Owalọ lẹ 19:1-41
19 To enẹgodo, to whenue Apolo+ tin to Kọlinti, Paulu jugbọn lẹdo he dẹn do ohù lẹ mẹ bo jẹte wá Efesu.+ E sọ mọ devi delẹ to finẹ
2 bo dọna yé dọmọ: “Be mìwlẹ mọ gbigbọ wiwe yí to whenue mì lẹzun yisenọ ya?”+ Yé gblọnna ẹn dọmọ: “Etẹ nkọ, mí ma ko sè pọ́n eyin gbigbọ wiwe de tin.”
3 Ewọ sọ dọmọ: “To whelọnu lo, etẹ mẹ wẹ mì yin bibaptizi te?” Yé dọmọ: “To baptẹm Johanu tọn mẹ.”+
4 Paulu dọmọ: “Johanu yí baptẹm he yin ohia lẹnvọjọ tọn do baptizi+ bo nọ dọna gbẹtọ lẹ nado yise to mẹlọ he na wá to ewọ godo lọ mẹ,+ enẹ wẹ, to Jesu mẹ.”
5 To whenue yé sè ehe, yé yin bibaptizi to oyín Oklunọ Jesu tọn mẹ.
6 Podọ to whenue Paulu ze alọ etọn do yé ji, gbigbọ wiwe wá yé ji,+ bọ yé jẹ hodọ ji to jonọgbè lẹ mẹ bosọ to dọdai dọ.+
7 Yemẹpo to pọmẹ yin nudi sunnu 12.
8 To whenue e biọ sinagọgu mẹ,+ e yí adọgbigbo do dọho na osun atọ̀n bo nọ to togunmẹho lẹ dọ bosọ nọ to hoyijlẹdohogo nado diọlinlẹnna gbẹtọ lẹ gando Ahọluduta Jiwheyẹwhe tọn go.+
9 Ṣigba, to whenue mẹdelẹ gbọn tasinsinyẹn dali gbẹ́ nado yise* bosọ to ohó ylankan dọ do Aliho Lọ* go+ to gbẹtọgun lọ nukọn, e tọ́n sọn yé mẹ+ bo klan devi lẹ sọn yé go bosọ nọ dọ togunmẹho egbesọegbesọ to wehọmẹ Tilannusi tọn.
10 Ehe zindonukọn na owhe awe, sọmọ bọ mẹhe nọ nọ̀ ayimatẹn Asia tọn mẹ lẹpo sè ohó Oklunọ tọn, yèdọ Ju lẹ po Glẹkinu lẹ po.
11 Jiwheyẹwhe sọ zindonukọn nado to azọ́n huhlọnnọ he jiawu lẹ wà gbọn Paulu gblamẹ,+
12 sọmọ bọ avọ̀ po azọ́nvọ̀ he ko jẹ agbasa etọn go lẹ po nọ yin hinhẹn yì mẹhe to azọ̀njẹ lẹ dè+ bọ azọ̀n yetọn lẹ nọ gbọ, podọ gbigbọ ylankan lẹ sọ nọ tọ́njẹgbonu.+
13 Ṣigba, delẹ to Ju he nọ to yìyì pé bo nọ to aovi lẹ yàn jẹgbonu lẹ mẹ sọ nọ tẹnpọn nado yí oyín Oklunọ Jesu tọn zan do mẹhe tindo gbigbọ ylankan lẹ ji; yé nọ dọmọ: “Yẹn degbe do we sinsinyẹn to oyín Jesu he Paulu nọ dọyẹwheho etọn lọ tọn mẹ.”+
14 Todin, Skeva, yẹwhenọgán Juvi lẹ tọn de tindo visunnu ṣinawe, he to ehe wà.
15 Ṣigba, gbigbọ ylankan lọ gblọnna yé dọmọ: “Yẹn yọ́n Jesu+ bosọ jẹakọ hẹ Paulu;+ ṣigba mẹnu wẹ mìwlẹ yin?”
16 To whenẹnu, dawe he tindo gbigbọ ylankan lọ lọ́n jẹ yé ji bo tindo huhlọn hú dopodopo yetọn bosọ duto yé ji, sọmọ bọ yé họnyi sọn owhé enẹ gbè to omẹ́* podọ po apà po to ogo.
17 Ehe lẹzun yinyọnẹn na mẹlẹpo, yèdọ Ju lẹ po Glẹkinu lẹ po he nọ nọ̀ Efesu; obu sọ jẹ yemẹpo ji, oyín Oklunọ Jesu tọn sọ to yinyin gigopana zọnmii.
18 Podọ mẹsusu he ko lẹzun yisenọ lẹ nọ wá bo nọ yigbe ylando yetọn lẹ tọn bosọ nọ dọ nuhe yé wà lẹ to gbangba.
19 Na nugbo tọn, susu mẹhe yin nujlẹtọ lẹ tọn bẹ owe yetọn lẹ pli bo mẹ̀ yé to mẹlẹpo nukọn.+ Yé sọ lẹn akuẹ yetọn dopọ bo mọdọ e yì fataka-kuẹ 50 000.
20 Enẹwutu, ohó Jehovah* tọn to whinwhẹ́n deji bosọ to gbigbayipe tlala.+
21 To whenue onú ehelẹ ko jọ godo, Paulu magbe to ayiha mẹ dọ to Makedonia+ po Akaia po yìyì godo, emi na zingbejizọnlin yì Jelusalẹm.+ E dọmọ: “Eyin n’ko yì dọ́n godo, n’sọ dona yì Lomu ga.”+
22 Enẹwutu, e do awe to mẹhe nọ yilizọn na ẹn lẹ mẹ hlan Makedonia, yèdọ Timoti+ po Elastu+ po, ṣigba ewọ lọsu gbọṣi ayimatẹn Asia tọn mẹ na ojlẹ de.
23 To ojlẹ enẹ mẹ, bẹwlu sinsinyẹn+ de fọ́n gando Aliho Lọ* go.+
24 Na dawe de he nọ yin Demetliu, yèdọ ayátọ fataka tọn de he nọ basi fataka tẹmpli pẹvi Altemis* tọn nọ hẹn ale susu wá na anazọ́nwatọ lẹ.+
25 Ewọ sọ bẹ yewlẹ po mẹdevo he nọ wà azọ́n mọnkọtọn lẹ po pli bo dọmọ: “Mì gbẹtọ lẹ emi, mì yọnẹn ganji dọ azọ́n ehe wẹ hẹn mí jẹ adọkun.
26 Todin, mì mọ bosọ sè lehe Paulu ehe ko diọlinlẹnna gbẹtọ susu bo lẹ́ yé hlan linlẹn devo kọ̀n do, e ma yin to Efesu+ kẹdẹ ṣigba diblayin to ayimatẹn Asia tọn pete mẹ, gbọn didọ dali dọ yẹwhe he yè yí alọ do basi lẹ ma yin yẹwhe nujọnu tọn lẹ gba.+
27 Humọ, owù lọ ma yindọ ajọ́ mítọn ehe na yin vọdona kẹdẹ gba, ṣigba dọ tẹmpli yẹwhe-yọnnu daho Altemis* tọn nasọ yin pinpọn di nuvọ́ ga bọ gigo daho ewọ he nọ yin sinsẹ̀n to ayimatẹn Asia tọn pete mẹ podọ to aigba fininọ lẹpo ji tọn na wá yin hinhẹn zun ovọ́.”
28 To whenue sunnu lọ lẹ sè ehe bo gọ́ na homẹgble, yé jẹ awhádo ji dọmọ: “Daho wẹ Altemis* Efesunu lẹ tọn!”
29 Enẹwutu, tòdaho lọ gọ́ na bẹwlu, podọ yemẹpo to pọmẹ wọ̀ biọ nupọntẹn lọ bo dọ̀n Gaiu po Alistaku po,+ yèdọ Makedonianu lọ lẹ he yin tomẹyitọ hatọ Paulu tọn lẹ wá finẹ.
30 Na nuhe dù Paulu, ewọ to jijlo nado biọ họmẹ yì gbẹtọ lẹ dè, ṣigba devi lẹ ma dike na ẹn.
31 Etlẹ yin delẹ to mẹhe nọ deanana hùnwhẹ lẹ po aihun lẹ po, he ko jihọntọn hẹ ẹ lẹ mẹ, dowẹn hlan ẹn bo vẹ̀ ẹ ma nado ze ogbẹ̀ etọn do owù mẹ gbọn nupọntẹn lọ yìyì dali.
32 Na nugbo tọn, mẹdelẹ to awhádo bo to nude dọ bọ mẹdevo lẹ to nudevo dọ; na pipli lọ tin to bẹwlu mẹ, suhugan yetọn masọ yọ́n whẹwhinwhẹ́n he wutu yé do pli dopọ.
33 Enẹwutu, yé plan Alẹkzandle sọn gbẹtọgun lọ mẹ, bọ Ju lẹ sisẹ́ ẹ hlan nukọn, Alẹkzandle sọ mìalọ bo jlo na yiavùnlọna ede to gbẹtọ lọ lẹ nukọn.
34 Ṣigba, to whenue yé yọnẹn dọ Ju de wẹ ewọ, yemẹpo sọ jẹ awhádo ji to pọmẹ na nudi gànhiho awe dọmọ: “Daho wẹ Altemis* Efesunu lẹ tọn!”
35 To godo mẹ, to whenue tòwekantọ* lọ ko hẹn gbẹtọgun lọ nabọẹ, e dọmọ: “Mì omẹ Efesu tọn lẹ emi, na nugbo tọn, mẹnu wẹ tin to gbẹtọvi lẹ mẹ he ma yọnẹn dọ tòdaho Efesu tọn wẹ nọ ṣọ́ tẹmpli Altemis* daho lọ tọn po boṣiọ he flẹ sọn olọn lọ tọn po?
36 To whenuena e yindọ onú ehelẹ ma sọgan yin gbigbẹdai, mì dona nabọẹ bo ma dona yinuwa po sọmawhe po.
37 Na mì ko hẹn dawe ehelẹ wáfi, yèdọ mẹhe ma yin ajotọ tẹmpli mẹ tọn lẹ kavi nùzantọ do yẹwhe-yọnnu mítọn go tọ́ lẹ.
38 Enẹwutu, eyin Demetliu+ po anazọ́nwatọ he topọ hẹ ẹ lẹ po tindo owhẹ̀ de sọta mẹde, azán whẹdidọ tọn lẹ tin podọ ayimatẹn-gán* lẹ sọ tin; mì gbọ yé ni hẹn owhẹ̀ he yé tindo sọta ode awetọ lẹ wá.
39 Ṣigba, eyin mì to nude dín hú enẹ, pipli paa he sọgbe hẹ osẹ́n de whenu wẹ yè dona magbe do enẹ ji te.
40 Na nugbo tọn, mí tin to owù mẹ nado yin owhẹ̀ gufinfọn tọn sadokọna gando whẹho egbé tọn go, na whẹwhinwhẹ́n depope ma tin he mí na yí do suwhẹna bẹwlu gbẹtọgun zingidinọ ehe tọn.”
41 Podọ to whenue e ko dọ onú ehelẹ godo, e gbà mẹplidopọ lọ lẹ do.
Nudọnamẹ Odò Tọn
^ Ehe to alọdlẹndo aliho gbẹninọ tọn po nuplọnmẹ Klistiani tọn po.
^ Kavi “mẹdelẹ hẹn ahun yede tọn sinyẹn bo ma yise.”
^ Hogbe Glẹkigbe tọn lọ sọgan zẹẹmẹdo “avọ̀ tintindo to ogo jẹ obá de mẹ; yèdọ to awù odò tọn kẹdẹ mẹ”; e ma yin omẹ́ jọgbe jijẹ dandan gba.
^ Ehe to alọdlẹndo aliho gbẹninọ tọn po nuplọnmẹ Klistiani tọn po.
^ Kavi “Diana.”
^ Kavi “Diana.”
^ Kavi “Diana.”
^ Kavi “Diana.”
^ Glẹki, glammatẹus. To Ahọluigba Lomu tọn glọ, tòwekantọ wẹ yin ahọluzọnwatọ nukundeji hugan lọ to gandudu agbegbe tọn tòdaho Asia Pẹvi tọn he to yedekannu lẹ tọn mẹ.
^ Kavi “Diana.”
