E MA yin nuhe Jiwheyẹwhe lẹn dai wẹ ogbẹ̀ yin to egbehe. Eyin nulẹ yì ganji wẹ, gbẹtọvi he nọ na sisi Mẹdatọ lọ taidi nupojipetọ lẹ kẹdẹ wẹ na ko gọ́ aigba lọ ji, bo na nọ mọaleyi sọn anademẹ etọn lẹ mẹ bo nasọ nọ do jijọ dagbe etọn lẹ hia. Yé na nọ yí ayajẹ do kọngbedopọ hẹ ode awetọ dile yé to jijideji, to nuyọyọ lẹ plọn bo na hẹn aigba lọ blebu zun paladisi.

• “Ewọ to awhàn hẹnwa opodo lẹdo aigba pé.”—Salmu lẹ 46:9.

• “Ojlẹ dide lọ sọ wá nado . . . husudo mẹhe to aigba husudo lẹ.”—Osọhia 11:18.

• “Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’”—Isaia 33:24.

• “Mẹdide ṣie lẹ na nọ duvivi azọ́n alọ yetọn lẹ tọn to gigọ́ mẹ.”—Isaia 65:22.

Nawẹ opagbe ehelẹ na yin hinhẹndi gbọn? Jiwheyẹwhe ko de Visunnu etọn, Jesu, taidi Ahọlu gandudu pipé olọn mẹ tọn de tọn nado dugán do aigba ji. Biblu ylọ ẹ dọ Ahọluduta Jiwheyẹwhe tọn. (Daniẹli 2:44) Biblu dọ gando Jesu go dọmọ: “Jiwheyẹwhe nasọ yí ofìn . . . na ẹn, ewọ nasọ yin Ahọlu.”—Luku 1:32, 33.

To whenue Jesu to aigba ji, e wà azọ́njiawu susu nado dohia dọ taidi Ahọlu de, emi na wá hẹn ninọmẹ gbẹtọvi lẹ tọn pọnte taun hú dintọn.

• E gbọ azọ̀n wunmẹ lẹpo, bo dohia dọ emi na sukúndona manọna gbẹtọvi tọn lẹpo.—Matiu 9:35.

• E degbedo ohù nado nabọẹ, bo dohia dọ emi do aṣẹ do huhlọn jọwamọ tọn lẹ ji.—Malku 4:36-39.

• E na núdùdù gbẹtọ fọtọ́n lẹ, bo dohia dọ emi na hẹn pekọ wá na nuhudo gbẹtọ lẹ tọn.—Malku 6:41-44.

• E diọ osin zun ovẹn to alọwle de whenu, bo dohia dọ emi na hẹn gbẹtọ lẹ nado duvivi ogbẹ̀ tọn.—Johanu 2:7-11.

Nawẹ a sọgan mọ ogbẹ̀ he nkọ Jiwheyẹwhe jlo na mẹhe yiwanna ẹn lẹ gbọn? “Aliho” de tin he a dona dinmọ. Biblu ylọ ẹ dọ “aliho lọ he nọ planmẹ yì ogbẹ̀ mẹ, omẹ vude wẹ sọ to dindin in mọ.”—Matiu 7:14.

Etẹwẹ aliho ogbẹ̀ tọn lọ zẹẹmẹdo? Jiwheyẹwhe dọmọ: “Yẹn Jehovah wẹ Jiwheyẹwhe towe, Mẹhe nọ plọn we nado zan gbẹzan he na hẹn ale wá na we, Mẹhe nọ deanana we to aliho he ji hiẹ dona zinzọnlin gbọn.” (Isaia 48:17) Eyin a nọ zinzọnlin gbọn aliho ehe ji, a gán mọ sọgodo dagbe enẹ.

Jesu dọmọ: “Yẹn wẹ aliho lọ, nugbo lọ po ogbẹ̀ po.” (Johanu 14:6) Eyin mí nọ wà nuhe Jesu plọnmẹ lẹ bosọ nọ hodo apajlẹ etọn, mí na lẹzun họntọn Jiwheyẹwhe tọn bọ gbẹzan mítọn na pọnte.

 Nawẹ a gán mọ aliho ogbẹ̀ tọn lọ gbọn? Sinsẹ̀n susu wẹ tin, amọ́ Jesu ko na avase dọmọ: “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ Ahọluduta olọn tọn mẹ gba, adavo ewọ he to ojlo Otọ́ ṣie he tin to olọn mẹ tọn wà kẹdẹ.” (Matiu 7:21) E sọ yidogọ dọmọ: “Gbọn sinsẹ́n yetọn lẹ dali wẹ mì na yọ́n yé.” (Matiu 7:16) Biblu gán gọalọna we nado yọ́n sinsẹ̀n nugbo lọ dovo na sinsẹ̀n lalo.—Johanu 17:17.

Nawẹ a gán zinzọnlin gbọn aliho ogbẹ̀ tọn lọ ji gbọn? Ehe biọ dọ a ni yọ́n Mẹlọ he dá nulẹpo: Mẹnu wẹ? Nawẹ e nọ yin? Omẹ nankọ wẹ? Dagbe tẹlẹ wẹ e to wiwà na mí? Etẹwẹ e to nukundo sọn mí si? *

Nuhewutu Jiwheyẹwhe do dá gbẹtọvi lẹ ma yin nado wazọ́n, dùnú, daihun bo do whẹndo ai poun gba. E sọ jlo dọ mí ni yọ́n Mẹdatọ mítọn bo lẹzun họntọn etọn. Mí gán dohia dọ mí yiwanna ẹn gbọn ojlo etọn wiwà dali. Jesu dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ.”—Johanu 17:3.

Nado hẹn homẹ Jiwheyẹwhe nugbo dopo kẹdẹ lọ tọn hùn, e gán biọ diọdo delẹ to gbẹ̀mẹ. E gán nọma bọawu. Amọ́, afọdide ehe na hẹn gbẹzan towe pọnte taun. Na a nido mọ gblọndo na kanbiọ he mẹsusu nọ kanse gando Jiwheyẹwhe go lẹ, Kunnudetọ Jehovah tọn lẹ gán plọn Biblu hẹ we vọnu to nọtẹn po ogàn he yọ́n na we po mẹ. A sọgan kanwehlan mí gbọn nọtẹn Intẹnẹt tọn mítọn www.mt1130.com ji.