Yẹdide he yiaga na mẹtlu ṣinatọ̀n, ehe yè wà anazọ́n etọn do adógo de tin to fihe sẹpọ họntonu tẹmpli yẹwhe Amun tọn to Karnak, to Egipti hohowhenu tọn. Sọgbe hẹ weyọnẹntọ lẹ, yẹdide lọ do lehe Falo Ṣiṣaki gbawhàn aigba he to agewaji-whèzẹtẹn Egipti tọn lẹ kakajẹ Juda po ahọluduta agewaji tọn Islaeli tọn po ji do hia.

 Yẹdide lọ do Amun hia dile e to kanlinmọ 150 linlán he yin biblá lẹ zejo na Ṣiṣaki, kavi Ṣeṣọnki. a Kanlinmọ lọ lẹ dopodopo nọtena dopo to tòpẹvi kavi akọta he yé gbawhàn etọn lẹ mẹ. Yè kàn yinkọ tòpẹvi he mẹ kanlinmọ dopodopo wá sọn tọn do agbasa etọn go. Susu to yinkọ lọ lẹ mẹ gbẹ́ yọ́n hia, bọ Biblu-hiatọ lẹ yọ́n delẹ to yé mẹ ganji. Delẹ to yé mẹ wẹ Bẹti-ṣeani, Gibeọni, Mẹgido po Ṣunẹmi po.

 Lehe Ahọlu Egipti tọn tọ́nawhàn Juda do yin nùdego to Biblu mẹ. (1 Ahọlu lẹ 14:25, 26) Na nugbo tọn, Biblu na nudọnamẹ gigọ́ gando awhàn-tọ́nmẹ Ṣiṣaki tọn go. Mí hia dọmọ: “To owhe atọ́ntọ Ahọlu Lehoboami tọn mẹ, Ahọlu Ṣiṣaki Egipti tọn hẹji wá nado hoavùn hẹ Jelusalẹm. . . . Ewọ tindo osọ́-kẹkẹ 1 200, osọ́nọ 60 000 gọna awhànfuntọ madosọha lẹ he hodo e wá sọn Egipti . . . E sọ yí tòdaho gángán Juda tọn lẹ bo wá jẹ Jelusalẹm to godo mẹ.”—2 Otànnugbo lẹ 12:2-4.

 E ma yin yẹdide he yin mimọ to Karnak kẹdẹ wẹ yin kunnudenu dodinnanu-dokunkun tọn he dohia dọ Ṣiṣaki tọ́nawhàn aigba Islaeli tọn gba. Zannu gbigbà de he yin mimọ to otò Mẹgido tọn he yin nùdego to Biblu mẹ lọ sọ tindo yinkọ lọ “Ṣeṣọnki.”

 Aliho he mẹ Biblu-kantọ lẹ basi kandai awhàngbigba Ṣiṣaki tọn do Juda ji te yin apajlẹ nugbonọ-yinyin tọn de. Yé gbọn nugbonọ-yinyin dali basi kandai whenue akọta yetọn gbawhàn po whenue e ṣíawhàn po tọn. E ma yá nado mọ wekantọ hohowhenu tọn devo lẹ ni dọ nugbo to aliho mọnkọ mẹ.