Adángbòmẹ nọ hẹnnugble to mẹgo janwẹ, vlavo yè doayi e go kavi yè ma doayi e go.

• Adángbòmẹ gán do lẹnpọn namẹ, podọ lẹnpọn glanglan gán wá zọ́n bọ yè na nọ yawu jẹ awutu.

• Awhàn, aigba sisọsisọ, kavi onú mọnkọ lẹ gán zọ́n bọ doto, amasin po nukunpedomẹgo dotowhé tọn he jẹ po na hán.

• Eyin bẹwlu biọ otò de mẹ, akuẹ ma nọ biọ whégbè di dai ba, e nọ vẹawu nado mọ dandannu lẹ taidi núdùdù he nọ namẹ hunsindagbe, amasin kavi nado yì dotowhé.

• Mẹhe to azọ̀n sinsinyẹn jẹ kavi to ayimajai mẹ gán nọma lẹnnupọn ganji ba bo dovọ́na aṣa he na zọ́n bọ e na to ganji to agbasa mẹ lẹ. Podọ e yọnbasi dọ mẹlọ ni wá pò na azọ̀n.

• Azọ̀n he go yè ma penukundo ganji lẹ gán vantan bo tlẹ gán wá hùmẹ.

• E nọ bọawu hugan na mẹhe to jogún-jogún nado basi nudide dagbe lẹ to ninọmẹ sinsinyẹn lẹ mẹ.

• Vlavo a yin adọkunnọ kavi wamọnọ, a gán wà nudelẹ nado nọ ganji to agbasa mẹ.

Whedepopenu he e yọnbasi, mẹhe yin nuyọnẹntọ nọ tẹnpọn nado mọ owù he e gán pehẹ lẹ hlan bo nọ ze afọdide lẹ nado dapana yé. A gán wà nudopolọ ma nado jẹazọ̀n. Wiwejininọ nọ zọ́n bọ yè ma nọ yawu jẹazọ̀n delẹ, podọ eyin yè tlẹ wá bẹ janwẹ, e ma na sinyẹn sọmọ. E pọnte dọ yè ni họ́ mẹde nado nọ jogún-jogún hú dọ yè ni wá zan akuẹ do amasin mẹ.

“Mí nọ hẹn míde po owhé mítọn po do wiweji. Enẹ ko gọalọna mí ma nado gbọ do dotowhé kavi họ̀ amasin sọmọ.”—Andreas. a