Plidopọ daho 2020 tọn jẹna ayidego taun—na whla tintan niyẹn he Plidopọ daho de yin yiyidokanji lẹdo aihọn pé bo yin zizedo Intẹnẹt ji! Amọ́, to Malawi po Mozambique po, suhugan mẹmẹsunnu po mẹmẹyọnnu mítọn lẹ po tọn wẹ duvivi plidopo lọ tọn matin Intẹnẹt yiyizan. Etẹwẹ hẹn ehe yọnbayi?

 Wedegbẹ́ Anadenanutọ tọn po Mẹpinplọn tọn Hagbẹ Anademẹtọ lọ tọn po nagbè dọ tito plidopọ lọ tọn lẹ gán yin pinpọn to televiziọn ji podọ yé gán yin hihò to ladio ji to Malawi po Mozambique po. Naegbọn yé do bayi nudide ehe? Na Malawi yin dopo to otò he mẹ Intẹnẹt vẹkue te hugan to aihọn lọ mẹ wutu, podọ Kunnudetọ vude poun janwẹ gán yí Intẹnẹt zan. William Chumbi he yin dopo to Wedegbé Alahọ Malawi tọn lẹ mẹ dọ dọ: “Ladio po televiziọn po ji kẹdẹ wẹ mẹmẹsunnu po mẹmẹyọnnu lẹ po gán duvivi plidopo lọ tọn te.” Luka Sibeko he yin Hagbẹ Wedegbẹ́ Alahọ Malawi tọn devo yidogọ dọ: “Eyin mí ma ko duvivi etọn gbọn televiziọn po ladio po ji wẹ, be mẹmẹsunnu vude poun janwẹ gán ko mọaleyi sọn plidopo lọ mẹ to aigba-denamẹ alahọ mítọn tọn ji.” To Mozambique, eyin yè tlẹ de Intẹnẹt tọn sọn e mẹ, mẹmẹsunnu vude poun wẹ gán họ̀ nuyizan he yé gán do duvivi plidopọ lọ tọn.

 Na azọ̀nylankan COVID-19 tọn lọ wutu, televiziọn-họsa delẹ ko to opli agun tọn mítọn lẹ dohia podọ ladio-họsa delẹ ko to opli agun tọn mítọn lẹ hò. a Mẹmẹsunnu mítọn lẹ dọho hẹ azọ́nwhé ehelẹ bo biọ gànmẹ dogọ na tito plidopo lọ tọn lẹ nido yin hihò ga.

 To Malawi, mẹmẹsunnu mítọn lẹ pehẹ nuhahun de. To paa mẹ, ganhihò dopo janwẹ azọ́nwhé televiziọn kavi ladio tọn lẹ nọ yigbe nado sà na ahisinọ yetọn lẹ. Azọ́nwhé lọ lẹ mọdọ mẹlẹ ma na do ojlo na tito televiziọn kavi ladio tọn he nọ dẹn hugan lẹ. Amọ́, mẹmẹsunnu mítọn lẹ bayi zẹẹmẹ dọ azọ́n míton nọ gọalọna gbẹtọ lẹpo wẹ. Etlẹ yin to whenue mẹlẹ yin ginglọndo whegbè ehe, mí to wẹndagbe lá na yé nado miọnhomẹna yé sọn Biblu mẹ, podọ ehe gán gọalọna yé nado yin tòvi dagbe bosọ do ayajẹ to whẹndo mẹ. To whenue azọ́nwhé lọ lẹ sè ehe, yé yigbena gànmẹ he mẹmẹsunnu mítọn lẹ biọ dogọ lọ.

 To Malawi, plidopọ lọ yin didohia to televiziọn-họsa dopo bosọ yin hihò to ladio-họsa dopo, podọ gbẹtọ livi susu wẹ gán hodo tito plidopọ lọ tọn he azọ́nwhé awe lọ lẹ to hihò to fidepope he yé te to otò lọ mẹ. To Mozambique, televiziọn-họsa dopo wẹ do plidopo lọ hia, podọ ladio-họsa 85 wẹ hò plidopọ lọ.

 To otò awe lẹpo mẹ, lẹndopọ akuẹ he yin zinzan nado do plidopọ lọ hia to televiziọn ji wẹ dọla 28 227 b (nudi 15 400 000F CFA) podọ diblayi dọla 20 000 (nudi 10 900 000F CFA) wẹ yin zinzan nado hò tito lọ to ladio ji. Akuẹ he yè yí do hò tito lọ to ladio ji gbọnvo sọn fide jẹ fide. Ladio-họsa pẹvi lẹ nọ yí dọla 15 (nudi 8 000F CFA) bọ ladio-họsa nukundeji lẹ nọ yí dọla 2 777 (nudi 1 500 000F CFA).

 Mẹmẹsunnu mítọn lẹ dovivẹnu taun bo ma zan nunina lẹ do apà mẹ. Di apajlẹ to Malawi, mẹmẹsunnu lẹ dín ladio kavi televiziọn-họsa he gán de akuẹ pò na yé lẹ, azọ́nwhé de tlẹ de nudi mado enẹ daa akuẹ he yé dona sú tọn pò. Ehe zọ́n bọ mí ma hẹn dọla 1 711 (nudi 930 000F CFA) gú. To Mozambique, azọ́nwhé delẹ tlẹ de nado de akuẹ pò na mí, na oyín dagbe po nugbonọ-yinyin mítọn po podọ na mí nọ suahọ do mẹwhenu wutu.

 E vivi na mẹmẹsunnu mítọn lẹ taun nado pọ́n kavi dotó plidopọ lọ to televiziọn kavi ladio lẹdo yetọn lẹ tọn ji. Patrick he yin mẹho agun tọn de to Malawi dọmọ: “Mí dọnudo Hagbẹ Anademẹtọ lọ taun dọ yé lẹnnupọndo mí ji to aliho vonọtaun mẹ to azọ̀nylankan ehe whenu.” Isaac he yin Malawi-nu devo dọ dọ: “Mí ma do alokan kavi tablẹti, enẹwutu mí dopẹna awuwledainanu he titobasinanu Jehovah tọn bayi na mí nido dotó tito plidopọ lọ tọn to ladio ji. Awuwledainanu ehe zọ́n bọ yẹn po whẹndo ṣie blebu po mọaleyi sọn plidopọ lọ mẹ. Mí mọdọ kunnudenu de wẹ ehe yin dọ Jehovah yiwanna omẹ etọn lẹ.”

 Plidopọ daho 2020 tọn lọ wẹ plidopọ daho tintan he wẹnlatọ de bayi to Mozambique. E dọ dọ: “Tito he yin bibayi nado pọ́n plidopọ lọ to televiziọn ji flinnu mi dọ Jehovah wẹ Jiwheyẹwhe ganhunupotọ lọ. Azọ̀nylankan lọ ma glọnalina ẹn nado na mí núdùdù gbigbọmẹ tọn podọ nado má ẹn hẹ mi to ohọ̀ ṣie mẹ tlọlọ. N’mọdọ owanyi tin to omẹ Jehovah tọn lẹ ṣẹnṣẹn nugbo. N’kudeji dọ sinsẹ̀n nugbo lọ die.”

 Mẹho agun tọn de he nọ yin Wyson dọ dọ: “N’jlo na dopẹna afanumẹ nugbonọ lọ, na lehe e penukundo mí go do to azọ̀nylankan ehe whenu. Tito he yin bibayi na mí nido dotó plidopọ lọ to ladio ji, podọ nado pọ́n ẹn to televiziọn ji, ko gọalọna susu to mí mẹhe to pipehẹ ninọmẹ akuẹzinzan tọn lẹ to awà he jẹhẹ́n taun ehe ji to aihọn lọ mẹ nado hodo tito plidopọ lọ tọn lẹ bosọ mọaleyi sọn e mẹ.”

 Wedegbẹ́ Anadenanutọ tọn po Mẹpinplọn tọn po ko sọ nagbè dọ plidopọ daho 2021 tọn ni yin didohia to televiziọn ji podọ tito lọ nisọ yin hihò to ladio ji to lẹdo taun-taun delẹ mẹ. Nawẹ mí mọ akuẹ gbọn nado hẹn plidopọ lọ tin-to-aimẹ to aliho ehe mẹ? Nunina he nọ yin bibasi na azọ́n lẹdo aihọn pé tọn lọ gblamẹ wẹ, podọ susu yetọn wẹ nọ yin bibasi gbọn aliho voovo he yin nùdego to donate.mt1130.com ji. Mì wanu na nunina alọtútlú tọn mìtọn lẹ.