2 Kọlintinu lẹ 7:1-16
-
Mí ni klọ́ míde wé sọn hẹnflu mẹ (1)
-
Paulu jaya to Kọlintinu lẹ mẹ (2-4)
-
Titu hẹn linlin dagbe wá (5-7)
-
Awubla Jiwheyẹwhe tọn po lẹnvọjọ po (8-16)
7 Enẹwutu, mẹyiwanna lẹ emi, to whenuena e yindọ mí tindo opagbe ehelẹ,+ mì gbọ mí ni klọ́ míde wé sọn hẹnflu agbasalan tọn podọ gbigbọ tọn lẹpo mẹ,+ bo nọ to wiwe-yinyin hẹn zun pipé to budisi Jiwheyẹwhe mẹ.
2 Mì hùn ahun mìtọn donuvo na mí.+ Mí ma ko wà oylan do mẹde, mí ma ko hẹn mẹde gblezọn, mí ma ko hò mẹde dù.+
3 Yẹn ma to ehe dọ nado gblewhẹdo mì gba. Na yẹn ko dọ wayi dọ mìwlẹ tin to ahun mítọn mẹ, vlavo mí kú wẹo kavi mí togbẹ̀.
4 Yẹn nọ dọhona mì po awuvivo hodidọ tọn daho po. Yẹn nọ doawagun tlala to mì mẹ. Yẹn gọ́ na homẹmimiọn; ayajẹ ṣie nọ to gigọfla to yajiji mítọn lẹpo mẹ.+
5 Na nugbo tọn, to whenue mí wá Makedonia,+ agbasa* mítọn ma mọ kọgbọ depope, ṣigba mí to yinyin yasana to aliho lẹpo mẹ—avùn tin to gbonu, obu tin to ṣẹnṣẹn mítọn.
6 Amọ́, Jiwheyẹwhe he nọ miọnhomẹna mẹhe jẹflumẹ lẹ,+ miọnhomẹna mí gbọn tintin tofi Titu tọn dali;
7 podọ e ma yin gbọn tintin tofi etọn kẹdẹ dali gba, ṣigba gbọn homẹmimiọn he e mọyi na mìtọn wutu dali ga, dile ewọ hẹn linlin lẹ wá na mí gando ojlo vẹkuvẹku mìtọn, awubla daho mìtọn po mẹtọnhopọn ahundopo tọn* he mì tindo na mi po go; sọmọ bọ yẹn jaya dogọ.
8 Na eyin wekanhlanmẹ ṣie tlẹ hẹn mì blawu,+ e ma vẹna mi gba. Eyin e tlẹ vẹna mi dai, (na yẹn mọdọ wekanhlanmẹ enẹ hẹn mì blawu, ṣigba na ojlẹ gli de poun),
9 todin yẹn jaya, e ma yin na mìwlẹ yin hinhẹn blawu poun wutu wẹ gba, ṣigba na mì yin hinhẹn blawu nado lẹnvọjọ wutu. Na mì yin hinhẹn blawu to aliho Jiwheyẹwhe tọn mẹ, sọmọ bọ mì ma jiya nudepope tọn na míwlẹ wutu.
10 Na awubla to aliho Jiwheyẹwhe tọn mẹ nọ dekọtọn do lẹnvọjọ he nọ hẹn whlẹngán wá mẹ, bọ ehe ma nọ vẹnamẹ;+ ṣigba awubla aihọn tọn nọ dekọtọn do okú mẹ.
11 Mì pọ́n vivẹnudido daho he mẹ hinhẹn mì blawu to aliho Jiwheyẹwhe tọn mẹ ko dekọtọn do na mì, mọwẹ, whẹsuna mìde titi, mọwẹ, homẹgble, mọwẹ, obu, mọwẹ, ojlo vẹkuvẹku, mọwẹ, zohunhun, mọwẹ, nuṣiwa vivọjlado!+ Mì ko do mìde hia to aliho lẹpo mẹ nado yin wiwe* to whẹho ehe mẹ.
12 Dile etlẹ yindọ yẹn kanwehlan mì, yẹn ma wàmọ na mẹhe waylan lọ tọn wutu,+ kavi na mẹhe go oylan lọ yin wiwà do tọn wutu gba, ṣigba na vivẹnu he mì do na míwlẹ tọn wutu nido sọgan yin hinhẹn họnwun to ṣẹnṣẹn mìtọn to Jiwheyẹwhe nukọn.
13 Enẹwutu wẹ mí ko yin homẹmiọnna.
Ṣigba, to yidogọ mẹ na homẹmimiọn mítọn, mí sọ jaya tlala na ayajẹ Titu tọn wutu, na mìmẹpo wẹ hẹn kọfanamẹ wá na gbigbọ etọn.
14 Na eyin yẹn ko doawagun gando mì go to nukọn etọn, be yẹn ma ko duwinyan; ṣigba kẹdẹdile nuhe mí ko dọna mì lẹpo yin nugbo do, mọdopolọ ga wẹ awagundido mítọn to Titu nukọn ko sọawuhia nado yin nugbo do.
15 Humọ, owanyi sisosiso etọn dohlan mì sọ sinyẹn dogọ, dile ewọ to tonusise mìmẹpo tọn flin,+ yèdọ lehe mì yí sisi sisosiso do yí i do.
16 Yẹn nọ jaya dọ to aliho lẹpo mẹ, yẹn sọgan dejido mì go.*
Nudọnamẹ Odò Tọn
^ To paa mẹ, “agbasalan.”
^ To paa mẹ, “zohunhun.”
^ Kavi “homẹvọnọ.”
^ Kavi vlavo, “yẹn sọgan gọ́ na adọgbigbo na mìtọn wutu.”
