To dowhenu, Mẹdatọ mítọn nọ dọhona gbẹtọ lẹ gbọn angẹli po yẹwhegán lẹ po gblamẹ. E sọ basi tito bọ Ohó etọn po nudagbe he e jlo na wà na gbẹtọ lẹ po yin kinkandai, na e jlo dọ sọgodo mítọn ni yọ́n wutu. Owe tẹ mẹ wẹ a gán mọ nudagbe enẹlẹ hia te?

Owe-wiwe lẹ mẹ wẹ yé te. (2 Timoti 3:16) Amọ́, nawẹ Jiwheyẹwhe wagbọn bọ ohó etọn yin kinkandai? (2 Pita 1:21) E ze linlẹn etọn lẹ do ayiha mẹ na mẹdelẹ bọ yé kàn ẹn dai. E taidi nuhe nọ jọ to azọ́nwhé lẹ. Ogán de gán dọna azọ́nwatọ etọn dọ ni kanwehlan mẹde. Dile etlẹ yindọ azọ́nwatọ lọ wẹ kanwe lọ, owẹ̀n ogán lọ tọn wẹ demẹ. Mọdopolọ, owẹ̀n Jiwheyẹwhe tọn wẹ gbẹtọ lẹ kàn do Owe-wiwe mẹ, e ma yin linlẹn yetọn lẹ.

Ohó Jiwheyẹwhe tọn yin nujọnu sọmọ bọ e jlo dọ “akọta lẹpo, hẹnnu lẹpo, ogbè lẹpo” ni hia ẹ bo mọnukunnujẹemẹ. (Osọhia 14:6) Mí dopẹ́ dọ Owe-wiwe lẹ blebu kavi apadewhe yetọn ko tin to ogbè 3 000 linlán mẹ, podọ owe devo depope ma gbayipe sọmọ.