Be agbasalilo towe to yinylan deji wẹ ya? Eyin mọ wẹ, a na ko yọ́n nuhahun he agbasamalo nọ hẹnwa to apọ̀nmẹ podọ to numọtolanmẹ-liho gọna akuẹzinzan he nukunpedomẹgo lọ gán biọ. Etẹwẹ gán gọalọna we nado pehẹ ẹ? Nawẹ a gán gọalọna hagbẹ whẹndo tọn kavi họntọn towe de he to azọ̀n de jẹ gbọn? Nugbo wẹ dọ Biblu ma bẹ nudọnamẹ lẹ hẹn gando nukunpedomẹgo dotowhé tọn go, amọ́ e bẹ ayinamẹ dagbe lẹ hẹn he gán gọalọna we nado doakọnna ninọmẹ towe dile a pé e go do.

•   Biọ alọgọ doto lẹ tọn

   Nuhe Biblu dọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.”—Matiu 9:12.

   Lehe e gán yin yíyí-do-yizan mẹ do: Dín alọgọ doto azọ́nyọnẹntọ lẹ tọn eyin e biọ domọ.

   Tẹ́n ehe pọ́n: Yí nukunpedomẹgo dagbe hugan he a mọ zan. To whedelẹnu, e gán biọ dọ a ni dín alọgọ doto devo lẹ tọn. (Howhinwhẹn lẹ 14:15) Dọhodopọ hẹ doto towe lẹ ganji—bo hẹn diun dọ a mọnukunnujẹ nue dọ yé te mẹ bosọ dike yelọsu ni yọ́n nue to wiwà we lẹ ganji. (Howhinwhẹn lẹ 15:22) Dindona azọ̀n he jẹ a te po nukunpedomẹgo voovo he tin lẹ po. Eyin a mọnukunnujẹ nuhe gán wá jọ mẹ, a na wleawufo nado pehẹ ninọmẹ towe to numọtolanmẹ-liho podọ nado bayi nudide dagbe gando nukunpedomẹgo he a jlo na mọyi go.

•   Nọ wà nue na wà dagbe na agbasalilo towe

   Nuhe Biblu dọ: “Agbasa yiyizan yin alenu.”—1 Timoti 4:8

   Lehe e gán yin yíyí-do-yizan mẹ do: E na wà dagbe na we eyin a nọ daihun lanmẹyiya tọn to gbesisọ mẹ.

   Tẹ́n ehe pọ́n: Nọ daihun lanmẹyiya tọn whẹwhẹ, nọ dù núdùdù hunsindagbe tọn lẹ bo nọ damlọn ganji. Dile etlẹ yindọ a gán to adàdiọ sọgbe hẹ azọ̀n yọyọ he a bẹ, doto lẹ dọ dọ e na pà we eyin a nọ dovivẹnu nado wà nuhe na wà dagbe na agbasalilo towe to gbesisọ mẹ. Nọ hẹn ẹn diun dọ nudepope he a de nado wà ma na bẹpla ninọmẹ towe po nukunpedomẹgo dotowhé tọn he mọyi a te po.

•   Biọ alọgọ mẹdevo lẹ tọn

   Nuhe Biblu dọ: “Họntọn nugbo nọ yiwannamẹ to whelẹponu podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

   Lehe e gán yin yíyí-do-yizan mẹ do: Họntọn towe lẹ gán gọalọna we nado doakọnna ninọmẹ sinsinyẹn lẹ.

   Tẹ́n ehe pọ́n: Dọho hẹ họntọn he go a dejido de he a gán voawu bo dọ homẹ na. Ehe gán gọalọna we nado de ayimajai towe pò bo hẹn we do ayajẹ. Họntọn lẹ po whẹndo towe po gán jlo na gọalọna we to aliho devo lẹ mẹ bo gán nọma yọ́n nuhe yé na wà. Enẹwutu, dọ nuhe yé sọgan wà nado gọalọna we lẹ na yé to aliho he họnwun mẹ. Ma nọ donukun nususu sọn yé si blo, podọ nọ dopẹ́ whelẹponu na nuhe yé nọ wà na we lẹ. To ojlẹ dopolọ mẹ, e gán biọ dọ a ni de whla nẹmu he mẹlẹ na nọ wá dla we pọ́n po ojlẹ nẹmu he yé na zan to dewe po pò, na vivẹnu ahundopo tọn he do họntọn lẹ te nikaa húagbọ́ we.

•   Nọ do linlẹn dagbe

   Nuhe Biblu dọ: “Amasin dagbe de wẹ ahun he gọ́ na ayajẹ yin, ṣigba, ayiha he jẹflumẹ nọ hẹnmẹ gbọjọ.”—Howhinwhẹn lẹ 17:22.

   Lehe e gán yin yíyí-do-yizan mẹ do: Linlẹn dagbe po todido lọ po dọ nulẹ na pọnte gán zọ́n bọ ahun towe ma na nọ gbàdo bọ a na penugo nado doakọnna azọ̀n he jẹ a te.

   Tẹ́n ehe pọ́n: Dile a to adàdiọ sọgbe hẹ ninọmẹ towe dintọn, ze ayiha towe do nuhe a sọgan wà ji, e ma yin do nuhe zẹ̀ huhlọn towe go ji. Ma nọ yí dewe jlẹdo mẹdevo lẹ go blo bo masọ nọ yí ninọmẹ towe dintọn jlẹdo lee a te dai whẹpo do bẹ azọ̀n go blo. (Galatianu lẹ 6:4) Ze yanwle he na bọawuna we nado jẹ e kọ̀n lẹ dai—ehe gán gọalọna we nado mọdọ sọgodo na yọ́n. (Howhinwhẹn lẹ 24:10) Nọ gọalọna mẹdevo lẹ dile a pé e go do. Ayajẹ he nọ wá sọn nunamẹ mẹ gán gọalọna we ma nado nọ ze ayiha do nuhahun towe lẹ ji.—Owalọ lẹ 20:35.

 Biblu dohia dọ Jehovah Jiwheyẹwhe a gán gọalọna we nado duto azọ̀n towe ji. Dile etlẹ yindọ mí ma gán donukun azọ̀nhẹngbọ to azọ́njiawu-liho, mẹhe nọ sẹ̀n Jiwheyẹwhe lẹ gán mọ alọgọ etọn to aliho he bọdego ehelẹ mẹ:

 Jijọho. Jehovah gán na mí “jijọho Jiwheyẹwhe tọn he yiaga hugan nukunnumọjẹnumẹ lẹpo.” (Filipinu lẹ 4:6, 7) Jijọho kavi vivomẹninọ ahun mẹ tọn enẹ, gán gọalọna mẹde ma nado nọ hanú glanglan. Jiwheyẹwhe nọ na jijọho mọnkọ mẹhe nọ hodẹ̀ hlan ẹn bo nọ dọ nuhe to ahunmẹduna yé na ẹn lẹ.—1 Pita 5:7.

 Nuyọnẹn. Jehovah gán namẹ nuyọnẹn nado bayi nudide nuyọnẹn tọn lẹ. (Jakọbu 1:5) Mẹde nọ mọ nuyọnẹn enẹ yí whenue e hia Biblu bo yí ayinamẹ he to e mẹ lẹ do yizan mẹ.

 Todido dejidego sọgodo tọn de. Jehovah dopagbe sọgodo de tọn, enẹ wẹ whenue “depope to mẹhe nọ nọ̀ aigba . . . ji lẹ mẹ ma na dọmọ: ‘N’to azọ̀njẹ.’” (Isaia 33:24) Todido ehe nọ gọalọna mẹsusu nado tindo linlẹn dagbe mahopọnna nuhahun agbasalilo tọn he tlẹ vẹawu taun lẹ.—Jelemia 29:11, 12.