Ko’om musega dela ho dekɛ nɛra inya za’a muse ko’om poan ge yese en na. a Bala n sɔi ti ba yuun muse Yezu ko’om kolega poan la. (Matu 3:​13, 16) Bala mea nɔɔ, ti Etiopia buraa n yuun ta pɔ̃ra “bɔka poan” la a yuun yeti ba muse en ko’om.​—Tooma 8:​36-​40.

Ko’om musega vuurɛ

 Baabule la dekɛ ko’om musega makɛ la ba ni laɛ nɛra se’em. (Arom 6:4; Kolose 2:​12) Ko’om musega ze’ele bo la nɛra n basɛ eŋa n yuun vɔi a vom se’em ge eŋɛ teere dɛna Kristabia n kã amea bo Naayinɛ. Naayinɛ eŋɛ la maaseŋɔ ti nɛreba ta’an tara putɛkeeŋa n ani fa’a doose Yezu Krista kum la poan. Ge ti bala nyaŋɛ tum la, la dela to eŋɛ yela ase’a ge nyaa ta’an muse ko’om. (1 Peter 3:​21) Bala ti Yezu yuun pa’alɛ ti la nari ti a podɔleba la muse ko’om.​—Matu 28:19, 20.

Ko’om musega duuseri be’em mɛ?

 Aayi. Baabule la pa’alɛ ti to wan ta’an duusi to be’em doose la Yezu kum la poan ma’a. (Arom 5:8, 9; 1 Yon 1:7) To san wan nyɛ nyuurɔ Yezu kum la poan, la nari ti to tara sakerɛ a poan, eŋɛ teere to vom poan ti la makɛ la Yezu pa’alegɔ la ge nyaa muse ko’om.​—Tooma 2:​38; 3:​19.

Baabule la pa’alɛ ti bilia wan nyaŋɛ muse ko’om?

 Aayi, la ka pa’alɛ bala. Zɛ’an ka boi Baabule la poan n pa’alɛ ti ba “muse bilia ko’om.” Pu’usegɔdoma basɛba ni ka’ɛ bii eŋɛ la ko’om miise bilia zuo ge nyaa siɣɛ en.

 Nɛresɛba n wan ta’an muse ko’om dela sɛba n garegɛ yɛm ge wan nyaŋɛ bɔkɛ “Yenɛ Sɔ’ɔlom la” yelesoma la (Tooma 8:​12) La dela nɛra wum Naayinɛ yelesum la, sakɛ bo ge nyaa eŋɛ teere. Bilia kan nyaŋɛ eŋɛ bala.​—Tooma 2:​22, 38, 41.

 Leyɛ’ɛsa, Baabule la pa’alɛ ti Naayinɛ geele kɔma sɛba dɔɣereba n pu’useri Yehowa la ti ba dela zilam se’ere n sɔi la ba dɔɣereba pu’useri en mɛ la yelemɛŋɛrɛ. (1 Korint 7:​14) La san dɛna ti kɔma wan nyaŋɛ muse ko’om, la yele yi ka pakɛ ti ba dɔɣereba ze’ele bo ba. b

Nɛreba n ti’isɛ se’em la Kristakɔma ko’om musega

 Nɛreba N Ti’isɛ Se’em: Ho ta’an dekɛ ko’om miise bii ka’ɛ yeele nɛra zuo ti la ze’ele bo hon dekɛ nɛra la inya za’a muse ko’om poan.

 Yelemɛŋɛrɛ: Ko’om musega woo ti Baabule la tɔɣɛ de yele la, ba ni kɔ’ɔn dekɛ nɛra la inya za’a muse la ko’om poan. Makerɛ, Filip n yuun yeti a muse Etiopia buraa la ko’om la ba “sige keŋɛ bɔka la poan” mɛ ta muse ko’om. Ba ba’asɛ la, “ba nya yehe la ko’om la poan na.”​—Tooma 8:​36-​39. c

 Nɛreba N Ti’isɛ Se’em: Baabule la pa’alɛ ti yizuto yuun san yeti ba muse ko’om, ba kɔma ni pa’asɛ bim mɛ. Makerɛ, la tɔɣɛ paɣera n boi Filipi tiŋa yele ti: ba yuun “bo enŋa la a yiredoma la ko’om soa”​—Tooma 16:31-​34.

 Yelemɛŋɛrɛ: Paɣera wa yele la basɛ ti to baŋɛ ti sɛba woo n yuun muse ko’om la yuun bɔkɛ ‘Yehowa yɛla’ mɛ ge ti ba ‘puurɛ yuun pee zoe zo’e.’ (Tooma 16:32, 34) Yele ana wa za’a basɛ ti to bɔkɛ ti kɔma sɛba n yuun boi paɣera wa yire la yuun ka laɣum muse ko’om se’ere n sɔi la, ba yuun kan bɔkɛ Yehowa yɛla.

 Nɛreba N Ti’isɛ Se’em: Yezu n yuun pa’alɛ ti saazuo Na’am la wan dɛna la kɔma dene la ge me yuun nyɔkɛ kɔma dekɛ a nu’o paɣelɛ ba zuo la pa’alɛ ti ba ta’an musa kɔmbilɛɛsi ko’om.​—Matu 19:13-15; Mark 10:13-​16.

 Yelemɛŋɛrɛ: Yezu yuun ka sɔseri ko’om musega sɔsega se’em ma’a ti a yuun yele bala la bii se’em ma’a ti a yuun dekɛ a nu’usi paɣelɛ kɔma la zuo la. Ge, a yuun tuɣum pa’alɛ ti la nari ti sɛba woo n wan kɛ̃ Naayinɛ Na’am la poan la ana wuu kɔma, siregera bamea ge nana pa’alegɔ.​—Matu 18:4; Luke 18:16, 17.