YOMARA la a tãpa Marcelo la Hiver boi la Guatemala tinkpɛŋa poan. Yehowa Sɛɛradoma n pɔsɛ zamesa Yomara Baabule la, pooren ti a tãpa la me laɣum zamesa. Ge yele n yuun boi. Ba za’a yuun fɔ mɛ ge kan ta’an kaalɛ fɔɔsi gɔnɔ. Bala la, ba Baabule pa’alegɔdaana la n ni kaalɛ zaseŋɔ la ge kaalɛ Baabule gulesegɔ la bo ba.

La me yuun kpe’em bo ba mɛ ti ba kena tansugere zamesegɔ. Ba yuun kan ta’an keŋɛ mita 40 ba ma’a ta paɛ Na’am Pu’usegɔ Deo la. Ge mabiisi la yuun ni soŋɛ ba mɛ tari ba kena zamesegɔ la woo. Bakwai la zamesegɔ poan ti ba yuun pɔsɛ bɔ’ɔra ba tuunɛ tansugere zamesegɔ poan la, mabiisi la yuun ni soŋɛ ba mɛ ti ba maasum ta’an tɛ̃ra ba tuunɛ la.

May 2019 ti ba yuun pɔsɛ tansugere zamesegɔ ba zɛ’an la. Sankaŋa la, nɛra la a pɔɣa n de sore ŋmɛ’adoma n yuun keŋɛ ta bɔna ba zɛ’an. La boi bim ti mabiisi wa yuun kan ta’an kaalɛ fɔɔsi gɔnɔ ge ba yuun maasum mɛ ti ba pa’alɛ ba ti ba ta’an gulesa ge kaala fɔɔsi gɔnɔ. Ba yuun keŋɛ la gɔnɔ zaaleŋa ta bisɛ fɔɔsi gulesegɔ n ani se’em ge me zamesɛ ban pa’ali ku se’em.

Ŋmaresi fii pooren, Yomara la a tãpa la yuun ta’an kaala fɔɔsi gɔnɔ mɛ soŋa soŋa ti bala yuun soŋɛ ba ti ba nyɛta nɛŋa tɔlega vo’osum poan. a Nananawa, Yomara la Marcelo la Hiver nyaa dela daarewoo sore ŋmɛ’adoma. Marcelo dela keendoma soŋera. Bakwai la za’a, ba ni kɔ’ɔn mɔ’ɛ la nini Yehowa tuuma poan. Ban tari pupeelum pu’usa Yehowa se’em la, kpemeseri mabiisi giila mɛ.

Mabiisi batã wa puurɛ pee mɛ la tansugere la n tari nɔŋerɛ soŋera ba se’em la. Yomara yeti, “Yehowa Sɛɛradoma n daa seke to yia la, ba daa eŋɛ pa’alɛ ti ba tari la nɔŋerɛ ta paɛ zina.” Marcelo me yeti, “to tari la zɔsonɔ tansugere la poan ge laɣum pa’asɛ to mabinɔɔrɛ la n boi tingɔŋɔ wa poan tara nɔyinɛ la.” Yomara la a tãpa la ani la lɛɛ gura se’em ma’a ti tinparɛ wa wan ta lebege paradiisi.​—Ym. 37:10, 11; Isa. 35:5.