Daniẹli 4:1-37
4 “Nuhe yẹn Ahọlu Nẹbukadnẹzali dọna gbẹtọ lẹ, akọta lẹ po akọ̀ lẹpo po he nọ nọ̀ aigba pete ji die: Jijọho ni tin hlan mì!
2 Homẹ ṣie hùn nado lá ohia po azọ́njiawu lẹ po he Jiwheyẹwhe Gigogán lọ ko wà na mi.
3 Lehe ohia etọn lẹ klo bọ azọ́njiawu etọn lẹ yin huhlọnnọ do sọ! Ahọluduta madopodo wẹ ahọluduta etọn podọ gandudu etọn tin-to-aimẹ sọn whẹndo de mẹ jẹ devo mẹ.+
4 “Yẹn, Nẹbukadnẹzali, vò to owhé ṣie gbè bo to kọdetọn dagbe tindo to họ̀nmẹ.
5 N’kudlọ de he dobuna mi. Dile n’to aimimlọn to adọzan ṣie ji, nuhe n’mọ to odlọ ṣie mẹ po numimọ he wá tamẹ na mi lẹ po dobuna mi.+
6 Enẹwutu, n’degbe dọ nuyọnẹntọ Babilọni tọn lẹpo ni yin hinhẹnwa nukọn ṣie, na yé nido sọgan hẹn tadena odlọ lọ tọn zun yinyọnẹn na mi.+
7 “To whenẹnu, yẹwhenọ nujlẹtọ lẹ, afinyọnnọ lẹ, Kaldeanu lẹ* po sunwhlẹvu-pọntọ lẹ po+ biọ họmẹ wá. To whenue n’dọ odlọ lọ na yé, yé ma penugo nado hẹn tadena etọn zun yinyọnẹn na mi.+
8 To godo mẹ, Daniẹli biọ họmẹ wá nukọn ṣie, yèdọ mẹhe nọ yin Bẹlteṣazali+ sọgbe hẹ oyín yẹwhe ṣie tọn+ podọ mẹhe mẹ gbigbọ yẹwhe wiwe lẹ tọn tin te,+ yẹn sọ dọ odlọ lọ na ẹn dọmọ:
9 “‘Bẹlteṣazali E, hiẹ ogán yẹwhenọ nujlẹtọ lẹ tọn,+ n’yọnẹn ganji dọ gbigbọ yẹwhe wiwe lẹ tọn tin to hiẹ mẹ+ bọ aṣli depope ma tin he a ma sọgan dehia.+ Enẹwutu, dọ numimọ he n’mọ to odlọ ṣie mẹ lẹ po tadena etọn po na mi.
10 “‘To numimọ he wá tamẹ na mi dile n’to adọzan ṣie ji lẹ mẹ, n’mọ atin de+ to ṣẹnṣẹn aigba tọn bọ e yiji taun.+
11 Atin lọ whẹ́n bo dohuhlọn bọ jiyiyi etọn sọ́ olọn, e sọ nọ yin mimọ hlan sọn opodo aigba tọn lẹpo.
12 Amà etọn lẹ yọ́npọ́n, sinsẹ́n etọn lẹ sù taun bọ núdùdù tin to e ji na nudida lẹpo. Kanlin aigba tọn lẹ nọ wá dín yẹtẹn to glọ etọn, podọ alà etọn lẹ ji wẹ ohẹ̀ agahomẹ tọn lẹ nọ nọ̀ bọ nudida* lẹpo nọ mọ núdù sọn e ji.
13 “‘Dile n’to adọzan ṣie ji bo to numimọ he wá tamẹ na mi lẹ pọ́n, n’mọ hihọ́tọ de, yèdọ omẹ wiwe de, to tejẹ ja sọn olọn.+
14 Ewọ yí ogbè lélé do dọmọ: “Mì sán atin lọ liai,+ mì sán alà etọn lẹ sẹ̀, mì húnhún amà etọn lẹ sọn e ji bo gbà sinsẹ́n etọn lẹ pé! Mì dike kanlin lẹ ni họnyi sọn glọ etọn podọ ohẹ̀ lẹ sọn alà etọn lẹ ji.
15 Ṣigba, mì jo dodonu lọ po adọ̀ etọn lẹ po* do aigba mẹ, gọna kọgàn gànyuu po gànvẹẹ tọn de po to okọ̀ na ẹn to ogbé danji tọn lẹ mẹ. Mì dike ahun agahomẹ tọn ni yọ̀n ẹn bo gbọ mimá etọn ni tin hẹ kanlin lẹ to ogbé lẹ ṣẹnṣẹn to aigba ji.+
16 Mì gbọ ahun etọn ni yin didiọ sọn gbẹtọ tọn zun ahun kanlin tọn, bo dike ojlẹ ṣinawe+ ni juwayi gbọn e ji.+
17 Ehe yin gbedide de sọn hihọ́tọ lẹ dè,+ podọ obiọ lọ yin bibasi gbọn ohó omẹ wiwe lẹ tọn dali, na mẹhe togbẹ̀ lẹ nido yọnẹn dọ Gigogán lọ wẹ Gandutọ to ahọluduta gbẹtọvi lẹ tọn mẹ+ bo nọ ze e na mẹdepope he jlo e, podọ e tlẹ nọ ze e do alọmẹ na mẹhe whè hugan to gbẹtọvi lẹ mẹ.”
18 “‘Odlọ he yẹn, Ahọlu Nẹbukadnẹzali, kú lọ niyẹn; todin Bẹlteṣazali E, dọ tadena etọn, na nuyọnẹntọ he pò to ahọluduta ṣie mẹ lẹpo ma penugo nado hẹn tadena lọ zun yinyọnẹn na mi.+ Ṣigba, hiẹ penugo nado wàmọ, na gbigbọ yẹwhe wiwe lẹ tọn tin to hiẹ mẹ wutu.’
19 “To whenẹnu, Daniẹli he nọ yin Bẹlteṣazali+ biọ bẹwlu mẹ na ojlẹ de bọ linlẹn etọn lẹ jẹ budona ẹn ji.
“Ahọlu sọ dọna ẹn dọ, ‘Bẹlteṣazali E, a dike odlọ lọ po tadena lọ po dobuna we blo.’
“Bẹlteṣazali sọ gblọn dọ, ‘Oklunọ ṣie, odlọ lọ ni mọ hẹndi do mẹhe gbẹwanna we lẹ go, podọ tadena etọn do kẹntọ towe lẹ go.
20 “‘Atin he hiẹ mọ lọ, ehe whẹ́n taun bo dohuhlọn, bọ jiyiyi etọn sọ́ olọn bo sọgan yin mimọ hlan sọn aigba lẹpo ji,+
21 he amà etọn lẹ yọnwhanpẹ bọ sinsẹ́n etọn lẹ sù taun bọ núdùdù tin to e ji na nudida lẹpo, ehe glọ kanlin danji tọn lẹ nọ wá nọ bọ ohẹ̀ agahomẹ tọn lẹ nọ nọ̀ alà etọn lẹ ji,+
22 ahọlu E, hiẹ wẹ, na a ko lẹzun daho bosọ dohuhlọn, bọ yẹyi towe ko lẹzun daho bo yiaga jẹ olọn+ podọ gandudu towe ko dlẹnkan jẹ opodo aigba tọn lẹ.+
23 “‘Hiẹ ahọlu sọ mọ hihọ́tọ de, yèdọ omẹ wiwe de,+ he to tejẹ ja sọn olọn, mẹhe to didọmọ: “Mì sán atin lọ liai bo hù i sudo, ṣigba mì jo dodonu lọ po adọ̀ etọn lẹ po* do aigba mẹ, gọna kọgàn gànyuu po gànvẹẹ tọn de po to okọ̀ na ẹn to ogbé danji tọn lẹ mẹ. Mì sọ dike ahun agahomẹ tọn ni yọ̀n ẹn bo gbọ mimá etọn ni tin hẹ kanlin danji tọn lẹ kaka ojlẹ ṣinawe nido juwayi gbọn e ji.”+
24 Ahọlu E, tadena lọ die; gbedide Gigogán lọ tọn wẹ he dona jọ do oklunọ ṣie ahọlu go.
25 Hiẹ na yin yinyan dogbé sọn gbẹtọ lẹ ṣẹnṣẹn, fininọ towe nasọ tin hẹ kanlin danji tọn lẹ bọ ogbé wẹ na nọ yin nina we nado dù kẹdẹdi oyìnsú lẹ; ahun agahomẹ tọn wẹ nasọ nọ yọ̀n we+ bọ ojlẹ ṣinawe+ na juwayi gbọn ji we,+ kaka hiẹ nado yọnẹn dọ Gigogán lọ wẹ Gandutọ to ahọluduta gbẹtọvi lẹ tọn mẹ bo nọ yí i na mẹdepope he jlo e.+
26 “‘Ṣigba, na yé dọ dọ dodonu atin lọ tọn po adọ̀ etọn lẹ po* ni yin jijodo wutu,+ ahọluduta towe nasọ lẹzun towe whladopo dogọ, to whenue hiẹ na ko wá yọnẹn dọ Mẹde to gandu to olọn mẹ.
27 Enẹwutu ahọlu E, jaale kẹalọyi ayinamẹ ṣie. Dealọ sọn ylando towe lẹ mẹ gbọn nuhe sọgbe wiwà dali, podọ sọn ylanwiwa towe mẹ gbọn lẹblanu didohia wamọnọ lẹ dali. Vlavo kọdetọn dagbe towe na yin kandlẹnna.’”+
28 Onú ehe lẹpo wẹ jọ do Ahọlu Nẹbukadnẹzali go.
29 To osun wiawe godo, ewọ to sadi gbọn họta họ̀nmẹ Babilọni tọn.
30 Ahọlu sọ to didọmọ: “Be e ma yin ehe wẹ Babilọni Daho lọ he yẹnlọsu ko yí huhlọn po nugopipe ṣie titi po do gbá taidi họ̀nmẹ na gigo kiklo-yinyin ṣie tọn ya?”
31 Dile ahọlu gbẹ́ pò to hodọ, ogbè de wá sọn olọn dọmọ: “Ahọlu Nẹbukadnẹzali E, hiẹ wẹ ehe to yinyin didọna dọ, ‘Ahọluduta lọ ko yì sọn dè we,+
32 podọ hiẹ na yin yinyan dogbé sọn gbẹtọ lẹ ṣẹnṣẹn. Fininọ towe na tin hẹ kanlin danji tọn lẹ bọ ogbé wẹ na nọ yin nina we nado dù taidi oyìnsú lẹ, ojlẹ ṣinawe nasọ juwayi gbọn ji we, kaka hiẹ nado yọnẹn dọ Gigogán lọ wẹ Gandutọ to ahọluduta gbẹtọvi lẹ tọn mẹ bo nọ yí i na mẹdepope he jlo e.’”+
33 To ojlẹ enẹ mẹ, ohó lọ mọ hẹndi do Nẹbukadnẹzali go. Ewọ yin yinyan dogbé sọn gbẹtọ lẹ ṣẹnṣẹn bọ e jẹ ogbé dù ji taidi oyìnsú lẹ, ahun agahomẹ tọn wẹ sọ nọ hẹn agbasa etọn yọ̀n, kaka bọ oda etọn dite taidi ofún akùn tọn lẹ bọ ofẹ̀n etọn lẹ taidi ofẹ̀n ohẹ̀ lẹ tọn.+
34 “To vivọnu ojlẹ enẹ tọn,+ yẹn Nẹbukadnẹzali pọ́n olọn hlan bọ huhlọn nulẹnpọn tọn ṣie gọwá yẹn mẹ; yẹn sọ pà Gigogán lọ bo na pipà po gigo po Mẹhe togbẹ̀ kakadoi lọ, na gandudu madopodo wẹ gandudu etọn bọ ahọluduta etọn yin sọn whẹndo de mẹ jẹ devo mẹ.+
35 Mẹhe nọ nọ̀ aigba ji lẹpo ma yin nude to apá na ẹn, podọ e nọ yinuwa sọgbe hẹ ojlo etọn titi to awhànpa olọn tọn lẹ po mẹhe nọ nọ̀ aigba ji lẹ po ṣẹnṣẹn. Mẹdepope masọ tin he sọgan glọnalina ẹn*+ kavi dọna ẹn dọ, ‘Etẹ die he hiẹ wà?’+
36 “To ojlẹ enẹ mẹ, huhlọn nulẹnpọn tọn ṣie gọwá yẹn mẹ, podọ gigo ahọluduta ṣie tọn, kiklo-yinyin ṣie po gigo daho ṣie po yin gigọjo na mi.+ Ahọluzọnwatọ nukundeji po omẹ gboogbo ṣie lẹ po nọ yí jeje do dín ayinamẹ sọn dè e bọ n’yin gigọ̀ do ahọluduta ṣie mẹ, podọ kiklo-yinyin daho humọ wẹ tlẹ yin yiyidogọna mi.
37 “Todin, yẹn Nẹbukadnẹzali to pipà po gigo po na Ahọlu olọn tọn bosọ to zize e daga,+ na azọ́n etọn lẹpo wẹ yin nugbo bọ aliho etọn lẹ yin dodo,+ podọ na e penugo nado dowinyan mẹhe to zọnlinzin to goyiyi mẹ lẹ wutu.”+
Nudọnamẹ Odò Tọn
^ Enẹ wẹ, pipli de he yin azọ́nyọnẹntọ to dọṣẹdidọ po sunwhlẹvu-pinpọn po mẹ.
^ To paa mẹ, “agbasalan.”
^ Kavi “jo adọ̀ daho etọn.”
^ Kavi “jo adọ̀ daho etọn.”
^ Kavi “adọ̀ daho atin lọ tọn.”
^ Kavi “dealọ etọn sẹ̀.”
