Asaala woo tari yumɛŋɛrɛ mɛ. Yɛm kan bɔna bim ti Naayinɛ me tara yu’urɛ? Nɛreba san tara ba yumɛŋɛrɛ yi’ira taaba, la ni basɛ ti ba zɔtɔ nyɔka la kpe’em mɛ. Yele dena nari ti la bɔna la de to’ore to san bɔta ti to nyɔɣɛ Naayinɛ zɔtɔ yoi?

 Baabule la poan, Naayinɛ yeti: ‘Mam dela Yehowa, Mam yu’urɛ n bala.’ (Isaiah 42:8) La boi bim ti a tari na’asegɔ yu’ura mɛ n de wuu “Paŋa Za’adaana Naayinɛ,” “Sɔ’ɔlum Za’adaana,” la “Naaŋɔdaana” ge a na’asɛ a nɛreba mɛ bo ba yɔ’ɔ ti ba tara a yumɛŋɛrɛ la yi’ira en.​—Pin’ileŋɔ 17:1; Tooma 4:24; 1 Peter 4:19.

 Baabule leregere zo’e zo’e tari Naayinɛ yumɛŋɛrɛ la mɛ ti la bɔna Yɛhega 6:3. Gulesegɔ kaŋa yeti: ‘Mam niɛ n mea la n yu’urɛ se’ere n de Paŋa Za’adaana Naayinɛ la pa’alɛ Abraham, Isaak la Yakob ge mam ka niɛ n mea yu’urɛ se’ere n de Yehowa wa pa’alɛ ba.’

 Naayinɛ yu’urɛ solemiine poan dela Jehovah ti ba dekɛ tum tuuma yuuma zo’e zo’e n wana. Gɔnmi’ileba zo’e zo’e ni bɔta ba gulesa dɛ la “Yahweh” ge nɛreba zo’e zo’e mi la Yehowa la. Ba yuun pɔsɛ dekɛ la Hebru yetɔɣum gulesɛ Baabule la ge daɣɛ solemiine poan, yetɔɣesebo n bala ti ba ni pɔsɛ kaala ze’ele zuɔ yɛ’a gɔbega. Yetɔɣedena poan, ba dekɛ la yeledaasi anaasi יהוה, gulesɛ saazuo daana la yu’urɛ. Ba lerege yeledaasi anaasi wa solemiine poan la YHWH, se’em ti ba yi’ira ti Tetragrammaton.