Hosea 4:1-19
4 Mì omẹ Islaeli tọn lẹ emi, mì sè ohó Jehovah tọn,Na Jehovah tindo owhẹ̀ de sọta mẹhe nọ nọ̀ aigba lọ ji lẹ,+Na nugbodidọ, owanyi nugbo kavi oyọnẹn Jiwheyẹwhe tọn ma tin to aigba lọ ji wutu.+
2 Whiwhle oklọ tọn, lalodido,+ hlọnhuhu+Gọna ajojijẹ po ayọdide po+ wẹ gbayipe,Podọ nuyiwa hùnsọndai tọn de nọ bọdo devo go.+
3 Enẹ wẹ zọ́n bọ aigba lọ na biọ aluẹmẹ+Bọ mẹhe nọ nọ̀ e ji lẹpo na yọ́ kọnyinai;Gbekanlin danji tọn po ohẹ̀ agahomẹ tọn lẹ po,Kakajẹ whèvi hùmẹ tọn lẹ lọsu ji na dọ̀n.
4 “Ṣigba, mì dike mẹde dọnnu kavi wọhẹmẹ blo,+Na omẹ mìtọn lẹ taidi mẹhe nọ dọnnu hẹ yẹwhenọ.+
5 Enẹwutu, mì na dahli to kléwhète,Bọ yẹwhegán nasọ dahli po mì po, taidi to zánmẹ.
Yẹn nasọ bọnùdo* na onọ̀ mìtọn.
6 Yè na bọnùdo* na omẹ ṣie lẹ, na oyọnẹn depope ma tin wutu.
Na mì ko gbẹ́ oyọnẹn dai wutu,+Yẹnlọsu na gbẹ́ mì dai bọ mì ma na sẹ̀n taidi yẹwhenọ ṣie;Podọ na mì ko wọnji osẹ́n* Jiwheyẹwhe mìtọn tọn go wutu,+Yẹnlọsu na wọnji visunnu mìtọn lẹ go.
7 Dile yé to susudeji do, mọ wẹ yé nọ to ylando wà sọta mi do niyẹn.+
Yẹn na diọ gigo yetọn zun winyan.*
8 Yé nọ dù sọn ylando omẹ ṣie lẹ tọn mẹ,Bo nọ donukunkẹn do* nuṣiwa yetọn go.
9 Nudopolọ wẹ na jọ do mẹlọ lẹ po yẹwhenọ po go;Yẹn na hẹn yé nado dogbè na aliho yetọn lẹ,Yẹn nasọ hẹn kọdetọn nuyiwa yetọn lẹ tọn wá yé ji.+
10 Yé na nọ dùnú, ṣigba yé ma na nọ gọ́ho.+
Yé na nọ zan walọ gblezọn,* ṣigba yé ma na sudeji,+Na yé ma tindo sisi depope na Jehovah wutu.
11 Galilọ,* ovẹn po ovẹn yọyọ poNọ de mẹwhinwhàn nado wà nuhe sọgbe sẹ̀.*+
12 Omẹ ṣie lẹ nọ kannubiọ boṣiọ atin tọn yetọn lẹ,Bo nọ to nuhe aglọpò* yetọn dọna yé lẹ wà;Na gbigbọ galilọ* tọn nọ hẹn yé nado danbú,Podọ gbọn galilọ* yetọn dali, yé gbẹ́ nado litaina Jiwheyẹwhe yetọn.
13 Yé nọ sanvọ́ to osó lẹ ji aga,+Bo nọ basi avọ́sinsan mimẹ̀ lẹ to okọ́ta lẹ ji,Podọ to atin oaki tọn lẹ, atin stolasi tọn lẹ po atin daho lẹpo po glọ,+Na oyẹ̀ yetọn nọ yọ́n wutu.
Enẹ wẹ zọ́n bọ viyọnnu mìtọn lẹ nọ lọga*Bọ ovisi mìtọn lẹ nọ deayọ.
14 Yẹn ma na hẹn viyọnnu mìtọn lẹ nado dogbè, na galilọ* yetọn wutu,Podọ ovisi mìtọn lẹ, na ayọdide yetọn wutu.
Na sunnu lẹ nọ tọ́nyi hẹ galọtọ lẹBo nọ sanvọ́ hẹ galọtọ tẹmpli mẹ tọn lẹ;Omẹ mọnkọtọn lẹ he ma tindo nukunnumọjẹnumẹ+ na sudo.
15 Islaeli E, dile etlẹ yindọ hiẹ to galọ,*+A dike Juda hùwhẹ blo.+
A wá Gilgali+ kavi Bẹti-aveni+ blo,Mọ a whlé blo dọ, ‘Dile Jehovah togbẹ̀!’+
16 Na taidi oyìnsi tasinyẹntọ de, Islaeli ko lẹzun tasinyẹntọ.+
Todin, be Jehovah na yìn yé taidi agbò winyanwinyan de to kanlindugbo he to flala* de ji wẹ ya?
17 Eflaimi ko kọnawudopọ hẹ boṣiọ lẹ.+
Mì jo e do!
18 To whenue bia-hàn* yetọn vọ̀,Yé jẹ walọ gblezọn zan ji.*
Ogán* etọn lẹ sọ yiwanna winyan taun.+
19 Jẹhọn na plọ́ ẹ sọyi,Bọ winyan na hù yé na avọ́sinsan yetọn lẹ wutu.”
Nudọnamẹ Odò Tọn
^ Kavi “hẹn vasudo wá.”
^ Kavi “hẹn vasudo wá.”
^ Kavi “anademẹ.”
^ Kavi vlavo, “Yé ko diọ gigo ṣie zun winyan.”
^ Kavi “na peve to fẹnnuwiwa mẹ; na lọga.”
^ To paa mẹ, “Nọ de ahun sẹ̀.”
^ Kavi “Fẹnnuwiwa; Walọ gblezọn.”
^ Kavi “opò dọṣẹdidọ tọn.”
^ Kavi “fẹnnuwiwa; walọ gblezọn.”
^ Kavi “fẹnnuwiwa; walọ gblezọn.”
^ Kavi “zan walọ fẹnnuwiwa tọn; zan walọ gblezọn.”
^ Kavi “fẹnnuwiwa; walọ gblezọn.”
^ Kavi “walọ fẹnnuwiwa tọn zan; walọ gblezọn zan.”
^ To paa mẹ, “fihe gblo.”
^ Kavi “bia-hàn likun tọn.”
^ Kavi “Yé peve to fẹnnuwiwa mẹ; lọga.”
^ To paa mẹ, “Awọ̀yinu.”
