To owhe 30 he wayi lẹ gblamẹ, mẹsusu tindo numọtolanmẹ lọ dọ gbekọndopọ tin to otò voovo lẹ ṣẹnṣẹn lẹdo aihọn pé bọ haṣinṣan he to ṣẹnṣẹn yetọn fọ́n bo to tepọn dogọ. Amọ́, nujijọ he wá aimẹ to agọe lẹ ko dohia dọ e ma yinmọ dandan.

•    “To whenue mẹsusu to nuhà dọ awhàn he to yìyì to Gaza na bẹpla otò devo lẹ, Israël po Hezbollah po jẹ awhànfun sọta yede ji to dogbó Liban tọn ji.”—Sọgbe hẹ linlin Reuters tọn to 6 janvier 2024.

•    “Ogbẹ́ he Iran to anadena lẹ to awhàn tọ́n mẹlẹ to ofi voovo lẹ bọ Iran vọ́ gọ̀ jẹ awuwlena awhànfunnu he nọ hẹnnugble taun lẹ ji to ajiji mẹ, podọ na Russie po Chine po to adà etọn mẹ todin wutu, Iran lẹzun nuhahun de na otò Whèyihọ tọn lẹ.”—Sọgbe hẹ linlin The New York Times tọn to 7 janvier 2024.

•    “Bọmbu he dà Russie te lẹ to nuhẹngble taun to Ukraine.”—Sọgbe hẹ linlin ONU tọn to 11 janvier 2024.

•    “Ninọmẹ akuẹzinzan tọn Chine tọn he to pinpọnte dogọ gọna huhlọn awhànfunfun tọn etọn he to jijideji, gbigbọ wanyina otò mẹtọn tọn he to sinsinyẹn deji to Taiwan gọna haṣinṣan Chine po États-Unis po tọn he ma yọ́n sọmọ, gán zọ́n bọ awhàn de na gbajẹgbonu to whedepopenu.”—Sọgbe hẹ linlin The Japan Times tọn to 9 janvier 2024.

 Be Biblu dọ nudepope gando hunyanhunyan he mọ mí te to otò lẹ ṣẹnṣẹn to egbehe go wẹ ya? Be e na dekọtọn do wẹkẹ-whàn devo mẹ wẹ ya?

 Biblu ma dọ dọdai awhàn tangan de tọn to awhàn he mọ mí te to egbehe lẹ mẹ. Amọ́, e dọ dọdai awhàn he to gbigbayipe to ojlẹ mítọn mẹ bo to ‘jijọho desẹ sọn aigba ji’ lẹ tọn.—Osọhia 6:4.

 Owe Daniẹli tọn dọ dọdai dọ “to ojlẹ opodo tọn mẹ,” huhlọn aihọn tọn he to agbàwhlẹn lẹ na jẹ “sisẹsisẹ” yede ji kavi hoavùn nado dugán. Avùnhiho enẹ na biọ dọ yé ni do huhlọn awhànfunfun tọn daho yetọn hia bosọ zan “adọkunnu . . . lẹ” kavi akuẹ susu.—Daniẹli 11:40, 42, 43.

 Biblu dohia dọ ninọmẹ aihọn lọ tọn na ylan deji whẹpo do wá pọnte. Jesu dọ dọdai dọ “nukunbibia daho de na tin ehe nkọ ma ko jọ pọ́n sọn bẹjẹeji aihọn tọn gbọ́n.” (Matiu 24:21) “Nukunbibia daho” enẹ na dekọtọn do awhàn de mẹ he nọ yin yiylọdọ Amagẹdọni, ehe zẹẹmẹdo “awhàn azán daho Jiwheyẹwhe Ganhunupotọ lọ tọn.”—Osọhia 16:14, 16.

 Etomọṣo, awhàn Amagẹdọni tọn na whlẹn gbẹtọvi lẹ wẹ, kakati nado và yé sudo. Gbọn awhàn enẹ gblamẹ, Jiwheyẹwhe na hẹn opodo wá na gandudu gbẹtọvi tọn he ko dekọtọn do awhàn he nọ hẹnnugble taun lẹ mẹ. Nado mọ lehe awhàn Amagẹdọni tọn na hẹn jijọho he na dẹn-to-aimẹ wá do, hia hosọ he bọdego lẹ:

•    “Etẹwẹ Awhàn Amagẹdọni Tọn Zẹẹmẹdo?”

•    “Amagẹdọni—Wẹndagbe De!”