TO AGƆE, WENYWƐTƆ LƐ KO BASÍ DODINNÁNǓ SUSU GANDÓ AWUFIƐSÀ XE OKÚ MƐVIVƐ́ ÐÉ TƆN NƆ HƐNWA GO. Amɔ́, ɖilě xósɔ́ xe jɛnukɔn lɛ dóxya ɖó, ayinamɛ ɖagbe húgǎn lɛ nɔ saba nyí ɖexe sɔgbe xɛ́ anǎɖemɛ nǔnywɛ tɔn lɛ xe Biblu ko ná sɔ́n ojlɛ̌ dindɛn ɖie gbɔ̌n. Exe dóxya ɖɔ anǎɖemɛ xe to Biblu mɛ lɛ ma nɔ dóxó gbeɖe. Etomɔco, gbɔnvona ɖɔ Biblu bɛ́ ayinamɛ ɖejidego lɛ hɛn, é sɔ́ nɔ ná nuɖɔnamɛ lɛ xe ma gǎn nyí mimɔ to fiɖevo ɖékpókpé bosɔ nɔ miɔnxomɛna mɛxe to awubla lɛ tawun.

• Jiɖiɖe lɔ ɖɔ mɛvivɛ́ mǐtɔn xe kú lɛ ma to yaji

  Biblu ɖɔ to Yɛhwexoɖɔtɔ́ 9:5 mɛ ɖɔ, “ocíɔ lɛ ma nyɔ́ nuɖékpókpé.” Enyí mɛɖé kú, “linlɛn etɔn lɛ nɔ sudó.” (Salmu lɛ 146:4) Abajɔ Biblu dó yí okú jlɛdó amlɔn yìkànmɛ go.—Johanu 11:11.

• Yise lɔ ɖɔ Jixwéyɛxwe owǎnyinɔ ɖé tíin nɔ miɔnxomɛna mí

  Biblu ɖɔ to Salmu lɛ 34:15 mɛ ɖɔmɔ: “Nukún Jehovah a tɔn tíin to dǒdónɔ lɛ jí, otó etɔn sɔ́ nɔ hùn hlán axwágbe yětɔn ná alɔgɔ́.” Nǔxe to ahun jí ná mǐ lɛ ɖiɖɔna Jixwéyɛxwe to oɖɛ̀ mɛ nɔ miɔnxomɛna mǐ hú xoɖiɖɔ xɛ́ mɛɖévo ɖékpókpé. Hú kpókpólɛkpó, é sɔ́ nɔ zɔ́n bɔ mǐ nɔ vɛ́ xɛ́ Mɛdatɔ́ mǐtɔn, mɛxe gǎn yí xúhlɔn etɔn dó gɔ́alɔna mǐ.

• Toɖiɖo lɔ ɖɔ sɔgódo ɖagbe ɖé to nukɔn ja

  Kpɔ́n lěxe é ná nyɔ́ ɖó hwenue Jixwéyɛxwe ná wá fɔ́n mɛxe to yɔdò mɛ lɛ wá ogbɛ̀ to ayigba jí! Biblu ɖɔxo ojlɛ̌ enɛ tɔn hwlasusu. Nadó basí zɛɛmɛ lěxe nulɛ ná te to ayigba jí to hwenɛnu ɖó tɔn, Biblu ɖɔ ɖɔ Jixwéyɛxwe “nasɔ́ súnsún ɖasin lɛkpó sɛ̀ sɔ́n nukún [mǐtɔn] mɛ, okú ma nasɔ́ tíin ba, mɔ̌jánwɛ alùɛmɛninɔ kavǐ avǐ kavǐ awufiɛsà ma nasɔ́ tíin ba.”—Osɔ́xya 21:3, 4.

Susu mɛxe tindó yise to Jehovah, yèɖɔ Jixwéyɛxwe xe nyí asisa Biblu tɔn mɛ lɛ tɔn, wɛ ko kpénǔgo nadó ɖoakɔ́nna awufiɛsà yětɔn, ná yé to nukúnɖo nadó gɔ̀ mɛvivɛ́ yětɔn lɛ mɔ. Ði akpajlɛ̌, Ann, yèɖɔ nǎwe ɖé xe ko nɔkpɔ́ xɛ́ asu etɔn ná oxwe 65 hwɛkpó é dó kú ɖɔmɔ: “Biblu ná mi jiɖe ɖɔ mɛvivɛ́ mǐtɔn lɛ ma to yaji, kpóɖɔ Jixwéyɛxwe ná fɔ́n mɛxe to oflǐn etɔn mɛ lɛkpó. Linlɛn exe wɛ nɔ gɔwá ayixa mɛ ná mi hweɖekpókpénu xe n’flǐn okú etɔn, kpóɖɔ exe zɔ́n bɔ n’tlɛ nɔ kpénǔgo nadó ɖoakɔ́nna adán ɖaxo xe gbò mi!”

Tiina xe go mǐ dónù to ɖokpó to xósɔ́ xe wayi lɛ mɛ ɖɔmɔ: “Sɔ́n gbeegbe Timo kú gbɔ̌n wɛ n’ko mɔ alɔ Jixwéyɛxwe tɔn. N’mɔɖɔ Jehovah gɔ́alɔna mi tawun to hwenue adán gbò mi. Kpóɖɔ okpagbe Biblu tɔn gandó fɔnsɔnku go ma nyí odlɔ ná mi. É to xúhlɔn ná mi nadó to nukɔnzíndó kakajɛ gbeegbe n’ná gɔ̀ Timo mɔ.”

Nǔxe omɛ exelɛ ɖɔ wɛ gbɛtɔ́ livi susu ɖevo lɛ lɛn ga, ná yé ɖejidó nǔxe Biblu ɖɔ lɛ go wutu. Enyí a tlɛ lɛnɖɔ nǔxe ɖɔ Biblu te nyí nùmɛ-yozò kavǐ odlɔ ɖé kpoun, tɛnkpɔ́n bo dindóna enyí ayinamɛ kpó okpagbe etɔn lɛ kpó nyí nǔgbó. A gǎn wá mɔɖɔ Biblu wɛ nyí alɔgɔ́ ɖagbe húgǎn lɔ ná mɛxe cíɔ kú dó lɛ.

Kpɔ́n video xe gandego lɛ to nɔtɛn Intɛnɛt tɔn mǐtɔn, jw.org jí

 ETƐ́WƐ NYÍ NINƆMƐ OCÍƆ LƐ TƆN?

BE HYƐ NÁ JLO NADÓ SÈ WƐNÐAGBE ÐÉ YA?