Kolosinu lẹ 2:1-23
2 Na yẹn jlo dọ mì ni yọ́n lehe ahi he yẹn to dídí do ota mìtọn mẹ podọ do mẹhe to Laodikea+ lẹ tọn mẹ podọ do mẹhe ma ko mọ mi nukun sọ nukun* lẹpo tọn mẹ sinyẹn sọ.
2 Ehe yinmọ, na yé nido sọgan yin homẹmiọnna+ bo yin kinkọndopọ pẹkipẹki to owanyi+ mẹ, podọ na yé nido sọgan tindo adọkun lẹpo he nọ dekọtọn sọn nukunnumimọjẹ nugbo lọ mẹ, ehe mẹ yé tindo jidide gigọ́ te, na yé nido tindo oyọnẹn he pegan gando aṣli wiwe Jiwheyẹwhe tọn, he yin Klisti go.+
3 Nuyọnẹn po oyọnẹn họakuẹ lẹpo po yin whiwhla do ewọ mẹ po sọwhiwhe po.+
4 Yẹn to ehe dọ, na mẹdepope ni ma do yí hodidọ linlẹndiọnamẹ tọn lẹ do klọ mì blo.
5 Dile yẹn ma tlẹ tin to finẹ to agbasa mẹ, yẹn tin po mì po to gbigbọmẹ, bo to ayajẹ nado mọ titojininọ mìtọn+ podọ dolilo yise mìtọn tọn to Klisti mẹ.+
6 Enẹwutu, kẹdẹdile mì ko kẹalọyi Klisti Jesu Oklunọ do, mì nọ to zọnlinzin to kọndopọ mẹ hẹ ẹ zọnmii
7 bo doadọ̀do bosọ nọ to yinyin dido daga to ewọ mẹ+ bo nọ to yinyin hinhẹn lodo to yise mẹ,+ kẹdẹdile mì ko yin pinplọn do, podọ pẹdido mìtọn ni nọ to susudeji.+
8 Mì dike mẹde wle mì di kanlinmọ* blo, yèdọ gbọn tamẹnuplọnmẹ po oklọ ovọ́+ po dali sọgbe hẹ aṣa gbẹtọ lẹ tọn, sọgbe hẹ onú dodonu aihọn ehe tọn lẹ bọ e ma yin dehe sọgbe hẹ Klisti;
9 na ewọ mẹ wẹ gigọ́-yinyin pete jẹhẹnu Jiwheyẹwhe tọn nọ nọ̀ to agbasa mẹ.+
10 Enẹwutu wẹ mìwlẹ do tindo gigọ́-yinyin gbọn ewọ gblamẹ, yèdọ mẹlọ he yin ota na gandudu po aṣẹpipa lẹpo po.+
11 Gbọn haṣinṣan mìtọn hẹ ewọ dali, mìwlẹ ko sọ yin adàgbona po adàgbigbo de po he ma nọ yin bibasi po alọ lẹ po gbọn agbasa gbẹtọ tọn+ didedai dali. Mìwlẹ ko yin adàgbona gbọn adàgbigbo he yin Klisti tọn dali.+
12 Na mìwlẹ ko yin dìdì dopọ hẹ ẹ to baptẹm etọn+ mẹ, podọ gbọn ewọ dali, mì ko sọ yin finfọn+ dopọ hẹ ẹ gbọn yise mìtọn to azọ́n huhlọnnọ Jiwheyẹwhe tọn mẹ dali, yèdọ mẹhe fọ́n ẹn sọn oṣiọ lẹ mẹ.+
13 Humọ, dile etlẹ yindọ mìwlẹ ko kú to sẹ́nmẹjijẹ mìtọn lẹ mẹ podọ to ninọmẹ adàmagbo agbasalan tọn mìtọn mẹ, Jiwheyẹwhe hẹn mì wá ogbẹ̀ nado kọ̀n mì dopọ hẹ Klisti.+ E jo sẹ́nmẹjijẹ mítọn lẹpo na mí sọn ojlo mẹ wá+
14 bo súnsún kandai+ yí alọ do kàn he bẹ osẹ́ndoai+ lẹ hẹn bosọ jẹagọdo mí+ lọ sẹ̀ mlẹnmlẹn. Ewọ ko de e sẹ̀ sọn aliji gbọn whiwhè e do yatin* go dali.+
15 Ewọ ko hẹn gandudu lẹ po aṣẹpipa lẹ po jẹ agbá bo do yé hia to gbangba taidi mẹhe ṣíawhàn+ bosọ hẹn yé nado zinzọnlin awhàngbigba tọn gbọn yatin lọ gblamẹ.*
16 Enẹwutu, mì dike mẹdepope dawhẹna mì to dùdù po nùnù po+ mẹ blo kavi gando hùnwhẹ de kavi hùnwhẹ osun yọyọ tọn+ kavi gbọjẹzan+ de tọn bibasi go blo.
17 Oyẹ̀ nuhe ja lẹ tọn wẹ onú ehelẹ yin,+ ṣigba onú jọnun* lọ yin Klisti tọn.+
18 Mì dike mẹdepope he nọ mọ awuvivi to whiwhẹ oklọ tọn mẹ podọ to wunmẹ sinsẹ̀n-bibasi angẹli lẹ tọn mẹ, “he nọ ze teninọ etọn sinai do”* nuhe e ko mọ lẹ ji hò ale+ lọ yí sọn mì si blo. Na nugbo tọn, e nọ kla gbọn pọndohlan agbasalan tọn etọn dali matin whẹwhinwhẹ́n he sọgbe de,
19 podọ ewọ ma tẹdo ota lọ go gligli,+ yèdọ mẹlọ he gblamẹ nuhudo agbasa lọ pete tọn nọ yin awuwlena, bọ agbasa lọ do nọ yin kinkọndopọ pẹkipẹki gbọn hupetẹn lẹ po okàn agómẹ tọn etọn lẹ po gblamẹ bosọ nọ yin hinhẹn nado whẹ́n po whinwhẹ́n he nọ wá sọn Jiwheyẹwhe dè po.+
20 Eyin mìwlẹ ko kú dopọ hẹ Klisti na nuhe dù onú dodonu aihọn tọn lẹ,+ naegbọn mì zindonukọn nado to gbẹnọ taidi mẹhe gbẹ́ yin apadewhe aihọn lọ tọn gbọn mìdelẹ hinhẹn zun mẹmẹglọ dali, yèdọ na osẹ́ndoai lọ lẹ:+
21 “Mì ze, kavi dọ́pọ́n, kavi doalọ e go blo,”
22 ehe to alọdlẹndo nuhe nọ busẹ sọn aimẹ petepete to whenue yé ko yin yiyizan lẹ? Ehe tin to kọndopọ mẹ hẹ gbedide po nuplọnmẹ gbẹtọ tọn lẹ po.+
23 Dile etlẹ yindọ onú enẹlẹ nọ sọawuhia di nuyọnẹn to sinsẹ̀n-bibasi he mẹlọ lọsu zedai mẹ podọ to whiwhẹ oklọ tọn mẹ, podọ to yasisana agbasa mẹ,+ yé ma tindo nuhọakuẹ depope to ahididi hẹ pekọ agbasalan tọn mẹ.
Nudọnamẹ Odò Tọn
^ To paa mẹ, “ma ko mọ nukunmẹ ṣie to agbasalan mẹ.”
^ Kavi “domọwle mì di nuyànwẹnna etọn.”
^ Kavi vlavo, “gbọn ewọ gblamẹ.”
^ To paa mẹ, “agbasa.”
^ Hogbe ehelẹ yin didesọn aṣa sinsẹ̀n kosi tọn lẹ mẹ.
