Ojlẹ vude whẹpo akọta Islaeli tọn nado biọ Aigba Pagbe tọn ji, yèdọ nudi owhe kanweko donu 35 die, Jiwheyẹwhe dọ dọ emi na basi hihọ́na yé sọn “awutu ylankan” he yé ko yọnẹn to Egipti lẹ mẹ. (Deutelonomi 7:15) Aliho dopo he mẹ e wà ehe te wẹ gbọn nudọnamẹ gigọ́ lẹ nina yé gando azọ̀n po wiwejininọ po go dali. Di apajlẹ:

•   Todohukanji osẹ́n tọn he yin nina akọta lọ biọ to yé si nado nọ lawu bo nọ yàn avọ̀ yetọn lẹ.—Levitiku 15:4-27.

•   Gando afọdai gbẹtọ tọn go, Jiwheyẹwhe dọmọ: “Otẹn nuglọ tọn de dona yin kinklandovo nado nọ yin yiyizan to gbonu osla lọ tọn, bọ finẹ wẹ hiẹ ni nọ yì. Dòkunnu de dona tin to azọ́nwanu towe lẹ mẹ. To whenuena hiẹ yì afọdai gbé to gbonu, a dona nọ yí i do kùndò, podọ to enẹgodo ṣinyọnnudo afọdai towe.”—Deutelonomi 23:12, 13.

•   Mẹhe tindo azọ̀n bẹplamẹ lẹ nọ yin ginglọndo fide—ma nado biọ mẹdevo lẹ mẹ na ojlẹ de. Whẹpo yé nado lẹkọwa osla lọ mẹ, mẹhe jẹgangan sọn azọ̀n yetọn mẹ lẹ dona yàn awù yetọn lẹ bosọ lawu to osin mẹ eyin yé na yin pinpọnhlan taidi “wiwe.”—Levitiku 14:8, 9.

•   Mẹdepope he doalọ oṣiọ de go nọ yin ginglọndo fide.—Levitiku 5:2, 3; Sọha lẹ 19:16.

 Islaelivi lẹ ko yìn osẹ́n he gando wiwejininọ go hoho whẹpo doto lẹ do wá na ayinamẹ mọnkọtọn lẹ to owhe susu lẹ godo.

 Amọ́, nujinọtedo wiwejininọ tọn mọnkọtọn ma tin to akọta he lẹdo yé lẹ mẹ. Di apajlẹ:

•   Afọdai lẹ nọ yin kinkọndo aliho lẹ ji. Osin he yin hinhẹnflu, núdùdù gbigble lẹ gọna dihónu wunmẹ devo lẹ zọ́n bọ lẹdo yetọn mẹ kudiho bọ azọ̀n po okú ovivu lẹ tọn po sù taun.

•   Doto hohowhenu tọn lẹ ma yọ́n nususu kavi ma tlẹ yọ́n nudepope gando wánvú he nọ doazọ̀nmẹ lẹ go. Egiptinu lẹ nọ yí nuhe yé nọ ylọdọ amasin lẹ taidi ohùn alọtlọ tọn, afọdai tọ̀pápá-bẹ́gaa tọn, ajaka kúkú, adọ́ po blẹdi he ko fùnwhà lẹ po zan. Yé tlẹ sọ nọ yí afọdai gbẹtọ po kanlin po tọn zan to aliho nukunpedomẹgo dotowhé tọn yetọn lẹ mẹ.

•   Egiptinu hohowhenu tọn lẹ bẹ wánvú voovo he nọ doazọ̀nmẹ lẹ sọn Tọ̀sisa Nile tọn po tándo he mẹ e nọ sà yì lẹ po mẹ. Mọdopolọ, ovivu susu wẹ kú to Egipti na azọ̀n osla tọn gọna azọ̀n mọnkọtọn devo lẹ he nọ yin bibẹ gbọn núdùdù he yin hinhẹnflu lẹ dali.

 To alọ devo mẹ, Islaelivi lẹ mọaleyi bo tindo agbasalilo dagbe na yé setonuna nujinọtedo he tin to Osẹ́n Jiwheyẹwhe tọn mẹ lẹ wutu.