Tingɔŋɔ wa za’a poan, nɛreba zo’e zo’e loe ti ba kan ɔbera nɛnɔ.

•   The Vegan Society la yeti, “Nɛreba ti’isɛ ti ba san ka ɔbera nɛnɔ, bala wan basɛ ti ba kan kuura dusi ɔbera bii kuura ba tara maala lɔɣɔrɔ ase’a.”

 Nɛreba basɛba n ka oberi nɛnɔ la yeen daɣɛ la ba fabeli la dusi yele ma’a ge la ta’an dɛna la ba imma’asum bii ba pu’usegɔ yɛla zuo.

•   Britannica Academic yeti, “Nɛreba basɛba n ka oberi nɛnɔ la dela bamea puti’irɛ bii ba sakerɛ yɛla ti la nara ti ba dɔla, la wan eŋɛ se’em ti tingɔŋɔ la ta’an sɔ̃na bɛ’ɛna.”

 Nɛreba basɛba n ka oberi nɛnɔ la wan ta’an basɛ ti tinparɛ wa tee ana soŋa yoi? Baabule la yeti bem?

 Baabule la yeti to Naaŋɔdaana, Yehowa Naayinɛ a nɔŋɛ nɛreba yele gana dusi mɛ ge me bo asaala kpe’eŋo ti ba bisera dusi. (Pin’ileŋɔ 1:27, 28) Pooren ti Naayinɛ yuun bo yɔ’ɔ ti nɛreba kuura dusi ɔbera. (Pin’ileŋɔ 9:3) Ge a ka boti to vɛɣena dusi.​—Magaha 12:10.

 Baabule la yeti, se’em n boti, a ta’an ku duŋa obe. b La daɣɛ ton loe sɛla la n wan pa’alɛ ti to dela nɛresondoma Naayinɛ nɛŋan. (1 Korint 8:8) Se’em da zɛregɛ atadaana la eŋa n diti sɛla.​—Arom 14:3.

 Baabule la basɛ ti to baŋɛ ti ton vɔi to vom se’em la kan ta’an yese asaala yeledaaŋɔ. Tingɔŋɔ wa nalɛɣerɛ yɛla, leebego yɛla, la yɛla ase’a n ta’asɛ ti yɛla gaam be’ero wana wa. Asaala me kan ta’an maalɛ yele aŋa. Baabule la yeti:

•   ‘Sɛla n ŋmɛlegɛ kan le tĩɛ.’​—Pa’ala 1:15.

 To Naaŋɔdaana la wan maalɛ yelese’a n paari to la. Baabule la dekɛ la maɣesa tɔɣɛ pa’alɛ eŋa n wan eŋɛ se’em.

•   ‘Mam nyɛ la saazuo paalega, la tingɔŋɔ paalega; saazuo kɛka, la tingɔŋɔ kɛka la ka le bɔna ge ti ateko ko’om la me ka le bɔna.’​—Liligere 21:1.

 Naayinɛ wan tee asaala gɔmɛt bii dekɛ ‘saazuo paalega la,’ tee soe ‘saazuo kɛka la.’ Saazuo paalega la dela A saazuo Na’am la. Naayinɛ Na’am la wan yese ‘tingɔŋɔ kɛka la,’ n de nɛresɛba n de putɔpa la ge wan ta bisera ‘tingɔŋɔ paalega la,’ n de nɛresɛba n nani en la.

 La dela Naayinɛ Na’am la ma’a poan ti asaala, la dusi wan naɛ taaba bɔna la suma’asum.​—Isaiah 11:6-9.