Biblu ko luntọ́n. Enẹwutu, a sọgan mọ ẹn yí bosọ hia ẹ to egbehe. Podọ eyin a de lẹdogbedevomẹ dagbe Owe-wiwe lẹ tọn de, a sọgan kudeji dọ nuhe tin to kandai dowhenu tọn lẹ mẹ pẹpẹ hia wẹ a te. * Ṣigba, naegbọn Biblu do luntọ́n to aliho he jiawu de mẹ mahopọnna ayiha he yin kinkan nado sú i do lẹ, nukundiọsọmẹ sinsinyẹn gọna vivẹnudido nado diọ linlẹn he tin to e mẹ lẹ? Etẹwẹ hẹn owe enẹ gbọnvo sọmọ?

Biblu plọntọ susu ko wá tadona dopolọ kọ̀n taidi apọsteli Paulu, mẹhe wlan dọmọ: “Owe-wiwe lẹpo wẹ yin gbigbọdo sọn Jiwheyẹwhe dè.” (2 Timoti 3:16) Yé yise dọ Biblu luntọ́n na Jiwheyẹwhe wẹ yin dowatọ etọn bosọ basi hihọ́na ẹn kakajẹ egbehe wutu. Di apajlẹ, Faizal yin pinplọn gbọn whẹndo etọn he ma yin Klistiani dali dọ Biblu yin owe wiwe de, amọ́ dọ e ko yin didiọ. E dọmọ: “Taidi kọdetọn de, n’nọ tindo ayihaawe to whenue mẹde to hodọna mi gando Biblu go, na nuhe họnwun wẹ yindọ Biblu dintọn gbọnvona dowhenu tọn lọ. E ko yin didiọ.” Ṣigba, to godo mẹ, e wá basi dide nado gbadopọnna linlẹn enẹlẹ na ede gbọn Biblu pinplọn dali. Nuhe e mọ paṣa ẹ taun. E ma dẹn bọ e doayi e go dọ nuplọnmẹ Mẹylọhodotọklisti tọn lẹ ma sọgbe hẹ nuhe tin to Biblu mẹ. Humọ, lẹndai Jiwheyẹwhe tọn gando aigba go he tin to Biblu mẹ yinuwado e ji taun.

E dọmọ: “Todin, n’kudeji dọ nunina de sọn Jiwheyẹwhe dè wẹ Biblu he n’tindo yin. Podọ, eyin Jiwheyẹwhe penugo nado dá wẹkẹ lọ, be e ma tindo huhlọn nado na owe de mí bosọ basi hihọ́na ẹn na mí ya? Eyin n’lẹndọ e ma sọgan wàmọ, be n’to didohia dọ huhlọn Jiwheyẹwhe tọn tindo dogbó niyẹn. Ṣigba mẹnu wẹ n’yin nado wàmọ?”—Isaia 40:8.