mɛ te teŋa wa zuo nɛreba ta’an vɔna” la yuun eŋɛ nɛreba basɛba la pakerɛ. Ba yuun ta’an ti’isa ti a wan dekɛ la amea inya bo ba ti ba obe. (Yon 6:52) Ge Yezu n yele sɛla pa’asɛ la yuun eŋɛ ba la liɣibi. A yuun yeti: “Ya han ka obe Asaala Dayɔa iŋa wa ge nyu mam ziim, ya kan nyɛ vom ya zen’enhen.”—Yon 6:53.
5. Beni n sɔi ti to wan ta’an yeti Yezu yuun ka boti a yeti nɛreba la nari ti ba nyu eŋa ziim?
5 Noah dabesa la, Naayinɛ yuun yele nɛreba ti ba da dita ziim. (Pin. 9:3, 4) Pooren, Yehowa yuun le yele Israeldoma la ti ba da dita ziim. Se’em woo n di ziim, ba wan “ŋmaɛ [bii ku] en.” (Mal. 7:27) Yezu yuun pa’alɛ Yudadoma la ti ba dɔla Moses Lɔɔ la za’a. (Mt. 5:17-19) Bala la, la kan ta’an eŋɛ ti Yezu yele Yudadoma la ti ba obe eŋa inya la bii nyu eŋa ziim. Ge Yezu yuun boti a yele ba la sɛla. A yuun boti la nɛreba la baŋɛ ban wan eŋɛ se’em ta’an ta “tara vom sebo n ka tare ba’ahegɔ.”—Yon 6:54.
6. Beni n sɔi ti to wan ta’an yeti sɛla n boi Yon 6:53 la dela makerɛ?
6 La niɛ peelumi ti Yezu yuun dekɛ la makerɛ tɔɣɛ bo nɛrekuuŋɔ la. A yuun dekɛ la makerɛ tɔɣɛ bo Samaria tiŋa pɔka la ti: “Hon se’em nyu ko’om sebo te mam wan bo ho la, ko’nyuuro kan le tara hɔ. Te ko’om sebo te mam wan bo ho la, wan lebege ko’bulegɔ ho poan bɔ’ɔra hɔ ko’om sebo n vɔe ge te ho tara vom sebo n ka tare ba’ahegɔ.” (Yon 4:7, 14) b Yezu yuun ka boti a yeti Samaria tiŋa pɔka la san yeen nyu ko’om la, a wan ta vɔna daarewoo. Bala mea nɔɔ ti Yezu yuun ka bɔta ti a yeti, nɛrekuuŋɔ la n doose en keŋɛ Kapernaum tiŋa la san obe eŋa inya ge nyu eŋa ziim, ba wan ta vɔna daarewoo.
SAŊA BUSEBO TI YEZU YUUN LE DEKƐ MAKERƐ TƆƔƐ SƐLA N ANI BALA
7. Nɛreba basɛba tɔɣɛ Yon 6:53 yele la wani?
7 Nɛreba basɛba ti’isɛ ti Yezu n yuun yele sɛla ti la bɔna Yon 6:53 la, pa’alɛ la nɛreba n nari ti ba ita sɛla Daana Zaanɔɔrɛ Dia la poan, se’ere n sɔi la Yezu yuun dekɛ la yelebɛa aŋa taaba tɔɣɛ. (Mt. 26:26-28) Ba ti’isɛ ti se’em woo n keŋɛ Daana Zaanɔɔrɛ Dia la nari ti a obe boroboro la ge nyu daam la. Bala dela yelemɛŋɛrɛ? La yele pakɛ mɛ ti to viisɛ baŋɛ lebesego la, se’ere n sɔi la yuunɛ woo nɛreba tusa tusa n boi tingole wa zɛ’an woo n ni naɛ la tɔ ti to eŋɛ Daana Zaanɔɔrɛ Dia la. To wan nyɛ sɛla n boi Yon 6:53 la n boi de to’ore se’em la Yezu n yuun yele sɛla Daana Zaanɔɔrɛ Dia la poan la.
8. Sɛla n boi Yon 6:53 la, la Yezu n yuun tɔɣɛ sɛla Daana Zaanɔɔrɛ Dia la poan la boi to’ore to’ore la wani? (Bisɛ fɔɔra la.)
8 To bisɛ ya yɛla ayi wa n boi to’ore to’ore se’em. Yia, bɛsa la sankani ti Yezu yuun tɔɣɛ sɛla n boi Yon 6:53-56? La yuun dela yuun 32 Y.B., se’em ma’a ti a yuun bɔna Galilee la. Yuunɛ pooren ti a yuun nyaa keŋɛ Yerusalem ta eŋɛ Daana Zaanɔɔrɛ Dia la. N yi’i, a yuun tɔɣeri bɔ’ɔra la bani? A yuun tɔɣeri bɔ’ɔra la nɛresɛba n yuun kɔ’ɔn ti’isa ba punya’anɛ yele ge tuɣum ka bɔta ti ba zamesɛ Naayinɛ Na’am la yɛla. (Yon 6:26) Yelemɛŋɛrɛ, Yezu n yuun yele sɛla ti la kpe’em bo ba ti ba bɔkɛ la, ba yuun ka le dɔla en. Hali a podɔleba la basɛba yuun eŋɛ la bala. (Yon 6:14, 36, 42, 60, 64, 66) Nɛrebana wa yuun boi la ba to’ore la Yezu tuntuneba 11 la n yuun boi la en yuun 33 Y.B. Daana Zaanɔɔrɛ Dia la poan la. Yu’unkuŋɔ la, a tuntuneba 11 la yuun kelum bɔna mɛ la en, hali la ban ka bɔkɛ Yezu n pa’alɛ ba yelese’a la. A tuntuneba la yuun mi soŋa soŋa ti Yezu dela Naayinɛ Dayua n ze’ele saazuo na. (Mt. 16:16) Yezu yuun pɛ̃ɣɛ ba ti: “Ya daa kɔ’ɔn bɔna mɛ la ma bala mam n daa nyɛ namehe seto woo la.” (Lu. 22:28) Yɛla ayi wa basɛ ti la niɛ peelumi ti sɛla n boi Yon 6:53 la ka pa’alɛ ti nɛra woo ta’an obe boroboro la ge nyu daam la Daana Zaanɔɔrɛ Dia la poan. Yɛla ase’a me n boi basɛ ti yele wa niɛ peelumi pa’asɛ.
Yon a zuo 6 pa’alɛ la Yezu n yuun yele Yudadoma la n boi Galilee tiŋa la sɛla (gɔbega). Yuunɛ pooren ti a yuun tɔɣɛ bo a tuntuneba 11 la Yerusalem tiŋa (zuɔ) (Bisɛ kaalegɔ zɛ’an 8)
YEZU N YUUN YELE SƐLA LA N WAN SOŊƐ HO SE’EM
9. Yezu yuun tɔɣeri bɔ’ɔra la bani, Daana Zaanɔɔrɛ Dia la poan?
9 Daana Zaanɔɔrɛ Dia la poan, Yezu yuun dekɛ la boroboro n ka tari mi’isum bo a tuntuneba la ge yeti la ze’ele bo la eŋa inya. Bala pooren, a bo ba la daam ge yeti la ze’ele bo la “nɔbiŋere ziim.” (Mr. 14:22-25; Lu. 22:20; 1 Ko. 11:24) Eŋa n tɔɣɛ nɔbiŋere la yele se’em la pakɛ mɛ paa. A yuun yeti bu dela nɔbiŋere paalɛ. Sɛba n wan ta naɛ la Yezu di na’am la ma’a n pa’asɛ nɔbiŋere wa poan. (Heb. 8:6, 10; 9:15) Tuntuneba la yuun ka bɔkɛ yele wa soŋa sankaŋa ge la yuun ka yue ti zilam vo’osum la loe ba ti ba wan ta naɛ la Yezu di na’am saazuo.—Yon 14:2, 3.
10. Bem n le pa’alɛ ti sɛla ti Yezu yuun yele Daana Zaanɔɔrɛ Dia la poan, la eŋa n yuun yele nɛrekuuŋɔ la sɛla la boi la to’ore to’ore? (Bisɛ foote la.)
10 Tɛ̃ra ti Daana Zaanɔɔrɛ Dia la poan, Yezu yuun kɔ’ɔn basɛ ti a puti’irɛ bɔna la ‘pigile pika’ la poan. Tuntuneba sɛba n yuun boi la en bɔ’ɔ la poan la ti Naayinɛ loe yia ti ba pa’asɛ pigile pika la poan. (Lu. 12:32) Ba san ita Daana Zaanɔɔrɛ Dia la, bamam la sɛba woo n wan ta pa’asɛ pigile pika la poan ma’a n nari ti ba obe boroboro la ge nyu daam la. Bamam n wan ta naɛ la Yezu bɔna saazuo. Yezu n yuun yele a tuntuneba la sɛla Daana Zaanɔɔrɛ Dia la poan la boi la de to’ore la eŋa n yuun yele nɛrekuuŋɔ la sɛla la. A yuun tɔɣeri la pigile pika la ma’a yele. Ge eŋa n yuun yele sɛla Galilee tiŋa la tɔɣeri la nɛreba zo’e zo’e yele.
Daana Zaanɔɔrɛ Dia la poan, nɛreba fii ma’a n ni obe boroboro la ge nyu daam la. Ge “se’em woo” wan ta’an tara sakerɛ bɔ’ɔra Yezu ge ta vɔna daarewoo (Bisɛ kaalegɔ zɛ’an 10)
11. Yezu yuun yele la bem Galilee tiŋa ti la pa’alɛ ti a yuun ka tɔɣeri la nɛreba fii ma’a yele?
11 Nɛresɛba ti Yezu yuun tɔɣera bɔ’ɔra ba Galilee tiŋa la boti la dia ma’a. Ge Yezu yuun tiregɛ mɛ ti a soŋɛ ba ti ba baŋɛ ti sɛla n boi ana soŋa gana dia. La wan basɛ ti ba ta’an ta vɔna daarewoo. Yezu yuun le yeti hali sɛba n ki la wan ta isige ge vɔna daarewoo. A yuun ka tɔɣeri la nɛreba fii ma’a yele wuu eŋa n yuun ta tɔɣɛ sɛla Daana Zaanɔɔrɛ Dia la poan la. A yuun tuɣum tɔɣera la nɛra woo n wan ta nyɛ kã’a se’em. A yuun yeti: “Nɛrese’em n di dikana wa wan tare vom la. Ge disɛka te mam wan bo hɔ la dela n iŋa wa. N yeti n dekɛ dɛ bo mɛ te teŋa wa zuo nɛreba ta’an vɔna.”—Yon 6:51. c
12. Nɛra wan eŋɛ la wani ta’an ta vɔna daarewoo?
12 Yezu yuun boti a yeti, se’em woo n tabelɛ bɔna tiŋa wa zuo wan ta vɔna daarewoo? Aayi. Sɛba n tari sakerɛ bɔ’ɔra en la ma’a n wan ta vɔna daarewoo. Pu’usegɔdoma zo’e zo’e ti’isɛ ti, nɛra san yeen “sakɛ bo [Yezu]” ge nam ti Yezu n wa’ana ki faaɛ tɔ, a wan ta vɔna daarewoo. (Yon 6:29) Ge bala ma’a ka seke. Nɛresɛba n yuun sakɛ bo Yezu la zo’e zo’e yuun zaɣesɛ en mɛ. Beni n sɔi?
13. Ho tara sakerɛ bɔ’ɔra Yezu vuurɛ?
13 Yezu n yuun bo’ori nɛreba dia la zuo ti nɛrekuuŋɔ la yuun kɔ’ɔn taɛ a poore dɔla. Ba yuun boti la Yezu tibɛ ba, bo ba dia ge me yele ba ban boti ba wum sɛla. Ge Yezu yuun yele a podɔleba la ban nari ti ba eŋɛ sɛla pa’asɛ. Yezu yuun basɛ ti la niɛ peelumi ti eŋa ka wa’an tingɔŋɔ wa zuo na ti a bo nɛreba ban yeen bɔta sɛla. A wa’ana ti a pa’alɛ ba la ban wan eŋɛ se’em ta’an dɛna a podɔleba.—Yon 5:40; 6:44.
14. To nari ti to eŋɛ la bem ta’an nyɛ nyuurɔ Yezu inya, la a ziim la poan?
14 Yezu yuun yele nɛrekuuŋɔ la ti, eŋa inya, la a ziim la n wan basɛ ti ba ta vɔna daarewoo. Yudadoma la yuun nari ti ba sakɛ yele wa. Tomam me nari ti to eŋɛ la bala zina beere wa. (Yon 6:40) Yezu n yuun yele sɛla ti la bɔna Yon 6:53 la vuurɛ dela, to tara sakerɛ lua bunɔ la poan ta’an ta vɔna daarewoo. Nɛreba zo’e zo’e wan ta’an ta nyɛ kã’a wa.—Ep. 1:7.
15-16. To zamesɛ la bem ninmu’urɛ yɛla Yon a zuo 6 poan?
15 Yon a zuo 6 pa’alɛ to la ninmu’urɛ yɛla n kpemeseri giila. To baŋɛ ti Yezu fabeli nɛreba yele mɛ. Eŋa n yuun boi Galilee tiŋa la, a yuun tibɛ la bã’adoma, diise nɛreba zo’e zo’e ge me tɔɣɛ Naayinɛ Na’am la yele bo ba. (Lu. 9:11; Yon 6:2, 11, 12) Sɛla n gani za’a dela, a yuun pa’alɛ ba ti eŋa n de “disɛka n bo’ore vom la.”—Yon 6:35, 48.
16 “Pisena” la ka nari ti ba obe boroboro la ge nyu daam la, Daana Zaanɔɔrɛ Dia la poan. (Yon 10:16) Ge ba kelum nyɛta nyuurɔ Yezu Krista inya, la a ziim la poan mɛ. Ba iti bala la, ban tari sakerɛ lua bunɔ la poan, la lua bunɔ la n wan basɛ ti to ta nyɛ kã’a se’em. (Yon 6:53) Sɛba n wan obe boroboro la ge nyu daam la pa’alɛ ti ba wan ta naɛ la Yezu di Na’am saazuo. Bala la, to pa’asɛ la loore Kristakɔma la bii pisena la poan woo, yelese’a n boi Yon a zuo 6 la yele pakɛ mɛ ti la nara ti to zamesɛ baŋɛ. La nari ti to tara sakerɛ n kpe’em lua bunɔ la poan ta’an ta vɔna daarewoo.
YUUNƐ 150 Seek God for Your Deliverance (Dekɛ Homea Delum Naayinɛ Nyɛ Faarɛ)
a Ba tɔɣɛ Yon 6:5-35 yele la zaseŋɔ seko n tole la poan.
b Yezu n yuun dekɛ ko’om eŋɛ makerɛ la pa’alɛ la Yehowa n puɣum eŋɛ sɛla, la eŋa n iti sɛla ti a basɛ ti nɛresaaleba ta’an ta vɔna daarewoo.
c Yon a zuo 6 dekɛ la yelebɛa n de “se’em woo” la “sɛba woo” tum tuuma pa’alɛ sɛba n wan ta vɔna daarewoo.—Yon 6:35, 40, 47, 54, 56-58.
