Ho san tara intanɛt tuna tuuma, kɔ’ɔn mina ti ho ta’an nyɛ yalumfɔɔra. Hayley n de yuun 17 yeti, “Ho puɣum ka le nara ti ho ɛ lan boi zɛ’an. Yalumfɔɔra la mea n ni kɔ’ɔn ɛ̃kɛ na.”

 Yalumfɔɔra bisega ta’an kelum dɛna bɛ̃regɔ bɔ’ɔra sɛba n lu ba suure ti ba kan bisa ba. Greg n de yuun 18 yeti, “Mam yuun yele n mea yeti mam kan makɛ bisɛ ba ge mam yuun ta bisɛ mɛ. Ho kan ta’an yeti hon kan makɛ bisɛ ba.”

 Zina beere wa, la ka kpe’em ti ho nyɛ yalumfɔɔra bisɛ. Bunbilipaalesi zo’e zo’e n ni kɛ bamea yalumfɔɔra, tara tɔ̃ta.

 Yelekpine: Ho dɔɣereba n yuun zuni la ho la, la yuun ka kpe’em bo ba wuu lan kpe’em bo ho se’em la. Sokere la dela, Ho wan ta’an zaɣesɛ yalumfɔɔra bisega?​​—Yooma 97:10.

 Lebesego la dela ɛɛ. Ho wan ta’an zaɣesɛ, ho san loe ti ho eŋɛ bala. Ge yia la, la nari ti ho sakɛ ti yalumfɔɔra bisega ka ani soŋa. Basɛ ti to geele sɔlema la yelemɛŋɛrɛ yɛla n tɔɣeri yalumfɔɔra bisega yele.

 Sɔlema: Yalumfɔɔra bisega kan daam mam.

 Yelemɛŋɛrɛ: Wuu sigaari nyua n sa’ani ho safulufuto la se’em la, yalumfɔɔra bisega me sa’ani ho puti’irɛ la bala. La sa’ani ho mɛ. Wana wa ka basɛ ti gilema bɔna Naayinɛ n naam buraa la pɔka ti ba tara ga’aregɔ poan pupeelum pɔɣedire poan se’em la. (Pin’ileŋɔ 2:​24) Bala ta’an basɛ ti som la be’em yele kan le pakɛ hɔ. Makerɛ, gɔnmi’ileba basɛba yeti buraasi n biseri yalumfɔɔra ta’an bisɛ ti, nɛreba n vɛɣeni pɔɣesi daɣɛ be’em.

  Baabule la pa’alɛ ti nɛreba basɛba ‘ka tari valum la fii me.’ (Epesus 4:19) Ba putɛkeeŋa la ni sa’am mɛ, ti hali ba san tuna be’em, la ka daani ba.

 Sɔlema: Yalumfɔɔra bisega ta’an pa’alɛ hɔ ga’aregɔ yɛla.

 Yelemɛŋɛrɛ: Yalumfɔɔra bisega pa’ali hɔ ti ho ti’isa la ho ma’a yele. La basɛ ti la ana wuu nɛreba dela lɔɣɔrɔ ti ho tara tuna ho kunkoma’asum n boti se’em. La daɣɛ pakerɛ la ban viisɛ baŋɛ ti nɛresɛba n biseri yalumfɔɔra ta’an kan tara pupeelum ga’aregɔ poan ba san ta di pɔɣa bii ele sira.

  Baabule la yele Kristakɔma yeti ba zaɣesɛ yelese’a n basɛ ti nɛreba bisa yalumfɔɔra n de wuu ‘yalumtuuma, dɛ̃ɣerɔ tuuma, ga’aregɔ poan kunkoma’asum ti to ka ta’an nyɔkera tomea, kunkoma’asum be’ero la nyika.’​​—Kolose 3:5.

 Sɔlema: Sɛba n ka biseri yalumfɔɔra ka nɔŋɛ ba kɛlesa ga’aregɔ yɛla.

 Yelemɛŋɛrɛ: Nɛresɛba n zaɣesɛ yalumfɔɔra bisega n tuɣum tara putɛsonɛ ga’aregɔ yɛla poan. Ba bisɛ ti la dela bo’olum n ze’ele Naayinɛ zɛ’an ti la soŋɛ buraa la pɔka n di taaba ti ba pɔɣedire la ana kankaŋi. Ba dela sɛba n ni tara pupeelum zo’e zo’e ga’aregɔ poan, ba san ta di pɔɣa bii ele sira.

  Baabule la kɔ’ɔn tɔɣɛ ga’aregɔ yele mɛ. Makerɛ, la yele sireba ti: ‘Tara pupeelum la pɔɣesɛka ti ho di en ho bunbilimen la. Basɛ ti a nɔŋerɛ la nyaŋɛ ho saŋa woo.’​​—Magaha 5:​18, 19.

 La kpe’em bo ho mɛ ti ho zaɣesɛ yalumfɔɔra bisega? Worksheet la zuo n de “How to Reject Pornography” (Ho Wan Eŋɛ Se’em Zaɣesɛ Yalumfɔɔra Bisega) la ta’an soŋɛ hɔ.

 Tara suure lua ti ho wan ta’an zaɣesɛ yalumfɔɔra bisega. Ho san puɣum pɔsɛ bisera yalumfɔɔra, ho wan ta’an tiregɛ basɛ ba bisega. Ho san ita bala, la wan soŋɛ hɔ.

 Geele Calvin yele wa bisɛ. A yuun dela yuun 13 ge pɔsɛ bisera yalumfɔɔra. Calvin yeti, “Mam yuun mi ti la dela be’em ge mam yuun kan ta’an zaɣesɛ ti n kan bisɛ. Mam san ni bisɛ ba’asɛ, mam ni ani la bura. Pooren, mam sɔ yuun baŋɛ mɛ. Yelemɛŋɛrɛ, bala yuun basɛ ti mam vo’ose la fũu! Mam yuun nyaa nyɛ soŋerɛ mɛ.”

 Calvin nyaa zamesɛ baŋɛ eŋa n wan se’em zaɣesɛ yalumfɔɔra bisega. A yeti: “Yalumfɔɔra bisega dela tuure kãtɛ n kelum daana mam, se’ere n sɔi la fɔɔra la ni wa’an mam puti’irɛ poan mɛ. Saŋa ase’a me, la ni ana mam wuu n le ta bisɛ la. Ge mam ni tuɣum ti’isɛ la beere sa’am mam wan tara pupeelum, ana kasi ge ti la ana soŋa bɔ’ɔra mam se’em n san dɔla Yehowa pa’alegɔ.”