Howhinwhẹn lẹ 28:1-28
28 Mẹylankan lẹ nọ to hinhọ̀n to whenue mẹde ma to yinyan yé,Ṣigba, dodonọ lẹ nọ gboadọ di kinnikinni.*+
2 Eyin sẹ́nhẹngba to otò de mẹ, ahọvi etọn lẹ na to didiọ mapote,+Ṣigba, gbọn alọgọ mẹhe tindo wuntuntun po oyọnẹn po tọn gblamẹ wẹ ahọvi de* na nọ aimẹ dẹn.+
3 Wamọnọ he nọ tafu agbátọnọ+Tin di jikun he nọ plọ́ núdùdù lẹpo sọyi.
4 Mẹhe nọ gbẹkọ osẹ́n go lẹ nọ to mẹylankan pà,Ṣigba, mẹhe nọ yìn osẹ́n lẹ nọ gblehomẹ do yé go.+
5 Mẹylankan lẹ ma sọgan mọnukunnujẹ whẹdida dodo mẹ,Ṣigba, mẹhe to Jehovah dín lẹ sọgan mọnukunnujẹ nulẹpo mẹ.+
6 Wamọnọ he nọ zinzọnlin to tenọgli etọn mẹ pọnteHú adọkunnọ he aliho etọn lẹ gblezọn.+
7 Visunnu he tindo nukunnumọjẹnumẹ nọ yìn osẹ́n,Ṣigba, ewọ he nọ dogbẹ́ hẹ adọ̀whẹnnọ lẹ nọ dowinyan otọ́ etọn.+
8 Mẹhe nọ hẹn adọkun etọn sudeji gbọn akuẹvi yíyí+ po ale dutomẹji po daliTo bibẹpli na mẹhe nọ do nukundagbe hia wamọnọ.+
9 Mẹhe nọ gbẹ́ nado setonuna osẹ́n—Osùnú de wẹ odẹ̀ etọn lọsu nọ yin.+
10 Mẹhe to yẹdoklọ nugbonọ nado wà nuylankan na jai jẹ odò he ewọ lọsu kùn mẹ,+Ṣigba, madoblọnọ na dugu nudagbe tọn.+
11 Adọkunnọ nọ yin nuyọnẹntọ to nukun edetiti tọn mẹ,+Ṣigba, wamọnọ he tindo wuntuntun sọgan mọdona ẹn.+
12 Eyin dodonọ gbawhàn, gigo daho wẹ e nọ yin,Ṣigba, eyin mẹylankan dugán, gbẹtọ lẹ nọ họ̀n whlá.+
13 Mẹhe to nuṣinyọndo nuṣiwa etọn lẹ ma na tindo kọdetọn dagbe,+Ṣigba, mẹdepope he nọ yigbe yetọn bo nọ jo yé do wẹ lẹblanu na yin didohia.+
14 Ayajẹnọ wẹ ewọ he nọ họ́ ede to whelẹponu,Ṣigba, nugbajẹmẹji na wá mẹdepope he nọ hẹn ahun ede tọn sinyẹn ji.+
15 Kẹdẹdi kinnikinni he to hùnhlún podọ beali he jẹma,Mọ wẹ gandutọ ylankan he dugán do agbátọnọ lẹ ji nọ te do.+
16 Nukọntọ he ma tindo wuntuntun nọ ṣì huhlọn etọn zan,+Ṣigba, dehe gbẹwanna ale mawadodo tọn na nọgbẹ̀ dẹn.+
17 Mẹhe hùnhọ́ ogbẹ̀ mẹdevo* tọn to okọ̀ na, na to hinhọ̀n kaka e nado biọ yọdò* mẹ.+
Mẹdepope ni ma gọalọna ẹn blo.
18 Mẹhe to zọnlinzin matin oblọ na yin whinwhlẹngán,+Ṣigba, mẹhe aliho etọn lẹ gbán na jai to ajiji mẹ.+
19 Mẹhe nọ pọ̀ aigba etọn na tindo núdùdù susugege,Ṣigba, mẹhe nọ doafọna onú ovọ́ lẹ na tlọ biọ ohẹ́n mẹ pete.+
20 Nugbonọ na mọ dona susu yí,+Ṣigba, mẹhe to whlẹndo ji nado jẹ adọkun ma na to homẹvọnọ yin zọnmii.+
21 E ma yọ́n nado nọ do mẹnukuntahihopọn hia;+Ṣigba, mẹde sọgan wà nuylankan na akla nùdo dopo gee wutu.
22 Nukunkẹnnọ nọ to jejeji nado jẹ adọkun,Amọ́, e ma yọnẹn dọ ohẹ́n wẹ to tepọn emi.
23 Mẹdepope he nọ wọhẹmẹ+ na mọ nukundagbe to nukọn mẹ+Hú mẹhe nọ yí odẹ́ etọn do namẹ pipà oklọ tọn.
24 Mẹdepope he nọ fìnnú do otọ́ etọn po onọ̀ etọn po bo nọ dọ dọ, “Nude ma ylan to e mẹ,”+Yin gbẹdohẹmẹtọ mẹhe nọ hẹn dindọn wá tọn.+
25 Nukunkẹnnọ* nọ hẹn gbemanọpọ wá,Ṣigba, mẹdepope he nọ dejido Jehovah go na tindo kọdetọn dagbe.*+
26 Nulunọ wẹ mẹdepope he nọ dejido ahun edetiti tọn go,+Ṣigba, mẹhe nọ zinzọnlin to nuyọnẹn mẹ wẹ na họ̀ngán.+
27 Nude ma na whèdo mẹdepope he nọ nanú wamọnọ,+Ṣigba, dẹ̀hodo susu wẹ na wá mẹhe nọ miọn nukun etọn do yé ji.
28 Eyin mẹylankan dugán, gbẹtọ nọ whlá ede,Ṣigba, eyin yé dọ̀n, dodonọ nọ jideji.+
Nudọnamẹ Odò Tọn
^ Kavi “kinnikinni winyanwinyan.”
^ To paa mẹ, “ewọ.”
^ Kavi “alindọn de.”
^ Kavi “odò.”
^ Kavi vlavo, “Alindọn goyitọ.”
^ To paa mẹ, “na yin hinhẹn dojó.”
