Nɔ Mɔnú Zɛ̀ Yèɖɔ-Yèɖɔ lɛ Go
Nuxahun Lɔ
To kpaa mɛ, wunvi wɛ nɔ zɔ́n bɔ mǐ nɔ ɖó nuvɛun. Ði akpajlɛ̌:
-
Ogán ɖélɛ nɔ lɛnɖɔ nyɔnu lɛ ma gán wà xúhlɔn-zɔ́n kavǐ azɔ̌n xe nɔ byɔ́ ɖɔ yè ni lɛnnukpɔ́n susu.
-
To xóxó ɖayǐ, mɛlɛ nɔ lɛn to Europe ɖɔ Ju lɛ nɔ kɔ̀n nuɖiɖo dó dótɔ̀ lɛ mɛ, bo nɔ dóazɔ̀n mɛlɛ. To ganɖuɖu Nazi lɛ tɔn hwenu, yè sɔ́ dóajàn yětɔn bo ɖɔ ɖɔ to jlɛ lɔ mɛ, yelɛ wɛ zɔ́n bɔ kwɛ́ dó hán to Allemagne. Enɛ lɛkpó wɛ zɔ́n bɔ mɛlɛ dó gbɛ́wǎnna Ju lɛ bo dóyana yé tawun. Kpóɖɔ, nuvɛun enɛ ma o busɛ kpéte.
-
Mɛsusu wɛ nɔ lɛnɖɔ mɛe ɖó blɔ lɛ nɔ nɔ̀ awubla mɛ kavǐ nɔ fiɛ.
Mɛe nɔ yí linlɛn agɔ̀ enɛlɛ sè lɛ tlɛ nɔ ná akpajlɛ̌ ɖélɛ kavǐ kpìntàn ɖélɛ nadó dóxya ɖɔ nǔgbó ɖɔ wɛ emi te. Kpóɖɔ enyí mɛɖé gbɛ́ hó yětɔn, yé nɔ lɛnɖɔ wunvinɔ wɛ nyí mɛlɔ.
Ayinamɛ Biblu Tɔn
“Mɛxe ma tindó onywɛ ma nyí mɛɖagbe.”—XÓHWINHWƐ́N LƐ 19:2.
Etɛ́wɛ wěfɔ lɔ to kpínkplɔ́n mǐ? Enyí mǐ ma nɔ mɔdóna hó lɛ ganji, mǐ ná nɔ wá taɖona agɔ̀ kɔ̀n. Nyí mǐ nɔ yí yèɖɔ-yèɖɔ lɛ sè, mǐ ná nɔ cì hwɛdana mɛlɛ.
Yèɖɔ-Yèɖɔ lɛ Nyí Owùnu
Enyí mǐ ma nɔ ná tó yèɖɔ-yèɖɔ lɛ, mǐ maa nɔ yawu lɛn nú agɔ̀ gandó mɛlɛ go. Kpóɖɔ, hwenue mǐ wá mɔɖɔ nue mǐ sè gandó gbɛtɔ́ wunmɛ ɖélɛ go ma nyí nǔgbó, mǐ gán mɔɖɔ nue mílɔsu nɔ lɛn gandó mɛɖévo lɛ go ma nyí nǔgbó.
Nue A Gán Wà
-
Mɛlɛ nɔ saba tlɛ́ nyǐkɔ dókɔna akɔ̀ kavǐ kpíkpli lɛ. Amɔ́, enɛ ma dóxya ɖɔ mɛe to akɔ̀ kavǐ kpíkpli lɔ mɛ lɛkpó wɛ jɔ mɔ.
-
Nywɛ ɖɔ nue mǐ nɔ sè gandó mɛɖévo lɛ go gán nɔma nyí nǔgbó mlɛnmlɛn.
-
Nɔ dindóna hwɛxo lɛ to fie a gán mɔ nǔgbó yětɔn te.
