Adángbòmɛ nɔ hɛnnugble to mɛgo janwɛ, vlavo yè ɖoayi é go kavǐ yè ma ɖoayi é go.

• Adángbòmɛ gán ɖó lɛnkpɔ́n namɛ, kpóɖɔ lɛnkpɔ́n glanglan gán wá zɔ́n bɔ yè ná nɔ yawu jɛ awutu.

• Ahwàn, ayigba sisɔsisɔ, kavǐ onǔ mɔnkɔ lɛ gán zɔ́n bɔ doto, amasin kpó nukúnkpédómɛgo dotoxwé tɔn xe jɛ kpó ná hán.

• Enyí bɛwlu byɔ́ otò ɖé mɛ, akwɛ́ ma nɔ byɔ́ xwégbè ɖi ɖayǐ ba, é nɔ vɛawu nadó mɔ dandannu lɛ tayiɖi núɖùɖù xe nɔ namɛ hunsinɖagbe, amasin kavǐ nadó yì dotoxwé.

• Mɛxe to azɔ̀n sínsínnyɛ jɛ kavǐ to ayimajai mɛ gán nɔma lɛnnukpɔ́n ganji ba bo dóvɔ́na aca xe ná zɔ́n bɔ é ná to ganji to agbasa mɛ lɛ. Kpóɖɔ é nyɔbasí ɖɔ mɛlɔ ni wá kpò ná azɔ̀n.

• Azɔ̀n xe go yè ma kpénukúndó ganji lɛ gán vantan bo tlɛ gán wá hùmɛ.

• É nɔ bɔawu húgǎn ná mɛxe to jogún-jogún nadó basí nuɖiɖe ɖagbe lɛ to ninɔmɛ sínsínnyɛ lɛ mɛ.

• Vlavo a nyí adɔkunnɔ kavǐ wamɔnɔ, a gán wà nuɖelɛ nadó nɔ ganji to agbasa mɛ.

Hweɖekpókpénu xe é nyɔbasí, mɛxe nyí nunywɛtɔ nɔ tɛnkpɔ́n nadó mɔ owù xe é gán kpéxɛ́ lɛ hlán bo nɔ zé afɔɖiɖe lɛ nadó dakpana yé. A gán wà nuɖokpólɔ ma nadó jɛazɔ̀n. Wiwejininɔ nɔ zɔ́n bɔ yè ma nɔ yawu jɛazɔ̀n ɖélɛ, kpóɖɔ enyí yè tlɛ wá bɛ́ janwɛ, é ma ná sínnyɛ sɔmɔ. É kpɔ́nte ɖɔ yè ni xɔ́ mɛɖé nadó nɔ jogún-jogún xú ɖɔ yè ni wá zán akwɛ́ dó amasin mɛ.

“Mǐ nɔ hɛn míɖe kpó oxwé mǐtɔn kpó dó wiweji. Enɛ ko gɔ́alɔna mǐ ma nadó gbɔ dó dotoxwé kavǐ hɔ̀ amasin sɔmɔ.”—Andreas. a