“Tari ya pupeelum beere sa’am puti’irɛ la poan. Ŋmiberi ya namesegɔ poan. Kɔ’ɔn zuseri ya.”​—Arom 12:12, New World Translation.

 ‘Basɛ ya ti sɛla ti ya gura la basɛ ya ti ya tara pupeelum. Tari ya sugeri ya daaŋɔ poan ge me kɔ’ɔn zusera ya Naayinɛ daarɛ woo.’​—Arom 12:12, English Standard Version.

 Tuuntuna Paul yuun kpemese Kristakɔma n boi Arom tiŋa giila ti ba eŋɛ yɛla atã n wan soŋɛ ba ti ba tara yelemɛŋɛrɛ, la ka pakɛ yaarɛ bii yeledaaŋɔ seko poan ti ba bɔna.

 “Tari ya pupeelum beere sa’am puti’irɛ la poan.” Kristakɔma tari la beere sa’am puti’irɛ n ani soŋa ti ba wan ta vɔna daarewoo. Basɛba wan bɔna saazuo ti zo’e zo’e me bɔna tingɔŋɔ wa zuo, paradiisi poan. (Yooma 37:29; Yon 3:16; Liligere 14:1-4; 21:3, 4) Beere sa’am puti’irɛ wa dela Naayinɛ Na’am a la a n wan yese asaala yeledaaŋɔ woo basɛ. (Daniel 2:44; Matu 6:10) Sɛba n pu’useri Naayinɛ soŋa soŋa la puurɛ ta’an pee hali la wuŋerɛ poan, se’ere n sɔi la ba mi ti ba beere sa’am puti’irɛ wa kan basɛ yoo. Ba me mi ti ba san nyaŋɛ ŋmibe soŋa soŋa, Naayinɛ puurɛ wan pee la ba.​—Matu 5:11, 12; Arom 5:3-5.

 “Ŋmiberi ya namesegɔ poan.” Baabule la poan, Greek yelebire n de “ŋmibe” ti ba dekɛ tum tuuma la ta’an pa’alɛ hon wan “zɛ kankaŋi ge ka bikera; hon wan ŋmibera yelese’ere woo poan.” Krista podɔleba mi ti ba “ka pa’asɛ tingɔŋɔ wa yɛla poan,” b bala la, ba mi ti yaarɛ wan paɛ ba ti la nara ti ba ŋmibera. (Yon 15:18-20; 2 Timoti 3:12) Kristabia san ŋmibera kankaŋi pu’usa Naayinɛ hali la gurebisɛ poan, a sakerɛ wan kpe’em Naayinɛ poan ti a mina ti a kan basɛ en. (Matu 24:13) A sakerɛ la me wan soŋɛ en ti a ta’an di’isa suure ŋmibera wuŋerɛ poan ge tara pupeelum.​—Kolose 1:11.

 “Kɔ’ɔn zuseri ya.” Ba kpemese Kristakɔma giila ti, ba san bɔta ti ba sakerɛ kpe’em Naayinɛ poan, la nari ti ba kɔ’ɔn zusa en. (Luke 11:9; 18:1) Ba vom yɛla woo poan, ba kɔ’ɔn ɛɛra la Naayinɛ pa’alegɔ ge me dekɛ bamea delum en. (Kolose 4:2; 1 Tesalonika 5:17) Ba tari suure lua ti Naayinɛ wan bo ba, ban zuseri ɛɛra sɛla la se’ere n sɔi la, ba nani a nɔya la mɛ ge ãregera bamea tuna ti a puurɛ pɛɛra. (1 Yon 3:22; 5:14) Ba me mi soŋa soŋa ti ba san kɔ’ɔn zusera, Naayinɛ wan basɛ ti ba sakerɛ la kpe’em ti ba ta’an ŋmibe la ka pakɛ la gurebisɛ la.​—Filipi 4:13.

 Yuun 56 Y.B poan ti Paul yuun gulesɛ gɔŋɔ bo Kristakɔma n yuun boi Arom tiŋa poan la. Gɔŋɔ wa a zuo pia la bayi pa’alɛ Kristakɔma wa mɛ ba wan eŋɛ se’em ta’an tara halesoma, ta’an tara bɔnsoŋa la taaba ge me kelum tara suma’asum ba san puɣum mɛlesa ba. (Arom 12:9-21) Ka’aŋɔ kuna wa yuun kɔ’ɔn nara mɛ bo Arom Kristakɔma sankaŋa, se’ere n sɔi la, la yuun ka yue ti yaarɛ paɛ ba.

 Yuuma fii pooren n de yuun 64 Y.B. poan ti bugum yuun di Arom tiŋa. Nɛreba yuun kɔ’ɔn tɔɣera ti Naba Nero n ta’asɛ. Tacitus n de Arom tiŋa nɛra n guleseri diimi yɛla yeti Nero yuun tee dekɛ yele la baɣelɛ la Kristakɔma zuo, la wan eŋɛ se’em ti yele da paɛ en. Wana wa yuun basɛ ti ba kɔ’ɔn mɛlesa Kristakɔma mɛ. Paul n yuun pa’alɛ ba bamam n wan eŋɛ se’em ta’an ŋmibera yaarɛ poan la, yuun soŋɛ ba mɛ ti ba ta’an tara sakerɛ ge ŋmibe gurebisɛ wa poan ti vi ka tara ba. (1 Tesalonika 5:15; 1 Peter 3:9) Ba makesonɛ la kɔ’ɔn nara mɛ ti sɛba n pu’useri Naayinɛ zina beere wa la tɔɣesa.

 Bisɛ vidiyo gi’a wa nyɛ Arom gɔŋɔ la yelekpina.