Dopo to nujijọ he Kunnudetọ Jehovah tọn lẹ donukun taun to owhe ehe mẹ wẹ Apá 1 video lọ Owẹ̀n He Jesu Lá tọn. Gbẹtọ livi susu lẹ wẹ ko pọ́n ẹn. Podọ apá 1 lọ poun die to 18 he e bẹhẹn lẹ mẹ! Azọ́n tẹlẹ wẹ nọ yin wiwà to nuglọ nado wleawuna video debọdo-dego ehelẹ, podọ nawẹ mìlọsu ko nọgodona vivẹnudido yetọn lẹ gbọn?

 To alahọ Australasie tọn mẹ, fihe suhugan video debọdo-dego Owẹ̀n He Jesu Lá lọ tọn lẹ nọ yin yíyí te, nudi gbẹtọ 50 jẹ 80 wẹ nọ to finẹ whenue yè to adà dopodopo yí. a Yè nọ wleawuna núdùdù whèmẹ tọn, whèjai tọn, gọna jlonu lẹ na azọ́nwatọ lọ lẹpo. Tito núdùdù tọn lẹ ko nọ yin bibasi ojlẹ susu jẹnukọn. Esther he nọ wazọ́n to Azọ́nwatẹn Núdùdù tọn dọmọ: “Mí nọ họ̀ núdùdù lẹ sọn nusàtọ voovo lẹ si na mí nido mọ onú dagbe he ma na vẹahi sọmọ lẹ họ̀. Podọ mí nọ diọ núdùdù lọ lẹ sọn ojlẹ de mẹ jẹ devo mẹ nado de nuhẹngu lẹ pò.” To azán dopodopo ji, nudi dọla Amelika tọn ẹnẹ wẹ mí nọ zan na núdùdù mẹdopodopo tọn.

 Azọ́nwatọ mítọn lẹ ma do hudo núdùdù tọn kẹdẹ gba, amọ́ yé sọ do hudo hihọ́ tọn. Hihọ́ etẹ tọn? To Australie, owhè nọ sinyẹn taun podọ hinhọ́n ylankan owhè tọn lẹ sọ nọ sù. Nado basi hihọ́na na mẹlẹ sọn owhè po yozò sinsinyẹn lọ po si, mẹmẹsunnu po mẹmẹyọnnu lẹ po nọ dovivẹnu nado wleawuna nudi azava delẹ gọna nọtẹn devo lẹ fihe azọ́nwatọ lẹ sọgan nọ mọ fifá te, podọ yé sọ nọ hẹn ẹn diun dọ yé tindo nusisá he nọ basi hihọ́na agbasa sọta owhè, whèhẹ lẹ po osin susu po nọ tin-to-aimẹ. Kevin he nọ wazọ́n to Azọ́nwatẹn Hoyidokanji po Video po Tọn dọmọ: “Suhugan azọ́nwatọ ehelẹ tọn wẹ yin hagbẹ whẹndo Bẹtẹli tọn he ma nọ dọ́ Bẹtẹli lẹ. Yé nọ yí whiwhẹ po ayajẹ po do hẹn azọ́ndenamẹ ehe po devo lẹ po di. Azọ́n ehe ma gán pà mí eyin alọgọ yetọn dẹ́n.”

 Adà delẹ ma gán yin yíyí to alahọ lọ mẹ, vlavo to godo etọn kavi to azọ́nwatẹn hoyidokanji tọn, na e ma na to jọwamọ wutu. To ninọmẹ mọnkọ lẹ mẹ, mí nọ yì nọtẹn gbangba tọn lẹ nado yí adà lọ lẹ. Nado yí nujijọ hohowhenu tọn he go Biblu donù lẹ to fie lẹtliki kàn, ali dagbe po owhé egbezangbe tọn lẹ po ma tin te lẹ, azọ́nwatọ lọ lẹ nọ saba zingbejizọnlin yì lẹdo he to olá lẹ mẹ. Avọ̀ he yé na do lẹ gọna nuyizan devo lẹ, nọ yin bibẹ sọyi nọtẹn lọ bo nọ yin bibẹdo fie do hihọ́ de. Whẹpo yé do nọ jẹ video lẹ yí ji, mẹmẹsunnu he nọ deanana azọ́n lọ lẹ nọ hẹn ẹn diun dọ zomọ he nọ na miyọ́n lẹtliki tọn, osin dagbe, po afọdaitẹn lẹ po ko tin-to-aimẹ. Azọ́nwatọ lọ lẹ nọ nọ̀ owhé Kunnudetọ he to lẹdo lọ mẹ lẹ tọn gbè, adọtẹn he mọto nọ dọ̀n lẹ kavi hotẹli lẹ kavi ohọ̀ pẹvipẹvi delẹ mẹ.

 Video lẹ yíyí to lẹdo voovo he to olá lẹ mẹ gán vẹahi taun, yí whenu susu, bosọ biọ azọ́n sinsinyẹn wiwà. Enẹwutu to 2023, Hagbẹ Anademẹtọ lọ kẹalọyi dọ dọla Amelika tọn livi awe daa ni yin yiyizan nado họ̀ yẹpotin dahodaho delẹ he nọ do video lẹ hia taidi dọ fidevo lao wẹ yè te nkọ. Azọ́nwanu ehelẹ he nọ do video he họnwun taun lẹ hia to yẹpotin daho lẹ ji nọ wazọ́n dopọ hẹ hinhọ́n delẹ bọ e nọ taidi dọ gbangba wẹ yè te nkọ. Taidi kọdetọn de, e masọ nọ biọ dọ mí ni yí video delẹ to nọtẹn jọnun lẹ ba, na ehe nọ biọ akuẹzinzan susu. Darren he yin dopo to hagbẹ Wedegbẹ́ Alahọ Australasie tọn lẹ mẹ dọmọ: “Azọ́nwanu ehe nọ de tuklajijẹ azọ́nwatọ lẹ tọn pò taun podọ ehe nọ na yé dotẹnmẹ nado vọ́ adà delẹ yí eyin e biọ domọ. Di apajlẹ, eyin nọtẹn gbangba tọn de wẹ mí to video de yí te, mí dona yawu wàmọ whẹpo owhè he to họyì lọ nido busẹ. Amọ́ po alọgọ azọ́nwanu ehe tọn po, mí gán to adà he dona yin yíyí to whenue owhè to họyì de yí kakajẹ whenue mí mọ nuhe dín mí te.”

 Azọ́nwatọ kanweko lẹ sin hudo wẹ yè do nado wleawuna apà video lọ Owẹ̀n He Jesu Lá tọn dopodopo. Etẹwẹ yé nọ lẹn gando vivẹnudido he e nọ biọ nado penukundo yé go lẹpo go?

 Amber he zingbejizọnlin na kilomẹtlu 700 sọn otò etọn mẹ yì Melbourne nado doalọ to tito lọ mẹ wlan dọmọ: “Sọn whenue n’jẹ agahun-glintẹn lọ gbọ́n wẹ mẹmẹsunnu he to Bẹtẹli lẹ ko jẹ nukunpedo go e ji ganji. Hagbẹ whẹndo Bẹtẹli tọn susu wẹ nọ basi oylọna mi nado wá dùnú kavi nù tii dopọ hẹ yé. Whenue mí to azọ́nwa, mẹlẹpo wẹ nọ hẹn mi voawu bosọ nọ do owanyi hia mi. Dona susu lẹ wẹ gbejizọnlin he n’basi ehe hẹn wá na mi. Enẹwutu, n’ma mọ enẹ taidi avọ́sinsan de paali!”

 Derek nọ wazọ́n dopọ hẹ pipli he nọ deanana azọ́n video tọn lẹ. E dọmọ: “Azọ́nwatẹn susu lẹ wẹ ko nọgodona mí sọn bẹjẹeji azọ́n lọ tọn. Homẹ ṣie hùn nado tin topọ hẹ mẹmẹsunnu po mẹmẹyọnnu he ko yí whenu, nutindo, gọna huhlọn yetọn lẹ do sanvọ́ do azọ́n ehe tamẹ lẹpo. Yé nọ nọgodonamẹ, tindo ojlo dagbe bosọ jọmẹ. E họnwun dọ Jehovah ko dona yé podọ mílọsu lẹ ga. N’kudeji dọ e ma yin kọdetọn azọ́n mítọn tọn lẹ kẹdẹ ji wẹ e nọ ze ayiha do gba, amọ́ do lehe azọ́n mítọn nọ yin wiwà do ji ga.”

 Mì wanu na nunina he mì nọ basi nado nọgodona azọ́n video debọdo-dego tọn ehe, kakajẹ dehe mì nọ basi gbọn donate.mt1130.com ji lẹ.