Ba yuun dɔɣɛ mam la yuun 1934. Mam dɔɣereba yuun ze’ele la Switzerland ge kɛ̃’ɛra Timmins. Timmins boi la Ontario, Canada tiŋa poan ti ba tu’ura salema bim. Yuun 1939 bɔba ti mam ma yuun pɔsɛ kaala Watchtower magazine la ge me kena Yehowa Sɛɛradoma zamesegɔ. A yuun ni dekɛ la mam la n suurɔ bayoobi la za’a keŋɛ zamesegɔ. La yuun ka yue ti mam ma dɛna Yehowa Sɛɛradaana.

Mam sɔ puurɛ yuun ka pee la mam ma n de Yehowa Sɛɛradaana la. Mam ma yuun boti yelemɛŋɛrɛ yɛla la mɛ ge me yuun lu a suure ti a wan tara yelemɛŋɛrɛ bɔ’ɔra Yehowa. Hali yuun 1940 ti ba yuun dekɛ ba nu’o paɣelɛ Yehowa Sɛɛradoma tuuma zuo Canada tiŋa poan la, mam ma yuun kelum tara la yelemɛŋɛrɛ bɔ’ɔra Yehowa. Mam ma yuun kelum bɔ’ɔra mam sɔ gilema mɛ ge me ita en soŋa la ka pakɛ la mam sɔ n yuun ni tuura en la. A makesonɛ la soŋɛ mam la n suurɔ la mɛ ti to me pu’usa Yehowa. Tomam puurɛ yuun pee mɛ la to sɔ n yuun tee a puti’irɛ ge ka le daana to la.

Yuun 1950 sĩɔ saŋa ti mam yuun keŋɛ Theocracy Increase Assembly laɣesegɔ n boi New York City. Mam yuun sɔsɛ mɛ la mabiisi n boi tingɔŋɔ wa zɛ’ɛsi to’ore to’ore ge me yuun kelese mabisɛba n keŋɛ Gilead sukuu yɛla. Bala yuun kpemese mam giila mɛ ti mam bɔta ti n tuna Yehowa tuuma zɔ’ɔra. Mam yuun kɔ’ɛ la n puti’irɛ ti n pɔsɛ tɛm woo na’am tuuma la. Mam n yuun ze’ele laɣesegɔ la kule la, mam yuun gulesɛ la gɔŋɔ tisɛ  ti mam boti la n dɛna la sore ŋmɛ’adaana. Canada tigere yile la yuun gulesɛ la gɔŋɔ bo mam ge yeti la nari ti n muse ko’om yia. Mam yuun muse ko’om la October 1, 1950. Ŋmarega pooren ti mam yuun nyaa dɛna sore ŋmɛ’adaana ge ti ba yeti n keŋɛ Kapuskasing ta mɔɔla. Zɛ’an wa yuun zaaɛ mɛ la tomam n yuun kɛ̃’ɛri zɛ’an la.

Yuun 1951, uunɛ saŋa ti tigere yile la yuun yele Sɛɛradoma sɛba n yuun ta’an tɔɣera French yetɔɣum la ti ba ta’an keŋɛ Quebec tiŋa ta soŋɛ nɛresɛba n tɔɣeri French yetɔɣum la. Na’am mɔɔlegɔdoma yuun ka zo’e tiŋa la poan. Mam n yuun wuni French la Solemiine la zuo, mam yuun sakɛ ti n wan keŋɛ. Bala la, ba yuun yeti n keŋɛ Rouyn tiŋa. Mam yuun ka mi nɛnɛra bim. Wuu mam n puɣum yele ni se’em yia la, mam n yuun mi sɛla dela mabisɛka zɛ’an ti ba pa’alɛ mam ti n keŋɛ la. Sɛla woo yuun keŋɛ soŋa bo mam mɛ. Mam la Marcel yuun nyaa dela zɔsonɔ. Mam yuun nyaa ta dɛna la sore ŋmɛ’adaana n boi a to’ore. Yuuma anaasi ti mam dekɛ tum na’am mɔɔlegɔ tuuma la Quebec tiŋa.

Mam n yuun boi Quebec la, mam puurɛ yuun pee mɛ la ban yuun bo mam gɔŋɔ ti n wa’an South Lansing n boi New York ta keŋɛ Gilead sukuu kilaasi sɛka n pa’asɛ 26 la. To yuun ba’asɛ sukuu la February 12, 1956. Ba yuun yeti n keŋɛ tinsɛka yu’urɛ n nyaa de Ghana b bɔna West Africa la. Ge la yuun nari ti n lebe Canada tiŋa ta’an nyɛ n gɔnɔ la ge nyaŋɛ keŋɛ Ghana. Mam yuun ti’isɛ ti n wan kɛ̃ Canada la bakwai fii ma’a.

Mam yuun kɛ̃ Toronto paɛ la ŋmaresi siyopɔi ge nyaŋɛ nyɛ gɔnɔ la. Mam yuun kɛ̃’ɛri la Mabia Cripps la a deodoma zɛ’an. Bilam ti mam yuun baŋɛ ba bia Sheila. To yuun lɛɣɛ la taaba. Mam n yuun maaseni ti n yele en ti mam boti n di en mɛ la, ti mam gɔnɔ la wa’ana. Mam la Sheila yuun zusɛ yele la poan mɛ ge yuun kɔ’ɛ puti’irɛ ti la nari ti n keŋɛ Ghana. Ge mam la Sheila yuun kelum gulesa la gɔnɔ sɔsera la  taaba ti to baŋɛ nyaa to wan ta’an di taaba pooren. La yuun daɣɛ naana bɔ’ɔra tɔ ge pooren to yuun baŋɛ ti ton kɔ’ɛ to puti’irɛ se’em la n yuun ani soŋa.

Mam yuun dekɛ la ŋmarega ge nyaa paɛ Accra n boi Ghana. Mam yuun doose la zireŋa, ɔ̃ɔreŋɔ la alopele ge nyaa paɛ. Ba yuun basɛ ti mam dɛna la tinkãtɛ kaarɛdaana. Mam yuun kaari la Ghana zɛ’ɛsi zo’e zo’e la Ivory Coast (n nyaa de Côte d’Ivoire) la Togoland (n nyaa de Togo). Saŋa zo’e zo’e, mam ma’a n yuun ni tukera tigere la n bo mam loore sɛka la. Mam me yuun ni nɔŋɛ la n kena kaara mabiisi la!

Bakwai ba’asegɔ poan, ba yuun ni bo mam la tuuma ti n tum gingilega laɣesegɔ poan. To yuun nan ka tari Laɣesegɔ Zɛ’ɛsi. Bala la, mabiisi la yuun ni dekɛ la dɔɔrɔ la abɛ vuurɔ tĩ paɣesi, la wan eŋɛ se’em ti wuntɛɛŋa kan daam tɔ. Ton yuun ka tari frigi la zuo, to yuun ni gee dusi la basɛba basɛ mɛ la wan eŋɛ se’em ti la yele san ta pakɛ, to ku ba duɣɛ dia bo sɛba n keni laɣesegɔ la.

Yɛla ase’a n yuun ni eŋɛ laɣesegɔ la poan ti la dɛna yelɔ’ɔrɔ. Saŋa ase’a ti Herb Jennings, c n de satiŋa na’am yetɔɣum yalegerɛdaana yuun bɔ’ɔra yetɔɣum ti naahɔ ze’ele cafeteria la n boi zɛ’an la zɔ wa’an ton iti laɣesegɔ la zɛ’an na. A yuun wa’ana ze’ele la yetɔɣum bimbine la, la nɛreba la n zĩ zɛ’an la tiŋasuka. Herb yuun ka le tɔɣera, ti naahɔ la me ze’a bura. Mabiisi banaasi n yuun nyɔkɛ naahɔ la lebe cafeteria zɛ’an la, ti nɛra woo pa’ara nu’usi.

Dabese’a ti to ka ita laɣesegɔ la, mam yuun ni tara la The New World Society in Action sinii la pa’ala nɛresɛba n boi tinkpɛsi poan. Mam yuun ni dekɛ la tanpɛɛlega lu la dɔɔrɔ bayi bii tiisi bayi ge nyaa ni ŋmɛ sinii la ti nɛreba nyɛta dɛ tanpɛɛlega la zuo. Nɛreba la yuun nɔŋɛ ba bisa sinii la mɛ. Ba zo’e zo’e ka tabelɛ bisɛ sinii kurum. Ba yuun san bisɛ sinii la poan nyɛ nɛreba n museri ko’om, ba ni pa’ara la ba nu’usi. Sinii la yuun soŋɛ nɛreba ti ba baŋɛ ti Yehowa Sɛɛradoma boi la tingɔŋɔ wa zɛ’an woo ge me tara nɔyinɛ.

Mam yuun kɛ̃ Africa tiŋa la yuuma ayi. Mam puurɛ yuun pee mɛ ti n keŋɛ yuun 1958 satiŋa laɣesegɔ n boi New York City la. Sheila yuun boi la Quebec tiŋa dɛna sore ŋmɛ’adaana n boi a to’ore. A yuun wa’an laɣesegɔ la mɛ. Mam puurɛ yuun pee mɛ la mam n yuun le nyɛ  en la. To yuun guleseri la gɔnɔ sɔsera la taaba ge ton yuun nyaa nyɛ taaba la, mam yuun yele en yeti, mam boti n di en mɛ, ti a me yuun sakɛ. Mam yuun gulesɛ la gɔŋɔ bo Mabia Knorr d soke en yeti, Sheila wan nyaŋɛ keŋɛ Gilead sukuu ti mam la eŋa ta’an naɛ taaba bɔna Africa? A yuun sakɛ mɛ. La yuun ka yue ti Sheila wa’an Ghana. Mam yuun di en la Accra, October 3, 1959. Yehowa yuun kã bo to mɛ se’ere n sɔi la to dekɛ a pu’usegɔ la deŋɛ la nɛŋa to vom poan.

Yuun 1961 poan, ba yuun basɛ ti to keŋɛ ta bɔna la Cameroon. Ba yuun yele mam ti n keŋɛ ta soŋɛ ti ba yu’ɛ tigere yile. Bala la, mam yuun ka tari nɛŋa. Ban yuun loe mam ti n bisera tuuma la zuo, la yuun nari ti n zamesɛ yɛla zo’e zo’e. Yuun 1965 poan ti to yuun baŋɛ ti Sheila tari la puurɛ. Yelemɛŋɛrɛ la dela, la yuun kpe’em bo to mɛ ti to sakɛ ti to wan ta dɛna dɔɣereba. Ge pooren, to puurɛ yuun nyaa pee mɛ ti to maasena ti to lebe Canada. Sankaŋa mea nɔɔ ti susa’aŋɔ yele yuun paɛ tɔ.

Shiela puurɛ la yuun sa’am mɛ. Dɔgeta la yuun yele to ti bia la dela budibila. La gaŋɛ yuun pinuu n wana ge to ka makɛ tamɛ yele wa. La boi bim ti to puurɛ yuun ka pee la sɛla n eŋɛ la ge to yuun yee la Cameroon tuna tuunsɛka ti to nɔŋɛ paa la.

Ba yuun ni mɛlesa mabiisi la n boi Cameroon tiŋa poan mɛ, se’ere n sɔi la ba ka dekɛ bamea pa’asɛ nalɛɣerɛ yɛla poan. Voting saŋa ti la ni gaam be’ero. May 13, 1970 poan, sɛla ti to ka ti’isa de yele n yuun eŋɛ. Ba yuun dekɛ la ba nu’o paɣelɛ Yehowa Sɛɛradoma tuuma zuo. Gɔmɛt la yuun fã la to tigere yile la. To yuun kɛ̃ tigere yile la la ŋmaresi banuu ma’a. Bakwai poan, ba yuun dige mam la Sheila, la satiŋa na’am yetɔɣum yalegerɛdoma la za’a ba tiŋa la poan mɛ. La yuun kpe’em mɛ paa ti to basɛ mabiisi la ge keŋɛ, se’ere n sɔi la to yuun nɔŋɛ ba mɛ. To me yuun fabeli la sɛla n wan paɛ ba.

To yuun nyaa keŋɛ la France ta bɔna tigere yile la ŋmaresi siyoobe. Mam yuun boi la bilam ge kelum tiregera soŋera mabiisi la n boi Cameroon la. December 1970 poan ti ba tari to keŋɛ Nigeria tigere yile la. Sankaŋa ti Nigeria tigere yile la yuun pɔsɛ bisera to tuuma la Cameroon. Mabiisi la n boi Nigeria la yuun to’e to la soŋa. To yuun boi bim la yuuma zo’e zo’e tuna la pupeelum.

Yuun 1973 poan, sɛla n yuun eŋɛ ti la kpe’em bo to ti to kɔ’ɛ to puti’irɛ. Sheila yuun bɛ̃’ɛri mɛ paa ti la ka tana ita. To yuun boi la New York laɣesegɔ poan ti a yele mam yeti: “Mam nyaa taregɛ mɛ, mam kan le nyaŋɛ tɔ̃kɛ tuunɛ la. Mam kɔ’ɔn bɛ̃’ɛra mɛ saŋa woo.” Mam la eŋa naɛ taaba tum West Africa ti la gaŋɛ yuun 14. Mam puurɛ yuun pee mɛ la eŋa n naɛ la mam tum se’em la. Ge la yuun nari ti to eŋɛ teere yɛla ase’a poan. Ton yuun sɔsɛ ge zusɛ ba’asɛ la, to yuun kɔ’ɛ to puti’irɛ ti to wan  lebe la Canada tiŋa. Bilam ti ba wan ta ta’an bisɛ Sheila soŋa. Sɛla ka boi n yuun tabelɛ kpe’em bo to wuu ton yuun basɛ tɛm woo na’am tuuma la.

Ton yuun paɛ Canada la, mam zɔ ayima n boi Toronto n yuun bo mam tuuma. To yuun haɛ la deo ge da kuɣesi n ka ba’ɛ eŋɛ ligeri, la wan eŋɛ se’em ti to kan di sama zo’e. To yuun boti la to vom ana naana ti to san le ta nyɛ yɔ’ɔ, to ta’an tum tɛm woo na’am tuuma la. La yuun eŋɛ to la pakerɛ la ton yuun le nyɛ yɔ’ɔ la.

Ba yuun mɛti la Laɣesegɔ Zɛ’an Norval, Ontario tiŋa ti mam yuun ni kena soŋera Asibidaarɛ woo. Pooren ti ba yuun loe mam ti n bisera laɣesegɔ zɛ’an la. Sheila bã’a la n yuun sɔ̃ la, to yuun ti’isɛ ti a wan nyaŋɛ tum tuunɛ wa. Bala la, June 1974 poan ti to yuun keŋɛ ta kɛ̃’ɛra bim. To puurɛ yuun pee mɛ la ton le lebe tuna tɛm woo na’am tuuma la!

Yelesonɛ la dela, Sheila bã’a la yuun nyaa sɔ̃ mɛ. Yuuma ayi pooren ti ba yuun basɛ ti to tuna kaarɛ tuuma. Gingilega seko ti to yuun ni kaara la boi la Manitoba. Canada tinkaŋa ma’ari mɛ paa ge to puurɛ yuun pee mɛ la mabiisi la n yuun nɔŋɛ to se’em la. To yuun baŋɛ ti la daɣɛ ton boi zɛ’an la yele n pakɛ ge la dela to pu’usa Yehowa zɛsɛka woo ti to bɔna.

To yuun tum kaarɛ tuuma la yuuma zo’e zo’e, ti ba yuun nyaa yi to ti to wa’ana tuna Canada Betel yuun 1978. La yuun ka yue ti mam zamesɛ ninmu’urɛ yele. To yuun eŋɛ la laɣesegɔ n boi de to’ore Montreal ti ba yuun yeti n bo yetɔɣum awa ayima la girego French yetɔɣum poan. Mam n yuun bo’ori yetɔɣum la se’em la yuun ka basɛ ti mabiisi la puti’irɛ bɔna bim. Bala zuo ti mabia n ze’ele na’am tuuma wele la yuun ka’am mam. Yelemɛŋɛrɛ la dela, mam yuun nari ti n sakɛ ti mam ka mi pa’alegɔ soŋa soŋa. Ge mam yuun zaɣesɛ ka’aŋɔ la mɛ. Mam sunsɔa yuun nyie mɛ la en se’ere n sɔi la mam yuun ti’isɛ ti a tɔ la laɣi laɣi, a me yuun puɣum ka pɛ̃ɣɛ mam. Mam n yuun ti’isɛ mabia la n ka’am mam se’em, la mam mea n geele en se’em la n yuun basɛ ti mam ka to’e ka’aŋɔ la.

Dabesa fii pooren ti Tigere Yile Bisegadoma la ayima yi mam ti to sɔsɛ de yele. Mam yuun sakɛ ti mam tue mɛ la mam n ka to’e ka’aŋɔ la. Bala pooren ti mam yuun keŋɛ ta yele mabia la n ka’am mam la ti mam tue mɛ ti a me di sugeri bo mam. Bala yuun basɛ ti mam baŋɛ ti la yele pakɛ mɛ ti n siregera n mea. Mam kan makɛ tamɛ yele wa. (Mag. 16:18) Mam yuun zusɛ Yehowa mɛ sugumnɔɔrɛ zo’e zo’e yele wa poan. Mam nyaa lu n suure ti nɛra san ka’am mam, n kan zaɣesɛ.

Mam tum Canada Betel ti la gaŋɛ yuun 40 mɛ. Kɔ’ɔn pɔsɛ yuun 1985 poan ti mam nyɛ yɔ’ɔ pa’asɛ Canada Tigere Yile Bisegadoma la poan. February 2021 ti mam suure bunɔ Sheila ki. Mam suure sa’am mɛ la mam pɔɣa kum la. Mam me ka ba’ɛ tara paŋa bala. Ge Yehowa pu’usegɔ basɛ ti mam tara la pupeelum ti mam “ka tɛn’ɛhere yuuma n tole la yele.” (Pa. 5:20) La boi bim ti yeledaaŋɔ zo’e zo’e paari mam mɛ ge mam n nyɛ pupeelum se’em la gani yeledaaŋɔ la. Mam n dekɛ n mea delum Yehowa la basɛ ti mam tara la pupeelum. Mam boti la bunbilepaalesi me dekɛ Yehowa deŋɛ nɛŋa ba vom poan, se’ere n sɔi la mam mi ti bala n wan basɛ ti ba tara pupeelum zo’e zo’e. Yehowa pu’usegɔ ma’a n bo’ori pupeelum.