“Sọn owhe 19 die gbọ́n wẹ n’o to nukundo e!” Etẹwẹ mẹ’sunnu mítọn to nukundo? Owe-Wiwe Glẹki Tọn Lẹ-Lẹdogbedevomẹ Aihọn Yọyọ Tọn to anọ́nù-gbè etọn, Bengali-gbè mẹ wẹ. Numọtolanmẹ mọnkọ wẹ mẹsusu nọ do whenue Lẹdogbedevomẹ Aihọn Yọyọ Tọn yin didetọn to ogbè yetọn mẹ. Amọ́ be a’o lẹnnupọndo azọ́n planplan he e nọ biọ nado basi lẹdogbedevomẹ po zinjẹgbonu Biblu enẹlẹ tọn po ji pọ́n ya?

 Tintan, pipli lẹdogbedevomẹ tọn de nọ yin azọ́ndena to anademẹ Wedegbẹ́ Wekinkan Tọn Hagbẹ Anademẹtọ lọ tọn glọ. Jlẹ nẹmu wẹ e nọ biọ nado basi lẹdogbedevomẹ Biblu tọn? Nicholas Ahladis, he nọ wazọ́n hẹ Azọ́nwatẹn Lẹdogbedevomẹ tọn to Warwick, New York, basi zẹẹmẹ dọ: “Nususu ji wẹ yè nọ lẹnnupọndo, di apajlẹ lẹdogbedevomẹ-basitọ nẹmu he tin nado wazọ́n do tito lọ ji, lehe ogbè lọ gẹdẹ do sọ, lehe mẹhe nọ hia ogbè lọ lẹ mọnukunnujẹ whenuho Biblu tọn mẹ do sọ, gọna lehe ogbè lọ nọ gbọnvo do sọ sọn lẹdo de mẹ jẹ devo mẹ. To madozẹnzẹn mẹ, owhe dopo yì atọ̀n wẹ e nọ yí to pipli de si nado basi lẹdogbedevomẹ Owe-Wiwe Glẹki Tọn lẹ tọn, podọ owhe ẹnẹ kavi humọ na Biblu blebu. Lẹdogbedevomẹ do tokunọ-gbè lẹ mẹ tlẹ sọ nọ yí whenu humọ.”

 Pipli lẹdogbedevomẹ tọn lọ kẹdẹ ma’o pé nado basi lẹdogbedevomẹ Biblu tọn. Pipli wehiatọ lẹ tọn he bẹ omẹ he wá sọn fi voovo lẹ—vlavo sọn otò voovo lẹ mẹ—nọ gbadopọnna lẹdogbedevomẹ lọ, bo nọ wàmọ vọnu. Ayidonugo yetọn lẹ nọ gọalọna lẹdogbedevomẹtọ lẹ na lẹdogbedevomẹ yetọn nido sọgbe, họnwun bosọ gọ́na zẹẹmẹ. To popolẹpo mẹ, dile mẹmẹsunnu de he nọ plọnazọ́n lẹdogbedevomẹtọ Biblu tọn lẹ to Afrique du Sud dọ do, “lẹdogbedevomẹtọ lẹ nọ do numọtolanmẹ lọ dọ azọngban titengbe de wẹ to abọ́ ji na yé sọn Jehovah dè podọ do ota mẹhe nọ hia Ohó etọn lẹ tọn mẹ.”

 To whenue lẹdogbedevomẹ lọ ko yin tadona godo, vọkan Biblu tọn lẹ dona yin zinzinjẹgbonu bo yin bibladopọ. Nado wàmọ, wezintẹn lẹ nọ yí e whè gbau azọ́nwanu voovo ao zan: enẹ wẹ wema, wesin, nutlẹnu, okàn, nuyizan owe bladopọ tọn lẹ gọna nú mọnkọ devo lẹ. To 2019, dọla amelika tọn livi 20 linlán wẹ yin zinzan nado họ̀ azọ́nwanu enẹlẹ kẹdẹ na zinjẹgbonu Biblu tọn lẹ. To whe dopolọ mẹ, ganhiho 300 000 linlán wẹ mẹhe nọ wazọ́n to wezintẹn mítọn lẹ yizan nado basi zinjẹgbonu vọkan Biblu tọn lẹ tọn bo do yé hlan fi voovo lẹ.

 Naegbọn mí nọ yí whenu po akuẹ susu sọmọ po zan to azọ́n ehe kọ̀n? Joel Blue he nọ wazọ́n to Azọ́nwatẹn Wezinjẹgbonu Lẹdo Aihọn Pé tọn dọ: “Biblu wẹ yin owe titengbe hugan he mí nọ wleawuna. Enẹwutu, ojlo mítọn wẹ yindọ awusọhia etọn ni pagigona Jiwheyẹwhe mítọn, bo wleyẹyina wẹndagbe lọ.”

 Gbọnvona zinjẹgbonu paa Lẹdogbedevomẹ Aihọn Yọyọ tọn lẹ, mí sọ nọ wleawuna zinjẹgbonu delẹ na wehiatọ he do hudo vọnọtaun delẹ. Di apajlẹ, Lẹdogbedevomẹ Aihọn Yọyọ tọn na nukuntọ́nnọ lẹ tin-to-aimẹ to ogbè ao mẹ. E gán yí gànhiho ṣinatọ̀n nado wleawuna vọkan Biblu nukuntọ́nnọ lẹ tọn dopo, podọ adà voovo etọn lẹ nọ yitẹn sọmọ bọ fie yè nọ tò yé do nọ dite na e whè gbau mẹtlu 2 linlán. Mí sọ nọ wleawuna zinjẹgbonu vonọtaun Biblu tọn lẹ na gàntọ lẹ to fie owe lẹ kẹdẹ nọ yin alọkẹyi te lẹ.

 Lẹdogbedevomẹ Aihọn Yọyọ Tọn nọ yinuwado gbẹzan mẹhe nọ hia ẹ lẹ tọn ji. Agun Kiluba-gbè tọn to Tombe, to République Démocratique du Congo yin kunnudenu etọn. Tombe to kilomẹtlu 1 700 linlán do tatọ-tònọ otò lọ tọn. Vọkan Biblu tọn dopo gee wẹ tin-to-aimẹ dai na Kunnudetọ he to finẹ lẹ, podọ wunmẹ Kiluba-gbè tọn hoho de wẹ to e mẹ. Biblu dopo gee enẹ wẹ nọ yì sọ mẹ’sunnu de ji jẹ devo ji na yé nido sọgan wleawuna adà voovo pli lẹ tọn. Amọ́, sọn août 2018, vọkan Lẹdogbedevomẹ Aihọn Yọyọ Tọn blebu do Kiluba-gbè agọe tọn mẹ tin-to-aimẹ na mẹlẹpo to agun lọ mẹ.

 Mẹ’yọnnu de he nọ do Allemagne-gbè dọ gando Lẹdogbedevomẹ Aihọn Yọyọ Tọn he yin vivọjlado to ogbè etọn mẹ go dọ: “Biblu hihia masọ nọ vẹawuna mi ba. Kakatimọ, n’nọ to jejeji bo nọ kanse dee dọ, ‘Whetẹnu wẹ n’nasọ hia ẹ dogọ?’” Gàntọ de wlan dọ: “Yè na mi vọkan Lẹdogbedevomẹ Aihọn Yoyọ Tọn dopo, podọ e to gbẹzan ṣie diọ pete. N’ma’o mọnnukunnujẹ Ohò Jiwheyẹwhe tọn mẹ domọ pọ́n gbede sọn whenue n’jẹ lẹdogbedevomẹ ehe hia ji. N’jlo na yọ́n nususu dogọ gando Kunnudetọ Jehovah tọn lẹ po lehe yẹnsu gán lẹzun Kunnudetọ de do po go.”

 Mẹhe nọ hia Lẹdogbedevomẹ Aihọn Yọyọ Tọn lẹpo yọ́n pinpẹn nunina he nọ hẹn zinjẹgbonu etọn yọnbasi lẹ tọn. Nunina ehelẹ na azọ́n lẹdo aihọn pé tọn lọ nọ yin bibasi gbọn donate.mt1130.com ji. Mì wanu susu na alọtútlú mìtọn.