To Akuẹzinzan-Liho
Ayinamẹ Biblu tọn lẹ ko gọalọna mẹsusu nado de nuhahun akuẹzinzan tọn yetọn pò.
BASI TITO DAGBE
AYINAMẸ BIBLU TỌN: “Tito mẹhe nọ dovivẹnu tọn lẹ nọ tindo kọdetọn dagbe dandan, ṣigba, mẹhe ma nọ whesọ lẹpo wẹ na biọ ohẹ́n mẹ dandan.”—Howhinwhẹn lẹ 21:5.
NUHE E ZẸẸMẸDO: Nado zan akuẹ towe ganji, nọ tẹdo tito he a ko basi lọ go. Enẹwutu, nọ basi tito na nuhe a na zan akuẹ na lẹ whẹ́. Flindọ a ma gán họ̀ nuhe nọ jlo we to whelẹponu. Enẹ wẹ zọ́n bọ a dona nọ zan akuẹ towe po nuyọnẹn po.
NUHE A GÁN WÀ:
-
Nọ tẹdo tito towe go. Basi kandai nuhe ji a na zan akuẹ do lẹpo tọn, bo ka yọ́n nuhe yin nujọnu hugan to yé mẹ lẹ. Enẹgodo, de nẹmu he a na zan na onú dopodopo. Eyin a wá zan akuẹ zẹ̀ nuhe a lẹn go to fide, yí akuẹ sọn dehe a ko de na nudevo mẹ do sù odò lọ. Di apajlẹ, eyin akuẹ he a zan nado jẹ amì do mọto kavi kẹkẹ mẹ wá zẹ̀ dehe a basi tito etọn go, yí akuẹ sọn dehe a lẹn nado zan na nujlomẹ de mẹ do sú odò etọn.
-
Nọ dapana ahọ́ he ma yin dandan lẹ. Eyin e ma biọ domọ, ma nọ yàn akuẹ blo. Kakatimọ, nọ sẹ̀ akuẹ do nado họ̀ nuhe sin hudo a do. Ma nọ yawu họ̀nú ahọ́ blo. Eyin a duahọ, nọ basi tito dagbe nado yawu gọ̀ ẹ sú.
Dodinnanu de dohia dọ mẹhe nọ họ̀nú ahọ́ lẹ nọ to nuhọ̀ mapote. Enẹwutu, ma yí nuhọ̀ ahọ́ do dó aṣa blo.
AṢA HE A DONA DAPANA DELẸ
AYINAMẸ BIBLU TỌN: “Adidọnọ ma nọ jlo aigba to avivọ-whenu, enẹwutu, ewọ na wá biọnu to jibẹwawhé whenu, to whenue e ma na tindo nude.”—Howhinwhẹn lẹ 20:4.
NUHE E ZẸẸMẸDO: Adidọ gán hẹnmẹ jẹhẹ́n. Enẹwutu, yiwanna azọ́n bo nọ yí nuyọnẹn do zan akuẹ, na a nido sẹ̀ vude do na sọgodo.
NUHE A GÁN WÀ:
-
Yin azọ́n sinsinyẹnwatọ. Eyin a nọ wazọ́n sinsinyẹn bo nọ penukundo azọ́n towe go ganji, mẹlẹ na yiwanna azọ́n towe.
-
Nọ dọ nugbo. Ma nọ jẹajo do ogán towe kavi fìn azọ́nwanu mẹlẹ tọn blo. Nugbomadọ gán hẹn yinkọ towe gble bọ e na wá vẹawuna we nado nọ mọ azọ́n.
-
Nọ dapana nukunkẹn. Eyin akuẹ jẹnukọnna we, enẹ gán wá yinuwado agbasalilo towe po haṣinṣan towe hẹ mẹdevo lẹ po ji. Flindọ e ma yin akuẹ wẹ yin nujọnu hugan to gbẹ̀mẹ.
AYINAMẸ BIBLU TỌN DEVO LẸ
Hia Biblu to Intẹnẹt ji, e tin to ogbè kanweko susu lẹ mẹ to jw.org ji
MA DIKE AṢA YLANKAN LẸ NI NỌ HẸN WHENU PO AKUẸ TOWE PO GÚ BLO.
“Ahànnumunọ po adọ̀whẹnnọ po na wá tlọ biọ ohẹ́n mẹ, podọ amlọngọsisa nasọ hẹnmẹ ṣinyọ́n avọ̀ kija.”—HOWHINWHẸN LẸ 23:21.
MA NỌ HANÚ GLANGLAN BLO.
“Mì sọ yin magbọjẹnọ na ogbẹ̀ mìtọn gando nuhe mì na dù kavi nuhe mì na nù go kavi na agbasa mìtọn gando nuhe mì na do go ba blo.”—MATIU 6:25.
NỌ DO PEKỌ.
“Nukunkẹnnọ nọ to jejeji nado jẹ adọkun, amọ́, e ma yọnẹn dọ ohẹ́n wẹ to tepọn emi.”—HOWHINWHẸN LẸ 28:22.
A Gán Sọ Pọ́n Hosọ Ehelẹ
HOSỌ DEVO LẸ
Lehe A Gán Dowéna Akuẹ Do
Dile etlẹ yindọ apọ̀ gán ṣì we eyin akuẹ he a nọ mọ depò to ajiji mẹ, ayinamẹ nuyọnẹn tọn he to Biblu mẹ lẹ gán gọalọna we nado dowéna akuẹ.
