Eyin a jlo na yọ́n mẹde ganji, e na yọ́n dọ a ni yọ́n nuhe e ko wà wayi lẹ gọna nuhahun he ji e ko dù te lẹ. Mọdopolọ, eyin a jlo na yọ́n mẹhe nkọ Jiwheyẹwhe yin, a dona tẹnpọn nado yọ́n nuhe e ko wà wayi lẹ. Vlavo e na paṣa we nado mọdọ e ko wà nususu wayi he to dagbe wà na mí todin taun bo nasọ wà dagbe na mí to sọgodo.

Jehovah Jiwheyẹwhe wẹ Mẹdatọ Daho lọ, podọ “jẹhẹnu mayinukundomọ etọn lẹ to yinyin mimọ hezeheze sọn whenue gbọ́n aihọn ko yin didá, na yé yin ayidego gbọn nuhe yin bibasi lẹ dali.” (Lomunu lẹ 1:20) “Ewọ wẹ Mẹhe basi aigba gbọn huhlọn etọn dali, Mẹhe do aigba he nọ yọ́n na jinukun ai gbọn nuyọnẹn etọn gblamẹ podọ mẹhe dlẹn olọn gbọn nukunnumọjẹnumẹ etọn gblamẹ.” (Jelemia 10:12) Humọ, nuhe Jiwheyẹwhe dá lẹ nọ dohia dọ e yiwanna mí.

Lẹnnupọndo lehe Jehovah doyẹyigona mí bo dá mí “to apajlẹ etọn mẹ” do ji. (Jenẹsisi 1:27) Enẹ dohia dọ e hẹn ẹn yọnbasi na mí nado tindo nugopipe mayọnjlẹ etọn lẹ jẹ obá de mẹ. E do ojlo na gbigbọnu lẹ do ahun mẹ na mí, enẹ wẹ nugopipe he mí tindo nado nọ yọ́n nuhe sọgbe po nuhe ylan to nukun etọn mẹ lẹ po. Mí nọ do ayajẹ to gbẹ̀mẹ dile mí to vivẹnudo nado wà nuhe sọgbe to nukun etọn mẹ. Podọ, e sọ na mí nugopipe lọ nado jihọntọn hẹ ẹ.

Eyin mí pọ́n nuhe Jiwheyẹwhe dá do aigba ji lẹ, mí na mọdọ e yiwanna mí nugbo. Dile apọsteli Paulu wlan do, Jiwheyẹwhe “wleawuna kunnudenu de gbọn nudagbe he e wà lẹ gblamẹ, bo nọ na [mí] jikun sọn olọn podọ ojlẹ sinsẹ́n susugege lẹ tọn bosọ nọ yí núdùdù do pekọna [mí] bo nọ yí ayajẹ do gọ́ ahun [mítọn].” (Owalọ lẹ 14:17) E ma yin nuhe sin hudo mí do nado nọgbẹ̀ lẹ kẹdẹ wẹ Jiwheyẹwhe na mí gba. E wleawuna onú wunmẹwunmẹ lẹ bọ yé sọ sù taun, na mí nido mọ awuvivi to gbẹ̀mẹ.  Etomọṣo, ehelẹ yin vude poun to nuhe e basi tito etọn na gbẹtọvi lẹ mẹ.

Jehovah dá aigba na gbẹtọvi lẹ nido nọ e ji kakadoi. Biblu dọmọ: “Aigba wẹ ewọ ko yí na gbẹtọvi lẹ,” podọ e “ma dá ẹ to ovọ́ mẹ, ṣigba [e] dá ẹ na yè nido nọ nọ̀ e ji.” (Salmu lẹ 115:16; Isaia 45:18) Mẹnu lẹ wẹ na nọ e ji, podọ nawẹ yé na nọ e ji dẹnsọ? “Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.”—Salmu lẹ 37:29.

Enẹ wẹ zọ́n bọ Jehovah dá sunnu po yọnnu po tintan lọ, Adam po Evi po bo ze yé do paladisi de mẹ to aigba ji “nado nọ pọ̀ ẹ podọ nado nọ penukundo e go.” (Jenẹsisi 2:8, 15) Jiwheyẹwhe sọ de azọ́n dagbedagbe voovo awe na yé: “Mì yin sinsẹ́nnọ bo sudeji bosọ gọ́ aigba ji bo dugán do e ji.” (Jenẹsisi 1:28) Ehe dohia dọ Adam po Evi po tindo dotẹnmẹ hundote lọ nado nọgbẹ̀ kakadoi to aigba ji. Amọ́, e blawu dọ yé de nado vẹtolina Jiwheyẹwhe bo hẹn todido lọ nado tin to “dodonọ” he “na dugu aigba tọn” lẹ mẹ bu. Dile mí ka na wá mọ do, nuyiwa yetọn ma diọ tito Jehovah tọn na gbẹtọvi lẹ po aigba po. Tintan whẹ́, mì gbọ mí ni gbadopọnna nudevo he Jiwheyẹwhe ko wà wayi.

Biblu sọ nọ yin yiylọdọ Ohó Jiwheyẹwhe tọn. Naegbọn Jehovah do wleawuna Biblu na mí? Tintan, e jlo dọ mí ni yọ́n mẹhe nkọ ewọ yin. (Howhinwhẹn lẹ 2:1-5) Nugbo wẹ dọ Biblu ma na gblọndo kanbiọ he mí gán kanse gando Jiwheyẹwhe go lẹpo tọn, podọ owe de ma gán wàmọ. (Yẹwhehodọtọ 3:11) Amọ́, nuhe to Biblu mẹ lẹpo wẹ nọ gọalọna mí nado yọ́n mẹhe nkọ Jiwheyẹwhe yin. Lehe e nọ yinuwa hẹ gbẹtọ lẹ do nọ do ehe hia. Mí sọ nọ yọ́n walọ he e nọ kẹalọyi po dehe e nọ gbẹwanna lẹ po. (Salmu lẹ 15:1-5) Mí nọ yọ́n linlẹn etọn gando sinsẹ̀n-bibasi, walọ dagbe po agbasanu lẹ po go. Mí sọ nọ yọ́n mẹhe nkọ Jehovah yin to gigọ́ mẹ gbọn nuhe Visunnu etọn, Jesu Klisti dọ bo wà lẹ hihia to Biblu mẹ dali.—Johanu 14:9.

Nudevo he wutu Jehovah sọ wleawuna Ohó etọn Biblu na mí wẹ yindọ na mí nido yọ́n nuhewutu mí do togbẹ̀ bo nasọ do ayajẹ to gbẹ̀mẹ. Jehovah sọ dọna mí to Biblu mẹ lehe mí gán do ayajẹ to whẹndo mẹ, tindo pekọ bo pehẹ nuhahun gbẹ̀mẹ tọn lẹ do. Humọ, dile mí na wá mọ to linlinnamẹwe ehe mẹ do, Biblu sọ na gblọndo na kanbiọ titengbe hugan he mẹsusu nọ kanse lẹ, taidi: Naegbọn yajiji do sù sọmọ to gbẹ̀mẹ? Etẹwẹ sọgodo bẹhẹn? E sọ dọ tito he Jiwheyẹwhe ko zedai nado hẹn ojlo dowhenu tọn etọn di.

Biblu sọ bẹ nususu devo lẹ hẹn he dohia dọ owe vonọtaun de wẹ e yin, he wá sọn Jiwheyẹwhe dè. E yin kinkan to owhe 1 600 gblamẹ gbọn sunnu voovo 40 dali, etomọṣo, hosọ dopolọ ji wẹ e dọhodo, na Jiwheyẹwhe wẹ yin Dowatọ etọn wutu. (2 Timoti 3:16) To vogbingbọn mẹ na owe hohowhenu tọn devo lẹ, Biblu gbọṣi aimẹ dile kandai hohowhenu tọn fọtọ́n susu he wá lẹzun apadewhe Biblu tọn lẹ dohia do. Humọ, mahopọnna vivẹnudido gbẹtọ lẹ tọn nado sukúndona Biblu, e ko yin lilẹdo ogbè susu lẹ mẹ bo gbayipe bọ mẹsusu nọ hia ẹ to egbé. Todin, owe ehe wẹ gbayipe bo nọ yin lilẹdo ogbè devo mẹ hugan owe devo depope. Ehe yin kunnudenu dọ “ohó Jiwheyẹwhe mítọn tọn na gbọṣi aimẹ kakadoi.”—Isaia 40:8.

Nudevo he Jiwheyẹwhe ko wà wẹ tito vonọtaun he e zedai nado dohia dọ ojlo emitọn na mọ hẹndi dandan. Dile mí ko mọ do wayi, ojlo Jiwheyẹwhe tọn wẹ yindọ mí ni nọgbẹ̀ kakadoi to aigba ji. Amọ́, to whenue Adam de nado vẹtolina Jiwheyẹwhe bo waylando, e hẹn todido ogbẹ̀ madopodo tọn edetiti tọn po ovi sọgodo tọn etọn lẹ po tọn bu. “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.” (Lomunu lẹ 5:12) Tolivivẹ gbẹtọvi tọn taidi aliglọnnamẹnu de na ojlo Jiwheyẹwhe tọn. Enẹwutu, nawẹ Jehovah yinuwa gbọn?

Nuhe Jehovah wà sọgbe hẹ mẹhe nkọ e yin. E do mẹplọnlọ Adam po Evi po go na nuṣiwa yetọn, amọ́ e gbọn owanyi dali ze tito devo dai na ovi yetọn lẹ. Na Jehovah yin nuyọnẹntọ wutu, e didẹ whẹho lọ  bo yinuwa to afọdopolọji nado hẹn pọngbọ wá. (Jenẹsisi 3:15) Jesu Klisti, yèdọ Visunnu Jiwheyẹwhe tọn wẹ na de ylando po okú po sẹ̀. Gbọnna?

Nado tún gbẹtọvi lẹ dote sọn nuhe tolivivẹ Adam tọn hẹngble lẹ si, Jehovah do Jesu hlan aigba ji nado do ali ogbẹ̀ tọn hia gbẹtọvi lẹ bo “ze ogbẹ̀ etọn jo taidi ofligọ de do ota mẹsusu tọn mẹ.” a (Matiu 20:28; Johanu 14:6) Na Jesu yin sunnu pipé de taidi Adam wutu, e penugo nado fli mí gọ̀. Amọ́, to vogbingbọn mẹ na Adam, Jesu setonu mlẹnmlẹn, etlẹ yin kakajẹ okú. Jesu ma jẹ nado kú, enẹwutu Jehovah fọ́n ẹn sọnku nado lẹkọyi olọn mẹ. Gbọnmọ dali, Jesu wà nuhe Adam ma wà lọ, enẹ wẹ nado na gbẹtọvi tonusetọ lẹ todido lọ nado nọgbẹ̀ kakadoi. “Na kẹdẹdile mẹsusu lẹzun ylandonọ gbọn tolivivẹ mẹdopo tọn gblamẹ do, mọdopolọ ga wẹ mẹsusu na lẹzun dodonọ gbọn tonusise mẹdopo tọn gblamẹ do.” (Lomunu lẹ 5:19) Gbọn avọ́sinsan ofligọ Jesu tọn gblamẹ, Jiwheyẹwhe na hẹn opagbe etọn di, enẹ wẹ nado hẹn gbẹtọvi lẹ nado nọgbẹ̀ kakadoi to aigba ji.

Aliho he mẹ Jehovah didẹ nuhahun he tolivivẹ Adam tọn hẹnwa lẹ te, plọn nususu mí gando mẹhe nkọ ewọ yin go. E plọn mí dọ nudepope ma sọgan glọnalina Jehovah nado dotana nuhe e bẹjẹeji; nuhe e dọ na nọ tindo “kọdetọn dagbe dandan.” (Isaia 55:11) E sọ do lehe Jehovah yiwanna mí sọ hia. “Gbọn ehe dali wẹ owanyi Jiwheyẹwhe tọn ko yin didehia to whẹho mítọn mẹ, dọ Jiwheyẹwhe do Visunnu detọ́n dopo akàn etọn hlan aihọn mẹ, na mí nido sọgan mọ ogbẹ̀ gbọn ewọ gblamẹ. Ehe mẹ wẹ owanyi lọ te, e ma yindọ míwlẹ wẹ ko yiwanna Jiwheyẹwhe gba, ṣigba dọ ewọ wẹ yiwanna mí bo do Visunnu etọn hlan taidi avọ́sinsan oyẹsu tọn de na ylando mítọn lẹ.”—1 Johanu 4:9, 10.

Jiwheyẹwhe “ma tlẹ whlá Visunnu etọn titi, ṣigba bo ze e jo do ota mímẹpo tọn mẹ,” enẹwutu, mí deji dọ Jiwheyẹwhe na “yí homẹdagbe do na mí nudevo lẹpo” dile e dopagbe etọn do. (Lomunu lẹ 8:32) Etẹwẹ Jiwheyẹwhe ko dopà nado wà na mí? Jaale bo hia hosọ he bọdego.